നിറം മാറിയാൽ പോഷകമൂല്യം മാറും, അരി വെറൈറ്റികൾ

നമ്മള്‍ മലയാളികള്‍ക്ക് അരി വെറുമൊരു ധാന്യമല്ല. അത് നമ്മുടെ ജീവിതരീതിയുടെ ഭാഗമാണ്. അരിയാഹാരമില്ലാതെ മലയാളികള്‍ക്ക് ഒരു ദിവസം പൂര്‍ണമാകില്ല. 

ഏഷ്യന്‍ രാജ്യങ്ങളില്‍ അരി ഒരു പ്രധാന ഭക്ഷണമാണ്. ഓരോ പ്രദേശത്തെയും കാലാവസ്ഥയെയും മണ്ണിനും അനുസരിച്ച് പലതരത്തിലുള്ള നെല്ലു കൃഷി ചെയ്യുന്നുണ്ട്. 

വ്യത്യസ്ത നിറത്തിനും വലിപ്പത്തിലും ഘടനയിലും പലതരത്തിലുള്ള അരി ലഭ്യമാണ്. പോഷകമൂല്യത്തിന്‍റെ അടിസ്ഥാനത്തില്‍ കുറച്ച് അരി വെറൈറ്റികള്‍ ഇതാ:

ബ്രൗണ്‍ റൈസ്

വിറ്റാമിനുകളും ധാതുക്കളും അടങ്ങിയ തവിട് അല്ലെങ്കിൽ പുറം പാളിയോടു കൂടിയതാണ് ചുവന്ന അരി (ബ്രൗണ്‍ റൈസ്). ബ്രൗണ്‍ റൈസില്‍ ഗ്ലൈസെമിക് സൂചിക വളരെ കുറവാണ്. പ്രമേഹ രോഗികള്‍ക്ക് മികച്ചതാണ്.

ബ്ലാക്ക് റൈസ്/കറുത്ത അരി

കറുപ്പും പര്‍പ്പിള്‍ നിറത്തിലും ലഭ്യമാകുന്ന ബ്ലാക്ക് റൈസിന് ആ നിറം നല്‍കുന്നത് ആന്തോസയാനിൻ എന്ന സംയുക്തമാണ്. ആന്തോസയാനിൻ രക്തത്തിലെ ഗ്ലൂക്കോസിന്റെയും ലിപിഡിന്റെയും അളവ് മെച്ചപ്പെടുത്തുന്നതിനും ഹൃദയാരോഗ്യം മെച്ചപ്പെടുത്താനും സഹായിക്കും.

റെഡ് റൈസ്

ബസുമതി അരിക്ക് സമാനമായ രുചിയും മണവുമാണ് റെഡ് റൈസിനുള്ളത്. റെഡ് റൈസില്‍ ആന്തോസയാനിനുകളുടെ അളവു കൂടുതലാണ്. അതുകൊണ്ട് തന്നെ ഹൃദയാരോഗ്യത്തിനും രക്തത്തിലെ പഞ്ചസാരയുടെ അളവു ക്രമീകരിക്കുന്നതിനും ഇത് മികച്ചതാണ്.

വൈൽഡ് റൈസ്

അക്വട്ടിക് ​ഗ്രാസിന്റെ വിത്താണ് കാട്ടു നെല്ല്. മറ്റ് അരികളെ അപേക്ഷിച്ച് ഇതിൽ പ്രോട്ടീനും കൊഴുപ്പും കുറവാണ്. വെള്ള, ചുവന്ന അരിയെ അപേക്ഷിച്ച് വൈല്‍ഡ് റൈസില്‍ പ്രതിരോധശേഷിയുള്ള അന്നജത്തിന്റെ അളവ് കൂടുതലാണ്. ദഹിക്കാവുന്ന അന്നജം പ്രതിരോധശേഷിയുള്ള അന്നജത്തേക്കാൾ ഗ്ലൂക്കോസിന്റെ അളവ് വർധിപ്പിക്കുമെന്ന് പഠനങ്ങള്‍ പറയുന്നു. 

വൈറ്റ് റൈസ്

ബ്രൗണ്‍ റൈസ് അഥവാ തവിടോടു കൂടിയ അരിയുടെ തവിട് കളഞ്ഞ് പ്രോസസ് ചെയ്തെടുക്കുന്നതാണ് വെളുത്ത അരി. ഈ പ്രക്രിയ അരിയുടെ വിറ്റാമിനുകളുടെയും ധാതുക്കളുടെയും അളവ് കുറയ്ക്കുന്നു. വെളുത്ത അരിയിൽ നാരുകൾ കുറവും ഗ്ലൈസെമിക് സൂചിക ഉയർന്നതുമാണ്. ഇത് പ്രമേഹ രോഗികള്‍ക്ക് അനുയോജ്യമല്ല.