സമകാലിക മലയാളം ഡെസ്ക്
വളർത്തുമൃഗങ്ങളുമായി യാത്ര പോകുമ്പോൾ ഭക്ഷണവും വെള്ളവും നൽകുന്നത് പലപ്പോഴും വലിയ ബുദ്ധിമുട്ടാകാം. വീട്ടിൽ ഉപയോഗിക്കുന്ന വലിയ പാത്രങ്ങളും ഭക്ഷണപ്പൊതികളും യാത്രയിൽ കൊണ്ടുപോകുന്നത് പ്രായോഗികമല്ല. എന്നാൽ യാത്രയ്ക്കായി പ്രത്യേകം ലഭിക്കുന്ന ചില ചെറിയ ഉപകരണങ്ങൾ ഈ ബുദ്ധിമുട്ട് കുറയ്ക്കും.
യാത്രയ്ക്കിടെ വളർത്തുമൃഗങ്ങൾക്ക് ഭക്ഷണവും വെള്ളവും നൽകുന്നത് കൂടുതൽ എളുപ്പമാക്കാൻ സഹായിക്കുന്ന പെറ്റ് ഫീഡിങ് എസൻഷ്യൽസ് പരിചയപ്പെടാം.
യാത്രയിൽ ഏറ്റവും എളുപ്പത്തിൽ കൊണ്ടുപോകാവുന്ന ഒന്നാണ് കൊളാപ്സിബിൾ ഫീഡിങ് ബൗൾ. ഉപയോഗിക്കാത്തപ്പോൾ മടക്കി ചെറുതാക്കാൻ കഴിയുന്നതിനാൽ ബാഗിൽ അധികം സ്ഥലം എടുക്കില്ല. യാത്രയ്ക്കിടയിൽ ഭക്ഷണമോ വെള്ളമോ നൽകാനും ഇത് ഉപയോഗിക്കാം.
യാത്രയ്ക്കിടെ വളർത്തുമൃഗങ്ങൾക്ക് വെള്ളം നൽകാൻ പ്രത്യേകമായി രൂപകൽപ്പന ചെയ്ത ബോട്ടിലുകൾ ലഭ്യമാണ്. ഒരു ഭാഗത്ത് വെള്ളം സൂക്ഷിക്കാനും മറ്റേ ഭാഗത്ത് മൃഗത്തിന് നേരിട്ട് കുടിക്കാനും കഴിയുന്ന രീതിയിലാണ് ഇവയുടെ രൂപകൽപ്പന. നടക്കാനോ യാത്രയ്ക്കോ പോകുമ്പോൾ ഏറെ സൗകര്യപ്രദമാണ്.
ഭക്ഷണം ഈർപ്പം കയറാതെ സൂക്ഷിക്കാൻ എയർടൈറ്റ് കണ്ടെയ്നറുകൾ ഉപയോഗിക്കാം. വളർത്തുമൃഗങ്ങളുടെ ഭക്ഷണവും ട്രീറ്റുകളും പ്രത്യേകം കൊണ്ടുപോകാൻ ഇത് സഹായിക്കും. യാത്രയ്ക്കിടെ ഭക്ഷണം ചിതറിപ്പോകുന്നതും ഈർപ്പം കയറുന്നതും ഒഴിവാക്കാം.
ഭക്ഷണത്തിനും വെള്ളത്തിനുമായി പ്രത്യേകം ഭാഗങ്ങളുള്ള ഡബിൾ ബൗളുകളും യാത്രയ്ക്ക് ഉപയോഗിക്കാം. ഒരേ പാത്രത്തിൽ ഭക്ഷണവും വെള്ളവും ക്രമമായി നൽകാൻ കഴിയുന്നതിനാൽ ബാഗിൽ കൊണ്ടുപോകേണ്ട സാധനങ്ങളുടെ എണ്ണം കുറയ്ക്കാനും ഇത് സഹായിക്കും.
നടത്തത്തിനിടയിലോ പരിശീലനത്തിനിടയിലോ വളർത്തുമൃഗത്തിന് ട്രീറ്റ് നൽകേണ്ടി വരുമ്പോൾ പ്രത്യേകം പൗച്ച് ഉപയോഗിക്കാം. ട്രീറ്റുകൾ എളുപ്പത്തിൽ കൈയ്യെത്തും ദൂരത്ത് സൂക്ഷിക്കാൻ കഴിയുന്നതാണ് ഇതിന്റെ പ്രധാന സൗകര്യം.
യാത്രയ്ക്കിടെ ഭക്ഷണം നൽകുമ്പോൾ ഭക്ഷണാവശിഷ്ടങ്ങളും വെള്ളവും ചുറ്റും വീഴുന്നത് സാധാരണമാണ്. ബൗളിന് താഴെ ഒരു ഫീഡിങ് മാറ്റ് വിരിച്ചാൽ പരിസരം വൃത്തിയായി സൂക്ഷിക്കാൻ സഹായിക്കും. വീട്ടിന് പുറത്തുള്ള സ്ഥലങ്ങളിലും ഭക്ഷണം നൽകുന്നത് കൂടുതൽ സൗകര്യപ്രദമാക്കാം.
പതിവായി മരുന്ന് കഴിക്കേണ്ട വളർത്തുമൃഗങ്ങളുണ്ടെങ്കിൽ യാത്രയ്ക്കിടെ മരുന്ന് നൽകുന്നതും ശ്രദ്ധിക്കണം. ഗുളികകളോ ലിക്വിഡ് മരുന്നുകളോ നൽകാൻ സഹായിക്കുന്ന പിൽ ഡിസ്പെൻസർ കിറ്റുകൾ ഇതിനായി ഉപയോഗിക്കാം. എന്നാൽ മരുന്നിന്റെ അളവും ഉപയോഗരീതിയും മൃഗഡോക്ടറുടെ നിർദേശപ്രകാരം തന്നെയായിരിക്കണം.
ചെറിയ നായ്ക്കുട്ടികൾക്കും പൂച്ചക്കുട്ടികൾക്കും യാത്രയ്ക്കിടെ ഭക്ഷണം നൽകാൻ പ്രത്യേക ഫീഡിങ് ബോട്ടിൽ കിറ്റുകൾ ഉപയോഗിക്കാം. പ്രായം കുറഞ്ഞ മൃഗങ്ങൾക്ക് ഭക്ഷണം നൽകുന്നത് കൂടുതൽ എളുപ്പമാക്കാൻ ഇത്തരം കിറ്റുകൾ സഹായിക്കും.
വളർത്തുമൃഗങ്ങളുമായി യാത്ര പോകുമ്പോൾ ഭക്ഷണം, വെള്ളം, ആവശ്യമായ മരുന്നുകൾ എന്നിവയ്ക്ക് പുറമെ അവയുടെ പതിവ് ഭക്ഷണക്രമവും പരമാവധി പാലിക്കാൻ ശ്രമിക്കാം. ദീർഘയാത്രയാണെങ്കിൽ ഇടയ്ക്കിടെ വെള്ളം നൽകാനും വിശ്രമിക്കാനുള്ള അവസരം ഒരുക്കാനും ശ്രദ്ധിക്കണം.