ചുണ്ടിലെ കറുപ്പ് ആത്മവിശ്വാസം തകർക്കുന്നുണ്ടോ? പരിഹാരം ഇതാ

ചുണ്ട് പഴയത് പോലെ നിറമില്ലെന്ന് തോന്നുന്നുണ്ടോ? ഉണ്ടെങ്കിൽ കാരണം പലതാവാം.

ജനിതകമായുള്ള കറുപ്പല്ലെങ്കിൽ ആരോഗ്യം, ഭക്ഷണക്രമം, ലിപ്സ്റ്റിക്ക് എന്നിവ നമ്മുടെ ചുണ്ടിന്റെ സ്വാഭാവിക നിറത്തെ ഇല്ലാതാക്കാം.

ചുണ്ടുകളെ സംരക്ഷിക്കാനുള്ള പ്രകൃതിദത്ത പരിഹാരം നമ്മുടെ അടുക്കളയിൽ തന്നെയുണ്ട്.

നാരങ്ങ

പകുതി നാരങ്ങ പിഴിഞ്ഞ് ആ നീര് ദിവസവും ചുണ്ടിൽ പുരട്ടാം അല്ലെങ്കിൽ ഒരു കഷ്ണം നാരങ്ങ എടുത്ത് മുകളിൽ അൽപം പഞ്ചസാര വിതറിയും ചുണ്ടിൽ പുരട്ടാം. ഇത് ചർമം പുഷ്ടിപ്പെടാനും മൃതകോശങ്ങളെ നീക്കം ചെയ്യാനും സഹായിക്കും.

റോസ് വാട്ടർ

റോസ് വാട്ടർ ചുണ്ട് മോയ്സ്ചറൈസ് ചെയ്യാൻ സഹായിക്കും. ഒരു തുള്ളി റോസ് വാട്ടർ ഒരു ടീസ്പൂൺ തേനിൽ കലർത്തി ചുണ്ടുകളിൽ പുരട്ടുക. ദിവസത്തിൽ രണ്ടോ മൂന്നോ തവണ ഇത് ചെയ്യാം. തേനിന് പകരം പാലും ഉപയോഗിക്കാം.

മാതളനാരങ്ങ

ഒരു ടേബിൾസ്പൂൺ മാതളനാരങ്ങ നീര്, ബീറ്റ്റൂട്ട് നീര്, കാരറ്റ് ജ്യൂസ് എന്നിവ യോജിപ്പിക്കുക. ഈ മിശ്രിതം ചുണ്ടുകളിൽ 15 മിനിട്ടെങ്കിലും തേച്ചു പിടിപ്പിക്കുക. ദിവസവും ചെയ്യാവുന്ന മികച്ച ഫലം ചെയ്യുന്ന മിശ്രിതമാണിത്.

മഞ്ഞൾ

മഞ്ഞളിൽ കുർക്കുമിൻ അടങ്ങിയിട്ടുണ്ട്. ഇത് മെലാനിൻ ഉൽപാദനത്തെ തടയും. ഇത് ചർമത്തിന് തിളക്കം നൽകാൻ സഹായിക്കുന്നു. പാലും മഞ്ഞളും ചേർത്ത് പേസ്റ്റ് രൂപത്തിലാക്കി ചുണ്ടിൽ പുരട്ടുക. 5–10 മിനിട്ടിന് ശേഷം കഴുകി കളയാം. ഉണങ്ങിയ ശേഷം ലിപ് ബാം പുരട്ടാം.

സ്ട്രോബെറി മാസ്ക്

ഒരു ടീസ്പൂൺ ബേക്കിങ് സോഡയിൽ കുറച്ച് സ്ട്രോബെറി മിക്സ് ചെയ്യാം. ഇത് പേസ്റ്റ് രൂപത്തിലാക്കി ഉറങ്ങുന്നതിനുമുമ്പ് ചുണ്ടിൽ പുരട്ടുക. നിങ്ങളുടെ ചുണ്ടുകളുടെ ഇരുണ്ട നിറം ലഘൂകരിക്കാൻ ഈ മാസ്ക് സഹായിക്കും.