പൂക്കളവും നിലവിളക്കും സദ്യമേശയും... വീടിന് ഉത്സവച്ചന്തം നൽകാൻ എളുപ്പ വഴികൾ

ഓണം വരവായി. പത്ത് ദിവസത്തെ ആഘോഷത്തിന്റെ നിറവും മണവും വീട്ടിലേക്കും പകരാൻ അലങ്കാരങ്ങൾക്കും വലിയ പ്രാധാന്യമുണ്ട്. വീടിന്റെ മുഴുവൻ രൂപവും മാറ്റിമറിക്കേണ്ട ആവശ്യമില്ല. പൂക്കളം, പൂക്കൾ, നിലവിളക്ക്, മനോഹരമായ തുണിത്തരങ്ങൾ, സദ്യയ്ക്കായി ഒരുക്കുന്ന തീൻമേശ എന്നിവയിൽ അൽപം ശ്രദ്ധ നൽകിയാൽ വീട്ടിൽ ഓണത്തിന്റെ ഉത്സവാന്തരീക്ഷം സൃഷ്ടിക്കാം. ഓണാഘോഷത്തിന് വീട് ഒരുക്കാനുള്ള ചില ലളിതമായ വഴികൾ

ഓണാലങ്കാരത്തിന്റെ പ്രധാന ആകർഷണം പൂക്കളമാണ്. മഹാബലിയെ വരവേൽക്കുന്നതിനായി വീടിന്റെ പ്രവേശനകവാടത്തിൽ ഒരുക്കുന്ന വൃത്താകൃതിയിലുള്ള പൂക്കളം ഓണത്തിന്റെ ഏറ്റവും മനോഹരമായ പ്രതീകങ്ങളിലൊന്നാണ്.

മഞ്ഞ, ഓറഞ്ച് നിറങ്ങളിലുള്ള ചെണ്ടുമല്ലി ഉപയോഗിച്ച് ലളിതമായ പൂക്കളം ഒരുക്കാം. കൂടുതൽ മനോഹരമാക്കാൻ മുല്ല, ജമന്തി, ചുവപ്പ് നിറത്തിലുള്ള ചെറിയ പൂക്കൾ തുടങ്ങിയവയും ഉപയോഗിക്കാം.

പൂക്കളം മാത്രമല്ല, വീടിന്റെ മറ്റ് ഭാഗങ്ങളിലും പൂക്കൾക്ക് ഇടം നൽകാം. സ്വീകരണമുറിയിലെ സെന്റർ ടേബിളിൽ പുതിയ പൂക്കളുള്ള ഒരു വെയ്സ് വയ്ക്കുന്നത് വീടിന് പെട്ടെന്ന് തന്നെ ഉത്സവഭംഗി നൽകും. കഴിയുമെങ്കിൽ ദിവസവും പൂക്കൾ മാറ്റാം.

ഓണാലങ്കാരത്തിന് മഞ്ഞ, ഓറഞ്ച്, പച്ച, വെള്ള, ​ഗോൾഡൻ നിറങ്ങൾ മികച്ച കോമ്പിനേഷനാണ്. വീടിന്റെ മുഴുവൻ ഫർണിച്ചറും മാറ്റേണ്ട ആവശ്യമില്ല. എർത്ത് ടോണുകളിലുള്ള കുഷൻ കവറുകൾ, ടേബിൾ റണ്ണറുകൾ തുടങ്ങിയ ചെറിയ മാറ്റങ്ങൾ പോലും വലിയ വ്യത്യാസമുണ്ടാക്കും.

നിലവിളക്ക് വീടിന്റെ അന്തരീക്ഷം തന്നെ മാറ്റും. പ്രവേശനകവാടത്തിനരികിലോ സ്വീകരണമുറിയുടെ ഒരു കോണിലോ നിലവിളക്ക് വയ്ക്കാം. വൈകുന്നേരം അത് തെളിയിക്കുന്നത് അലങ്കാരത്തിനപ്പുറം പരമ്പരാഗതമായ ഒരു ഉത്സവാന്തരീക്ഷം സൃഷ്ടിക്കും.

ഓണത്തിന് വീടിനെ പ്രകാശിപ്പിക്കാൻ അമിതമായ വൈദ്യുതവെളിച്ചം ആവശ്യമില്ല. മൃദുവായ, വാം വെളിച്ചമാണ് കൂടുതൽ മനോഹരമാകുക. നിലവിളക്കിനൊപ്പം ചെറിയ ദീപങ്ങളോ ഡയകളോ ടേബിൾ ലാമ്പുകളോ ഉപയോഗിക്കാം.

ഓണാഘോഷത്തിൽ ഏറ്റവും പ്രധാനപ്പെട്ട ഇടങ്ങളിലൊന്നാണ് സദ്യമേശ. വാഴയിലയിൽ സദ്യ വിളമ്പുന്നതിനൊപ്പം മേശയും ഭംഗിയായി ഒരുക്കാം. ഒരു മനോഹരമായ ടേബിൾ റണ്ണറോ ടേബിൾ കവറോ ഉപയോഗിക്കുന്നത് മേശയ്ക്ക് കൂടുതൽ ഭംഗി നൽകും.

സദ്യമേശയുടെ നടുവിലായി ചെറിയ പൂക്കളും വിളക്കുകളും വയ്ക്കാം. എന്നാൽ അലങ്കാരങ്ങൾ ഭക്ഷണം വിളമ്പുന്നതിനും കഴിക്കുന്നതിനും തടസ്സമാകാത്ത വിധം ലളിതമായിരിക്കണം.

ബ്ലോക്ക് പ്രിന്റ് ചെയ്ത ടേബിൾ റണ്ണറുകൾ, നാപ്കിനുകൾ, പ്ലേസ്മാറ്റുകൾ, കുഷൻ കവറുകൾ തുടങ്ങിയവ ഉപയോഗിച്ച് വീടിന് ഇന്ത്യൻ കരകൗശലത്തിന്റെ സ്വാഭാവിക ഭംഗി നൽകാം. ഓണത്തിന്റെ പ്രകൃതിയോടും ആഘോഷത്തോടും ചേരുന്ന നിറങ്ങളും ഡിസൈനുകളും തിരഞ്ഞെടുക്കുന്നതാണ് നല്ലത്.