മനോഹരമായ പുരികത്തിന് ഇതാ ചില ടിപ്സുകൾ

ഒരു കാലത്ത് നേർത്ത പുരികമായിരുന്നു ഫാഷൻ എങ്കിൽ ഇന്ന് അങ്ങനെയല്ല കട്ടിയുള്ള പുരികമാണ് താരം.

പുരികത്തിന് കട്ടി ഇല്ലെങ്കിൽ കട്ടിയായി തോന്നുന്ന രീതിയിൽ പുരികം എഴുതുകയാണ് പലരും ചെയ്യുന്നത്. എന്നാൽ എപ്പോഴും പുരികങ്ങൾ ഇങ്ങനെ കട്ടിയോടെ എഴുതാൻ കഴിഞ്ഞെന്ന് വരില്ല.

നിങ്ങളുടെ പുരികങ്ങൾ എളുപ്പത്തിൽ വളരാൻ സഹായിക്കുന്ന ചില ലളിതമായ പൊടിക്കൈകൾ പറഞ്ഞു തരാം.

ഓയിൽ മസ്സാജ്

ആവണക്കെണ്ണ, ഒലിവ് എണ്ണ, വെളിച്ചെണ്ണ അല്ലെങ്കിൽ ബദാം എണ്ണ - ഇവയിൽ ഏതെങ്കിലും എണ്ണ ഉപയോഗിച്ച് പതിവായി പുരികം മസാജ് ചെയ്യുക. കുറച്ച് കാലം കഴിയുമ്പോൾ തന്നെ വ്യത്യാസം കണ്ടു തുടങ്ങും.

കറ്റാർ വാഴ

വെളിച്ചെണ്ണയിൽ കറ്റാർ വാഴ ചേർത്ത് പുരികത്തിൽ പുരട്ടുന്നത് കൊഴിയുന്നത് തടയാനും രോമം കട്ടിയോടെ വളരാനും സഹായിക്കും. കൂടാതെ പുരികത്തിലെ താരൻ അകറ്റാനും ഇത് മികച്ച പ്രതിവിധിയാണ്.

ഉള്ളി നീര്

പുരികങ്ങൾക്ക് കട്ടി കൂട്ടാനും സവാള നീര് ഉപയോഗിക്കാം. സവാള അരച്ച് അതിന്റെ നീരെടുത്ത് പുരികത്തിൽ പുരട്ടി ഉണങ്ങിയ ശേഷം കഴുകി വൃത്തിയാക്കാം.

മുട്ടയുടെ വെള്ള

മുട്ടയുടെ വെള്ള നന്നായി അടിച്ച് ഇത് ഏകദേശം 20 മിനിറ്റ് നേരം പുരികങ്ങളിൽ പുരട്ടി വയ്ക്കുക. അതിന് ശേഷം തണുത്ത വെള്ളത്തിൽ കഴുകി വൃത്തിയാക്കാം.

പെട്രോളിയം ജെല്ലി

പുരികത്തിന്റെ ചുറ്റുമുള്ള ഭാഗങ്ങളിൽ ഈർപ്പം നിലനിർത്താനും രോമ വളർച്ച മെച്ചപ്പെടുത്താനും പെട്രോളിയം ജെല്ലി ദിവസത്തിൽ രണ്ടോ മൂന്നോ തവണ പുരട്ടാം.