'അമ്മൂമ്മയുടെ കണ്ണട' ട്രെന്റിങ്ങിൽ; ക്യാറ്റ്-ഐ മുതൽ മെറ്റൽ ഫ്രെയിം വരെ തിരിച്ചുവരുന്നു

സ്റ്റൈലിങ്ങിൽ പ്രധാനമാണ് ഇന്ന് കണ്ണടകൾ. വസ്ത്രങ്ങൾക്കൊപ്പം കണ്ണടയുടെ ഫ്രെയിമും ശ്രദ്ധാപൂർവം തിരഞ്ഞെടുക്കുന്ന രീതിയാണ് ഫാഷൻ ലോകത്ത്. 2026ലെ കണ്ണട ട്രെൻഡുകളിലും പഴയകാല ഫാഷന്റെ തിരിച്ചുവരവാണ് ശ്രദ്ധേയമാകുന്നത്.

പഴയകാലത്തെ പകർത്തുന്നതിന് പകരം 1960കളിലെയും 1970കളിലെയും 1990കളിലെയും ഫ്രെയിം ഷേപ്പുകൾ ഭാരം കുറഞ്ഞ മെറ്റീരിയലുകളിലും മൃദുവായ നിറങ്ങളിലുമാണ് ഇപ്പോൾ എത്തുന്നത്. അതിനൊപ്പം പേൾ, റൈൻസ്റ്റോൺ പോലുള്ള ചെറിയ അലങ്കാരങ്ങളും കണ്ണടകളിൽ ഇടം നേടുന്നു.

60കളിലെ ക്യാറ്റ്-ഐ വീണ്ടും

1960കളിൽ ജനപ്രിയമായിരുന്ന ക്യാറ്റ്-ഐ ഫ്രെയിമുകൾ പുതിയ രൂപത്തിൽ തിരിച്ചെത്തുകയാണ്. മുഖത്തിന്റെ വശങ്ങളിലേക്ക് ഉയർന്നുനിൽക്കുന്ന ക്ലാസിക് ഷേപ്പ് നിലനിർത്തിക്കൊണ്ട് ഫ്രെയിമുകൾ കൂടുതൽ ലളിതവും ഭാരം കുറഞ്ഞതുമായാണ് ഇപ്പോൾ എത്തുന്നത്.

വളരെ വിന്റേജ് ലുക്ക് തോന്നിക്കാത്ത തരത്തിൽ മെറ്റൽ, ലൈറ്റ്‌വെയ്റ്റ് മെറ്റീരിയലുകൾ, സോഫ്റ്റ് ടോണുകൾ എന്നിവ ഉപയോഗിക്കുന്നതാണ് പുതിയ രീതി.

വലിയ സ്ക്വയർ ഫ്രെയിമുകളും 2026ലെ ശ്രദ്ധേയമായ ട്രെൻഡുകളിലൊന്നാണ്. എന്നാൽ പഴയകാലത്തെ പോലെ ഭാരമുള്ള ഫ്രെയിമുകൾക്ക് പകരം ഭാരം കുറഞ്ഞ മെറ്റീരിയലുകളാണ് പുതിയ മോഡലുകളിൽ ഉപയോഗിക്കുന്നത്.

മുഖത്ത് കൂടുതൽ ശ്രദ്ധ നേടുന്ന ഓവർസൈസ്ഡ് ഫ്രെയിമുകൾ തന്നെ വേണമെന്നുള്ളവർക്ക് ഇത് പരീക്ഷിക്കാവുന്ന സ്റ്റൈലാണ്. TR90, ടൈറ്റാനിയം പോലുള്ള ഭാരം കുറഞ്ഞ മെറ്റീരിയലുകൾ ഉപയോഗിക്കുന്നതിനാൽ വലിയ ഫ്രെയിമുകൾ ദീർഘനേരം ധരിക്കാനും കൂടുതൽ സൗകര്യപ്രദമാകുന്നു.

വളരെ സ്ലിം ആയ മെറ്റൽ ഫ്രെയിമുകൾക്കും 2026ൽ വീണ്ടും പ്രാധാന്യം ലഭിക്കുന്നുണ്ട്. പ്രത്യേകിച്ച് ഓഫീസ് വെയറിനൊപ്പം ഇത്തരം ഫ്രെയിമുകൾ ഉപയോഗിക്കാം.

ബ്ലേസർ, ഷർട്ട്, സ്ട്രക്ചേർഡ് ഔട്ട്ഫിറ്റ് തുടങ്ങിയവയ്ക്കൊപ്പം സിംപിൾ മെറ്റൽ ഫ്രെയിമുകൾ ചേർത്താൽ വളരെ മിനിമൽ ലുക്ക് ലഭിക്കും. കുറഞ്ഞ സാച്ചുറേഷനുള്ള നിറങ്ങളും കൂൾ-ടോൺ മെറ്റാലിക് ഫിനിഷുകളുമാണ് പുതിയ സ്റ്റൈലിൽ ശ്രദ്ധ നേടുന്നത്.

പേൾ അലങ്കാരങ്ങളുള്ള കണ്ണട ഫ്രെയിമുകൾ ഈ വർഷത്തെ വ്യത്യസ്തമായ ട്രെൻഡുകളിലൊന്നാണ്. റൗണ്ട്, സ്ക്വയർ പോലുള്ള സാധാരണ ഫ്രെയിം ഷേപ്പുകൾക്കൊപ്പം ചെറിയ പേൾ ഡീറ്റെയിലുകൾ ചേർക്കുന്നതാണ് രീതി.

കണ്ണടയിൽ ചെറിയ റൈൻസ്റ്റോൺ ഡീറ്റെയിലുകൾ ചേർക്കുന്നതും പുതിയ ഫാഷൻ ട്രെൻഡിന്റെ ഭാഗമാണ്. ഫ്രെയിമിന്റെ വശങ്ങളിലോ ടെംപിളിലോ ചെറിയ അലങ്കാരങ്ങൾ നൽകിയാണ് കൂടുതൽ സൂക്ഷ്മമായ ലുക്ക് ഒരുക്കുന്നത്. അതുകൊണ്ട് തന്നെ സിംപിൾ വസ്ത്രങ്ങൾക്കൊപ്പവും ഇത്തരം കണ്ണടകൾ ഉപയോഗിക്കാം.

കറുപ്പ്, ടോർട്ടോയ്ഷെൽ തുടങ്ങിയ പരമ്പരാഗത നിറങ്ങൾക്കൊപ്പം 2026ൽ കൂടുതൽ റെട്രോ ടോണുകളും കണ്ണടകളിൽ എത്തുന്നുണ്ട്. കാരമൽ, ആംബർ, ഡീപ് ഗ്രീൻ തുടങ്ങിയ നിറങ്ങൾ ഇതിൽ പ്രധാനമാണ്.

വിന്റേജ് സ്വഭാവമുള്ള നിറങ്ങൾ തന്നെയാണെങ്കിലും പുതിയ ഫ്രെയിമുകളിൽ ഇവ കുറച്ചുകൂടി സോഫ്റ്റ് ആക്കിയാണ് ഉപയോഗിക്കുന്നത്. അതുകൊണ്ട് ദൈനംദിന വസ്ത്രങ്ങളുമായി എളുപ്പത്തിൽ ചേർക്കാനും കഴിയും.

ഈ ട്രെൻഡുകളുടെ പ്രത്യേകത പലതും ഒരേ സമയം വ്യത്യസ്ത അവസരങ്ങളിൽ ഉപയോഗിക്കാം എന്നതാണ്. മിനിമൽ മെറ്റൽ ഫ്രെയിം ഓഫീസ് വെയറിനൊപ്പം ചേരുമ്പോൾ പേൾ അല്ലെങ്കിൽ ചെറിയ അലങ്കാരങ്ങളുള്ള ഫ്രെയിം കാഷ്വൽ ലുക്കിന് കൂടുതൽ വ്യക്തിത്വം നൽകും.