മൈക്കൽ ജാക്സൺ യഥാർഥത്തിൽ മരിച്ചിട്ടുണ്ടോ? ഇന്നും ചർച്ചയാകുന്ന ഗൂഢാലോചനാ സിദ്ധാന്തങ്ങൾ

പോപ്പ് സംഗീത ചരിത്രത്തിലെ ഏറ്റവും വലിയ താരങ്ങളിലൊരാളായ മൈക്കൽ ജാക്സൺന്റെ അപ്രതീക്ഷിത മരണം ഇന്നും ആരാധകർക്കിടയിൽ ചർച്ചയാണ്. 2009 ജൂൺ 25ന് 50ാം വയസ്സിലാണ് ജാക്സൺ മരിച്ചത്.

ഔദ്യോഗിക അന്വേഷണത്തിൽ പ്രൊപ്പോഫോൾ ഉൾപ്പെടെയുള്ള മരുന്നുകളുടെ അമിതപ്രഭാവമാണ് മരണത്തിലേക്ക് നയിച്ചതെന്ന് കണ്ടെത്തിയിരുന്നു. ജാക്സൺന്റെ സ്വകാര്യ ഡോക്ടറായ ഡോ. കോൺറാഡ് മുറെയെ പിന്നീട് മനപ്പുർവ്വമല്ലാത്ത നരഹത്യ കേസിൽ കുറ്റക്കാരനായി കണ്ടെത്തുകയും ചെയ്തു.

എന്നാൽ ഔദ്യോഗിക അന്വേഷണവും കോടതി നടപടികളും കഴിഞ്ഞിട്ടും മൈക്കൽ ജാക്സൺന്റെ മരണവുമായി ബന്ധപ്പെട്ട് പലതരത്തിലുള്ള ഗൂഢാലോചനാ സിദ്ധാന്തങ്ങൾ ഓൺലൈനിലും ആരാധകർക്കിടയിലും പ്രചരിച്ചു. അവയിൽ ചിലത് എന്തൊക്കെയാണ്?

ഏറ്റവുമധികം പ്രചരിച്ച സിദ്ധാന്തങ്ങളിലൊന്ന് ജാക്സൺ യഥാർഥത്തിൽ മരിച്ചിട്ടില്ലെന്നും പൊതുജീവിതത്തിൽനിന്ന് അപ്രത്യക്ഷനാകാനായി മരണം വ്യാജമാക്കിയെന്നുമുള്ളതാണ്.

മരിക്കുന്നതിനു മുൻപ് മൈക്കൽ ജാക്സണെപ്പോലെ വേഷമിട്ട ഒരാളെ അവർ കണ്ടെത്തിയെന്ന തരത്തിലുള്ള വാദങ്ങളും മരണശേഷം വിവിധ സ്ഥലങ്ങളിൽ അദ്ദേഹത്തെ കണ്ടെന്ന തരത്തിലുള്ള സോഷ്യൽ മീഡിയ പോസ്റ്റുകളും ഇതിനിടെ പ്രചരിച്ചിരുന്നു.

എന്നാൽ ഇത്തരം അവകാശവാദങ്ങൾക്ക് വിശ്വസനീയമായ തെളിവുകളില്ല. ജാക്സൺന്റെ അപ്രതീക്ഷിത മരണത്തിന് പിന്നാലെ ഇത്തരം അഭ്യൂഹങ്ങൾ രൂപപ്പെട്ടത് മറ്റ് പ്രശസ്ത സംഗീതജ്ഞരുടെ മരണവുമായി ബന്ധപ്പെട്ട് മുമ്പുണ്ടായിരുന്ന സമാന ഗൂഢാലോചനാ കഥകളെയും ഓർമിപ്പിച്ചിരുന്നു.

മരണത്തിന് മുമ്പ് ലണ്ടനിൽ വലിയ തിരിച്ചുവരവ് സംഗീതപരിപാടികൾക്കായി ജാക്സൺ തയ്യാറെടുക്കുകയായിരുന്നു. പരിപാടികളുടെ വലിയ സമ്മർദത്തിൽനിന്ന് രക്ഷപ്പെടാൻ ജാക്സൺ മരണം വ്യാജമാക്കിയെന്നായിരുന്നു മറ്റൊന്ന്. എന്നാൽ ഇതിന് തെളിവായി ചൂണ്ടിക്കാണിക്കാവുന്ന ഔദ്യോഗിക രേഖകളോ അന്വേഷണഫലങ്ങളോ പുറത്തുവന്നിട്ടില്ല.

ജാക്സൺന്റെ ആഗോള പ്രശസ്തിയും സാമ്പത്തിക ഇടപാടുകളും അദ്ദേഹത്തിന്റെ തിരിച്ചുവരവ് പരിപാടികളും ചൂണ്ടിക്കാട്ടി, മരണത്തിന് പിന്നിൽ ശക്തമായ ചില വ്യക്തികളോ സ്ഥാപനങ്ങളോ ഉണ്ടായിരുന്നുവെന്ന തരത്തിലുള്ള അവകാശവാദങ്ങളും ഉയർന്നു. ഔദ്യോഗിക അന്വേഷണത്തിൽ മരണവുമായി ബന്ധപ്പെട്ട് ഡോക്ടർ കോൺറാഡ് മുറെയുടെ ചികിത്സയും മരുന്നുകളുടെ ഉപയോഗവുമാണ് പ്രധാനമായി പരിശോധിച്ചത്.

മരണത്തെ ചുറ്റിപ്പറ്റിയുള്ള മറ്റൊരു ചർച്ച ജാക്സൺന്റെ അവസാന മണിക്കൂറുകളിൽ ഡോ. കോൺറാഡ് മുറെ സ്വീകരിച്ച നടപടികളെക്കുറിച്ചായിരുന്നു. അന്വേഷണ രേഖകൾ പ്രകാരം ജാക്സൺന് ഉറങ്ങാൻ സഹായിക്കുന്നതിനായി മുറെ വിവിധ മരുന്നുകൾ നൽകിയിരുന്നു. ഒടുവിൽ പ്രൊപ്പോഫോൾ നൽകിയതിന് പിന്നാലെയാണ് ജാക്സൺന് ശ്വാസം നിലച്ചതായി കണ്ടെത്തിയത്. അതിനാൽ അന്വേഷണത്തിൽ മരണം നരഹത്യയായി.

2011ൽ നടന്ന വിചാരണയിൽ മുറെയെ മനഃപൂർവമല്ലാത്ത നരഹത്യ കേസിൽ കുറ്റക്കാരനായി ജൂറി കണ്ടെത്തി. മുറെയുടെ ക്രിമിനൽ അശ്രദ്ധ ജാക്സൺൻ്റെ മരണത്തിൽ പ്രധാന ഘടകമായിരുന്നു എന്നാണ് ജൂറിയുടെ കണ്ടെത്തൽ.

ജാക്സൺന്റെ മരണത്തിന് പിന്നിൽ മുൻകൂട്ടി ആസൂത്രണം ചെയ്ത പദ്ധതി ഉണ്ടായിരുന്നുവെന്ന തരത്തിലുള്ള വാദങ്ങളും വർഷങ്ങളായി പ്രചരിക്കുന്നുണ്ട്. ചില ഗൂഢാലോചനാ സിദ്ധാന്തങ്ങൾ അദ്ദേഹത്തിന്റെ കരിയർ, സാമ്പത്തിക പ്രശ്നങ്ങൾ, തിരിച്ചുവരവ് പരിപാടികൾ തുടങ്ങിയ വിവിധ സംഭവങ്ങളെ തമ്മിൽ ബന്ധിപ്പിച്ചാണ് ഇത്തരം നിഗമനങ്ങളിലേക്ക് എത്തുന്നത്.