ഒരു ദിവസം എത്ര അളവിൽ ഉപ്പ് ഉപയോ​ഗിക്കാം?

ഉപ്പില്ലാതെ ഭക്ഷണത്തിന് യാതൊരു രുചിയുമുണ്ടാകില്ല. എന്നാൽ അമിതമായാൽ ആരോ​ഗ്യത്തിന് അപകടവുമാകാം. ദിവസവും ആരോ​ഗ്യത്തിന് ആവശ്യമായ ഉപ്പിന് ഒരു കണക്കുണ്ട്.

നമ്മുടെ അടുക്കളയിൽ പലപ്പോഴും ഉപ്പിനും മസാലകൾക്കുമൊക്കെ കൈക്കണക്കാണ് കൂടുതലും. ഐസിഎംആർ അടുത്തിടെ പുറത്തിറക്കിയ മാർ​ഗനിർദേശ പ്രകാരം, ഭക്ഷണങ്ങളിൽ ഉപ്പിന്റ അളവു ഒരു ദിവസം 5 ​ഗ്രാമിൽ കൂടാൻ പാടില്ല.

ഉയർന്ന രക്തസമ്മർദം

ഉപ്പ് അമിതമായി കഴിക്കുന്നത് ഉയർന്ന രക്തസമ്മർദത്തിന് കാരണമാകും. ഇത് ഹൃദ്രോഗം, സ്ട്രോക്ക്, വൃക്ക പ്രശ്നങ്ങൾ എന്നിവയ്ക്കുള്ള പ്രധാന അപകട ഘടകമാണ്.

നീർക്കെട്ട്

അമിതമായി ഉപ്പ് കഴിക്കുന്നത് കൈകൾ, കാലുകൾ, കണങ്കാൽ എന്നിവിടങ്ങളിൽ നീർക്കെട്ട് വരുന്നതിലേക്ക് നയിക്കാം.

അമിത ദാഹം

ഉപ്പ് അമിതമായി കഴിക്കുന്നത് അമിത ദാഹം ഉണ്ടാക്കും. കാരണം, ശരീരം അധിക സോഡിയത്തെ നേർപ്പിക്കാൻ കോശങ്ങളിൽ നിന്നും രക്തപ്രവാഹത്തിലേക്ക് വെള്ളം വലിച്ചെടുക്കുന്നു. ഇത് അമിത ദാഹത്തിന് ഇടയാക്കും.

വൃക്ക പ്രശ്നങ്ങൾ

അമിത ഉപ്പ് ഉപയോഗം വൃക്കകളെ ബാധിക്കാം. ഇത് രക്തത്തിൽ നിന്ന് അധിക സോഡിയം ഫിൽട്ടർ ചെയ്യുന്നത് തടസപ്പെടുത്തുന്നു. ക്രമേണ, ഇത് വൃക്കകളുടെ പ്രവർത്തനം തകരാറിലാക്കും.

ക്രമരഹിതമായ ഹൃദയമിടിപ്പ്

ഉയർന്ന ഉപ്പ് കഴിക്കുന്നത് ശരീരത്തിലെ സോഡിയം, പൊട്ടാസ്യം തുടങ്ങിയ ഇലക്ട്രോലൈറ്റുകളുടെ സന്തുലിതാവസ്ഥയെ തടസ്സപ്പെടുത്തും. ഈ അസന്തുലിതാവസ്ഥ ക്രമരഹിതമായ ഹൃദയമിടിപ്പിലേക്ക് നയിച്ചേക്കാം.

ഇടയ്ക്കിടെ തലവേദന

ഉപ്പ് അമിതമായി കഴിക്കുന്നത് നിർജ്ജലീകരണത്തിനും രക്തപ്രവാഹത്തിലെ മാറ്റത്തിനും കാരണമാകും. ഇത് ചിലരിൽ തലവേദനയോ മൈഗ്രേയ്നോ ഉണ്ടാക്കാം.