30,000 രൂപ ശമ്പളത്തിൽ നിന്നും എത്ര നിക്ഷേപിക്കണം എത്ര ചെലവിടണം? പണം തീരാതെ ജീവിക്കാൻ 50-30-20 നിയമം

മാസശമ്പളം ₹30,000. വാടക, ഭക്ഷണം, യാത്ര, ബില്ലുകൾ, ഷോപ്പിങ് തുടങ്ങി ചെലവുകൾ പലതുമുണ്ട്. മാസാവസാനം എത്തുമ്പോഴേക്കും ശമ്പളം തീരുന്ന അവസ്ഥയാണെങ്കിൽ, ശമ്പളം എങ്ങനെ വിഭജിച്ച് ചെലവഴിക്കണം എന്നതിന് ലളിതമായൊരു മാർഗമാണ് 50-30-20 നിയമം.

ഈ രീതിയനുസരിച്ച് ₹30,000 ശമ്പളത്തെ അത്യാവശ്യ ചെലവുകൾ, സമ്പാദ്യം-നിക്ഷേപം, ആഗ്രഹങ്ങൾ എന്നിങ്ങനെ മൂന്ന് വിഭാഗങ്ങളായി തിരിക്കാം.

₹30,000 ശമ്പളത്തിന്റെ പകുതി, അതായത് ₹15,000, നിർബന്ധമായും വേണ്ട ചെലവുകൾക്കായി മാറ്റിവയ്ക്കാം.

വാടക, ഭക്ഷണം, വൈദ്യുതി, വെള്ളം തുടങ്ങിയ ബില്ലുകൾ, യാത്രാ ചെലവ്, മൊബൈൽ/ഇന്റർനെറ്റ്, മരുന്നുകൾ പോലുള്ള അവശ്യച്ചെലവുകൾ, വായ്പയുടെ നിർബന്ധിത തിരിച്ചടവ് എന്നിവ ഇതിൽ ഉൾപ്പെടും.

ശമ്പളത്തിൽ നിന്ന് ₹9,000 സമ്പാദ്യത്തിനും നിക്ഷേപത്തിനുമായി മാറ്റിവയ്ക്കുന്നതാണ് ഈ രീതിയിലെ പ്രധാന നിർദേശം. ഈ തുക മുഴുവൻ ഒരേ നിക്ഷേപത്തിൽ ഇടുന്നതിന് പകരം സാമ്പത്തിക ലക്ഷ്യങ്ങൾക്കനുസരിച്ച് വിഭജിക്കാം.

അടിയന്തര ഫണ്ട്, ദീർഘകാല സമ്പാദ്യം, വിരമിക്കലിനു ശേഷമുള്ള പദ്ധതിക്കായുള്ള ഫണ്ട് തുടങ്ങിയവക്കായി നിക്ഷേപിക്കാം.

ജീവിതത്തിൽ ആവശ്യങ്ങൾ മാത്രമല്ല, ആഗ്രഹങ്ങൾക്കും സ്ഥാനമുണ്ട്. അതിനായി ₹6,000 വരെ മാറ്റിവയ്ക്കാം.

സിനിമയും വിനോദവും, ഷോപ്പിങ്, യാത്ര, ഡിന്നർ, ഹോബികൾ, സുഹൃത്തുക്കളോടൊപ്പമുള്ള ചെലവുകൾ എന്നിവയ്ക്ക് ഈ തുക ഉപയോ​ഗിക്കാം.

50-30-20 എന്നത് ഒരു മാർഗനിർദേശം മാത്രമാണ്; കർശനമായ നിയമമല്ല. ഒരാൾക്ക് വാടക തന്നെ ₹12,000 ആണെങ്കിൽ ₹15,000 കൊണ്ട് എല്ലാ ആവശ്യച്ചെലവുകളും നടത്തുന്നത് ബുദ്ധിമുട്ടായേക്കാം. അത്തരം സാഹചര്യത്തിൽ ആഗ്രഹങ്ങൾക്കുള്ള ചെലവ് കുറച്ച് കൂടുതൽ തുക ആവശ്യച്ചെലവുകൾക്കായി മാറ്റിവയ്ക്കാം.

₹30,000 ശമ്പളമുള്ള ഒരാൾക്ക് കൃത്യമായ ബജറ്റിങ്ങിലൂടെ സാമ്പത്തിക അച്ചടക്കം വളർത്താൻ കഴിയും. ആവശ്യങ്ങൾ നിറവേറ്റുക, സ്ഥിരമായി സമ്പാദിക്കുക, ആഗ്രഹങ്ങൾക്ക് പരിധി നിശ്ചയിക്കുക.