സമകാലിക മലയാളം ഡെസ്ക്
പ്രോട്ടീനും വിറ്റാമിനുകളും ധാതുക്കളും ധാരാളമായി അടങ്ങിയ ഭക്ഷണമാണ് മുട്ട. എന്നാൽ മുട്ട പാകം ചെയ്യുന്ന രീതി അതിന്റെ പോഷകമൂല്യത്തെയും കലോറിയെയും സ്വാധീനിക്കും.
എണ്ണയും വെണ്ണയും ഉപയോഗിക്കാതെ മുട്ട തയ്യാറാക്കുന്നതാണ് ആരോഗ്യകരമായ ഭക്ഷണശീലത്തിന് നല്ലത്. മുട്ട കഴിക്കാൻ ആരോഗ്യകരമായ നാല് രീതികൾ പരിചയപ്പെടാം.
പുഴുങ്ങിയ മുട്ട: എണ്ണയോ വെണ്ണയോ ചേർക്കാതെ തയ്യാറാക്കാമെന്നതാണ് ഇതിന്റെ പ്രത്യേകത. വിറ്റാമിൻ എ, ഡി, ബി12 എന്നിവയും പ്രോട്ടീനും ലഭിക്കും.
പോച്ച്ഡ് എഗ്ഗ്: തിളയ്ക്കാൻ തുടങ്ങുന്ന വെള്ളത്തിൽ മുട്ട പൊട്ടിച്ചൊഴിച്ച് വേവിക്കുന്ന രീതിയാണിത്. എണ്ണയോ വെണ്ണയോ ആവശ്യമില്ലാത്തതിനാൽ കലോറി നിയന്ത്രിക്കാൻ സഹായിക്കും.
സ്ക്രാംബിൾഡ് എഗ്ഗ്: മുട്ട അടിച്ചുചേർത്ത് പാകം ചെയ്യുന്ന രീതിയാണിത്. വെണ്ണയ്ക്കും ക്രീമിനും പകരം ഒലിവ് ഓയിൽ പോലുള്ള ആരോഗ്യകരമായ എണ്ണകൾ ഉപയോഗിക്കാം. പച്ചക്കറികളും ഔഷധസസ്യങ്ങളും ചേർക്കുന്നത് പോഷകഗുണം വർധിപ്പിക്കും.
മുട്ടയുടെ വെള്ള മാത്രം: മുട്ടയുടെ വെള്ളയിൽ കലോറി കുറവും പ്രോട്ടീൻ കൂടുതലുമാണ്. കൊളസ്ട്രോൾ അടങ്ങിയിട്ടില്ലെന്നതും പ്രത്യേകതയാണ്. ശരീരഭാരം നിയന്ത്രിക്കാൻ ശ്രമിക്കുന്നവർക്ക് ഇത് ഒരു നല്ല തിരഞ്ഞെടുപ്പാണ്.
മുട്ടയ്ക്കൊപ്പം പച്ചക്കറികളും പഴങ്ങളും ഉൾപ്പെടുത്താം. പ്രോട്ടീൻ വർധിപ്പിക്കാൻ ഒരു മുഴുവൻ മുട്ടയ്ക്കൊപ്പം രണ്ട് മുട്ടയുടെ വെള്ളയും ചേർക്കാം.