വേനൽച്ചൂടിനെ തുരത്താൻ ഇതാ ശരീരം തണുപ്പിക്കും പ്രഭാത ഭക്ഷണങ്ങൾ

വേനൽ കടുക്കുന്നതോടെ നമ്മുടെ ഭക്ഷണരീതിയിലും മാറ്റങ്ങൾ വരുത്തേണ്ടത് അത്യാവശ്യമാണ്.

രാവിലെ കഴിക്കുന്ന ആഹാരം ആ ദിവസം മുഴുവൻ നമ്മുടെ ശരീരത്തിന്റെ ഊർജ്ജ നിലയെയും താപനിലയെയും സ്വാധീനിക്കും.

ലഘുവായതും ശരീരത്തിന് കുളിർമ നൽകുന്നതുമായ ചില പ്രഭാതഭക്ഷണങ്ങൾ പരിചയപ്പെടാം.

തൈരും പഴങ്ങളും ചിയാ സീഡും

തൈര് പ്രകൃതിദത്തമായ ഒരു കൂളന്റാണ്. ഇത് ദഹനത്തിന് സഹായിക്കുകയും കുടലിന്റെ ആരോഗ്യം നിലനിർത്തുകയും ചെയ്യുന്നു. തണ്ണിമത്തൻ, പപ്പായ അല്ലെങ്കിൽ മാമ്പഴം പോലുള്ള സീസണൽ പഴങ്ങൾ നാരുകൾ ലഭിക്കുന്നതിനായി ചിയാ വിത്തുകൾ കൂടി ചേർത്ത് കഴിക്കാം.

പൊഹ

ദഹിക്കാൻ എളുപ്പമുള്ളതും വയറിന് ഭാരമില്ലാത്തതുമായ ഭക്ഷണമാണ് അവൽ. പയർ വർഗ്ഗങ്ങൾ, കാരറ്റ്, ക്യാപ്സിക്കം എന്നിവ ചേർത്ത് ഇത് പോഷകസമൃദ്ധമാക്കാം. കുറച്ച് നാരങ്ങാനീര് കൂടി ചേർക്കുന്നത് രുചി വർദ്ധിപ്പിക്കുക മാത്രമല്ല വിറ്റാമിൻ സി ലഭിക്കാനും സഹായിക്കും.

സ്മൂത്തി ബൗളുകൾ

പഴങ്ങൾ, പാൽ അല്ലെങ്കിൽ തൈര് എന്നിവ ചേർത്ത് അടിച്ചുണ്ടാക്കുന്ന സ്മൂത്തികൾ വേനൽക്കാലത്ത് ഏറെ അനുയോജ്യമാണ്. ഇതിന് മുകളിൽ അല്പം ഡ്രൈ ഫ്രൂട്ട്‌സ്, വിത്തുകൾ, ഗ്രനോള എന്നിവ കൂടി ചേർത്താൽ നല്ലൊരു ഹെൽത്തി ബ്രേക്ക്ഫാസ്റ്റ് തയ്യാറായി.

ഇളനീരും വെജിറ്റബിൾ സാൻഡ്‌വിച്ചും

ശരീരത്തിന് പെട്ടെന്ന് ജലാംശം നൽകാൻ ഇളനീരിനോളം നല്ലൊരു പാനീയം വേറെയില്ല. ഇതോടൊപ്പം വെള്ളരിക്ക, പുതിന ചട്ണി എന്നിവ ചേർത്ത ഹോൾ ഗ്രെയ്ൻ ബ്രഡ് സാൻഡ്‌വിച്ച് കൂടി കഴിച്ചാൽ ലഘുവായതും സന്തുലിതവുമായ ഭക്ഷണമായി.

മോരും ഓട്സും

പാലിന് പകരം മോര് ഉപയോഗിച്ച് ഓട്സ് തയ്യാറാക്കുന്നത് വേനൽക്കാലത്ത് ശരീരത്തിന് വളരെ നല്ലതാണ്. ഇതിലേക്ക് വറുത്ത ജീരകപ്പൊടി, മല്ലിയില, അല്പം ഉപ്പ് എന്നിവ കൂടി ചേർത്താൽ രുചികരമായ ഒരു വിഭവം ലഭിക്കും. ദഹനപ്രശ്നങ്ങൾ ഒഴിവാക്കാനും ശരീരത്തെ തണുപ്പിക്കാനും ഈ കൂട്ടുക്കെട്ട് സഹായിക്കും.