സമകാലിക മലയാളം ഡെസ്ക്
ശരീരം ഹൈഡ്രേറ്റഡ് ആയി സൂക്ഷിക്കാൻ മികച്ച മാർഗമാണ് പഴങ്ങൾ. പഴങ്ങളിൽ അടങ്ങിയ വിറ്റാമിനുകളും ധാതുക്കളും ആന്റിഓക്സിഡന്റുകളും രോഗപ്രതിരോധ ശേഷി മെച്ചപ്പെടുത്താനും സഹായിക്കും.
എന്നാൽ പഴങ്ങൾ വാങ്ങി സൂക്ഷിക്കുമ്പോൾ പെട്ടെന്ന് ചീഞ്ഞു പോകുന്നുവെന്ന പരാതി പതിവാണ്. പഴങ്ങൾ ഫ്രഷ് ആയി ദീർഘകാലം സൂക്ഷിക്കാൻ ഈ ടിപ്സ് പരീക്ഷിക്കാവുന്നതാണ്.
താപനില മുഖ്യം
ഓരോ തരം പഴങ്ങളും സൂക്ഷിക്കേണ്ടത് ഓരോ താപനിലയിലാണ്. ആപ്പിള്, മുന്തിരി തുടങ്ങിയവ തണുത്ത താപനിലയിൽ സൂക്ഷിക്കണം.
മാമ്പഴം, ചക്ക, വാഴപ്പഴം, പൈനാപ്പിള് തുടങ്ങിയവയെല്ലാം പുറത്തു തന്നെ വച്ച് ഉപയോഗിക്കുന്നതാണ് കൂടുതല് നല്ലത്.
എഥിലീൻ പുറന്തള്ളുന്ന പഴങ്ങള്
ആപ്പിൾ, വാഴപ്പഴം, അവക്കാഡോ തുടങ്ങിയ എഫിലീൻ വാതകം പുറന്തള്ളുന്ന പഴങ്ങൾ മറ്റ് പഴങ്ങൾക്കൊപ്പം സൂക്ഷിക്കാതിരിക്കുക.
വായുസഞ്ചാരമുള്ള പാത്രങ്ങൾ
പഴങ്ങൾ പ്ലാസ്റ്റിക് ബാഗുകളിലോ അടച്ച പാത്രങ്ങളിലോ സൂക്ഷിക്കുന്നതിന് പകരം, സൂഷിരങ്ങളുള്ള പാത്രങ്ങൾ ഉപയോഗിക്കുക. ഇവ മെച്ചപ്പെട്ട വായു സഞ്ചാരം സാധ്യമാക്കുകയും ഈർപ്പം അടിഞ്ഞുകൂടുന്നത് കുറയ്ക്കുകയും ചെയ്യും.
നാരങ്ങ
പഴങ്ങൾ സൂക്ഷിക്കുന്നതിന് മുമ്പ്, അല്പ്പം നാരങ്ങാനീര് അവയ്ക്ക് മുകളില് തളിക്കുക. ഇത് ഓക്സീകരണം മന്ദഗതിയിലാക്കാനും അവയുടെ സ്വാഭാവിക നിറം കാത്തുസൂക്ഷിക്കാനും നല്ലതാണ്.
ഓരോന്നും പൊതിഞ്ഞ് വെവ്വേറെ സൂക്ഷിക്കുക
വാഴപ്പഴം, ആപ്പിൾ, പീച്ച് തുടങ്ങിയ പഴങ്ങൾ ഫ്രിഡ്ജിൽ വയ്ക്കുന്നതിന് മുമ്പ് ഓരോന്നും ഓരോ പേപ്പർ ടവലുകളില് പൊതിയുക.
ഫ്രീസ് ചെയ്യുക
സീസണല് പഴങ്ങൾ നന്നായി വൃത്തിയാക്കിയ ശേഷം, കഷ്ണങ്ങളാക്കി മുറിച്ച്, ഒരു ബാഗിലേക്കോ കണ്ടെയ്നറിലേക്കോ മാറ്റി ഫ്രീസറില് സൂക്ഷിക്കാം.