വർഷങ്ങളായി മെത്ത വൃത്തിയാക്കിയിട്ടില്ലേ? പൊടിയും കറയും നീക്കാൻ എളുപ്പവഴികൾ

കിടക്കവിരിയും തലയിണ കവറുമൊക്കെ പതിവായി കഴുകുന്നവരാണ് മിക്കവരും. എന്നാൽ മെത്ത എപ്പോഴാണ് അവസാനമായി വൃത്തിയാക്കിയത്? ശരീരവുമായി സമ്പർക്കം പുലർത്തുന്ന മെത്തയിൽ കാലക്രമേണ പൊടി, മുടി, വിയർപ്പ്, ശരീരത്തിലെ എണ്ണമയം, ചർമത്തിലെ മൃതകോശങ്ങൾ, ഭക്ഷണത്തിന്റെ അവശിഷ്ടങ്ങൾ, എന്നിവ അടിഞ്ഞുകൂടാം.

മെത്ത വൃത്തിയാക്കുമ്പോൾ ആവശ്യത്തിലധികം വെള്ളമോ ക്ലീനിങ് ലായനിയോ ഉപയോഗിച്ച് മെത്ത നനയ്ക്കുന്നത് അതിന്റെ ഉള്ളിലെ മെറ്റീരിയലുകൾക്ക് കേടുപാടുണ്ടാക്കാനും പിന്നീട് പൂപ്പൽ ഉണ്ടാകാനും കാരണമാകാം. അതിനാൽ വൃത്തിയാക്കുമ്പോൾ ആദ്യം പരിഗണിക്കേണ്ടത് ഡ്രൈ ക്ലീനിങ് രീതികളാണ്.

മെത്ത വൃത്തിയാക്കുന്നതിന് മുമ്പ് ബെഡ്ഷീറ്റ്, ബ്ലാങ്കറ്റ്, മെത്തയുടെ കവചം എന്നിവ മാറ്റുക. ശേഷം വാക്വം ക്ലീനറിന്റെ അപ്ഹോൾസ്റ്ററി അറ്റാച്ച്മെന്റ് ഉപയോഗിച്ച് മെത്തയുടെ മുഴുവൻ ഭാഗവും വൃത്തിയാക്കാം. മെത്തയുടെ തുന്നലുകൾ, അരികുകൾ, മടക്കുകൾ തുടങ്ങിയ ഭാഗങ്ങളിൽ കൂടുതൽ പൊടിയും മുടിയും അടിഞ്ഞുകൂടാൻ സാധ്യതയുള്ളതിനാൽ പ്രത്യേകം ശ്രദ്ധിക്കണം.

മെത്തയിൽ കറയുള്ള ഭാഗം മാത്രം വൃത്തിയാക്കുന്നതാണ് സുരക്ഷിതമായ രീതി. ചെറിയ അളവിൽ വീര്യം കുറഞ്ഞ ഡിഷ് സോപ്പും വെള്ളവും ഉപയോഗിക്കാം. ചില കറകൾക്ക് ഹൈഡ്രജൻ പെറോക്സൈഡും ബേക്കിങ് സോഡയും ഉപയോഗിക്കാമെന്ന് വിദഗ്ധർ നിർദേശിക്കുന്നു.

എന്നാൽ ലായനി നേരിട്ട് ധാരാളമായി ഒഴിക്കരുത്. വൃത്തിയുള്ള തുണിയിൽ ചെറിയ അളവിൽ ലായനി എടുത്ത് കറയുള്ള ഭാഗത്ത് പതുക്കെ തട്ടിക്കൊടുക്കുന്നതാണ് നല്ലത്. തുടർന്ന് നനഞ്ഞ വൃത്തിയുള്ള തുണികൊണ്ടും പിന്നീട് ഉണങ്ങിയ തുണികൊണ്ടും അധിക ഈർപ്പം നീക്കം ചെയ്യാം.

മെത്തയ്ക്ക് ആഴത്തിലുള്ള ക്ലീനിങ് ആവശ്യമുണ്ടെങ്കിൽ സ്റ്റീം ക്ലീനർ അല്ലെങ്കിൽ അപ്ഹോൾസ്റ്ററി ക്ലീനർ ഉപയോഗിക്കാം. സ്റ്റീം ക്ലീനർ ഉപയോഗിച്ചാൽ മെത്ത പൂർണമായി ഉണങ്ങിയതിന് ശേഷമേ ബെഡ്ഷീറ്റും മറ്റും തിരിച്ചിടാവൂ.

മെത്ത നന്നായി ഉണങ്ങുന്നത് ക്ലീനിങ്ങിനേക്കാൾ പ്രധാനപ്പെട്ട കാര്യമാണ്. ഉള്ളിൽ ഈർപ്പം ബാക്കിയായിരിക്കെ ബെഡ്ഷീറ്റ് വിരിച്ചാൽ പൂപ്പലും ദുർഗന്ധവും ഉണ്ടാകാനുള്ള സാധ്യതയുണ്ട്.

ഡീപ് ക്ലീനിങ്ങിന് ശേഷം മെത്ത പൂർണമായി ഉണങ്ങാൻ 12 മുതൽ 24 മണിക്കൂർ വരെ എടുത്തേക്കാം. മുറിയിൽ നല്ല വായുസഞ്ചാരം ഉറപ്പാക്കുകയും ജനലുകൾ തുറന്നിടുകയോ ഫാൻ ഉപയോഗിക്കുകയോ ചെയ്യുന്നത് ഉണങ്ങാൻ സഹായിക്കും.

മെത്തയിൽ എന്തെങ്കിലും ദ്രാവകം വീണാൽ ദിവസങ്ങൾ കഴിഞ്ഞ് വൃത്തിയാക്കുന്നതിനേക്കാൾ ഉടൻ തന്നെ കറ നീക്കം ചെയ്യുന്നതാണ് നല്ലത്. ആദ്യം അധികമുള്ള ദ്രാവകം വൃത്തിയുള്ള തുണികൊണ്ട് ഒപ്പിയെടുക്കുക. പിന്നീട് ആവശ്യമായ രീതിയിൽ സ്പോട്ട് ക്ലീൻ ചെയ്യാം.

മെത്ത നേരിട്ട് വൃത്തിയാക്കുന്നതിനെക്കാൾ അത് അഴുക്കാകാതെ സൂക്ഷിക്കുന്നതാണ് എളുപ്പം. വാട്ടർ റെസിസ്റ്റന്റ് മെത്ത പ്രൊട്ടക്ടർ ഉപയോഗിക്കുകയും അത് ഇടയ്ക്കിടെ കഴുകുകയും ചെയ്യാം. ബെഡ്ഷീറ്റുകൾ പതിവായി മാറ്റുന്നതും മെത്തയിൽ ഭക്ഷണം കഴിക്കുന്നത് ഒഴിവാക്കുന്നതും പൊടിയും കറയും കുറയ്ക്കാൻ സഹായിക്കും.