കോളിഫ്ലവര്‍ എങ്ങനെ വൃത്തിയാക്കാം?

കോളിഫ്ലവർ ഇഷ്ടമില്ലാത്തവരായി ആരും ഉണ്ടാവില്ല.

എന്നാൽ ഇടയ്ക്ക് മാത്രമാണ് നമ്മൾ കോളിഫ്ളവര്‍ വിഭവങ്ങള്‍ ഉണ്ടാക്കുന്നത്

കോളിഫ്ളവര്‍ വൃത്തിയാക്കാന്‍ ഉള്ള ബുദ്ധിമുട്ടാണ് അതിന് പിന്നിൽ.

മറ്റ് പച്ചക്കറികള്‍ പോലെയല്ല, വളരെ ശ്രദ്ധയോടെ വേണം കോളിഫ്ളവര്‍ വൃത്തിയാക്കാന്‍.

അതില്‍ പുഴുക്കളോ പ്രാണികളോ ഉണ്ടെങ്കില്‍ കണ്ടെത്താന്‍ അല്‍പം പ്രയാസമാണെന്നതുതന്നെയാണ് അതിന് കാരണം.

എങ്ങനെ കോളിഫ്ലവര്‍ വൃത്തിയാക്കാം എന്ന് നോക്കാം.

കോളിഫ്ലവർ വൃത്തിയാക്കുന്നതിന്റെ ആദ്യപടി അവ ഇതളുകളായി വേർതിരിച്ചു എടുക്കുക എന്നതാണ്. അതിനുശേഷം കോളിഫ്ലവറിന്റെ നടുഭാഗത്തു കാണുന്ന തണ്ട് കത്തി ഉപയോഗിച്ച് മുറിച്ചു മാറ്റണം. കഷ്ണങ്ങളാക്കുമ്പോൾ ഒരുപാട് ചെറുതാകാതിരിക്കാനും ശ്രദ്ധിക്കണം.

ഒരു പാത്രത്തിൽ ചെറുചൂടു വെള്ളത്തിൽ ഉപ്പും മഞ്ഞളും ഒരു ടേബിൾസ്പൂൺ വിനാഗിരിയും ചേർക്കുക. ഇതിലേക്ക് 15 മുതൽ 30 മിനിറ്റ് വരെ കോളിഫ്ലവർ മുക്കിവയ്ക്കുക. ഇത് പ്രാണികളും കീടങ്ങളും നീക്കം ചെയ്യാൻ സഹായിക്കും.

ഈ വെള്ളം ഊറ്റിയെടുത്ത ശേഷം ഒഴുകുന്ന വെള്ളത്തിനടിയിൽ വെച്ച് നന്നായി ഒന്നു കൂടി കഴുകിയെടുക്കാം. ഇത് കോളിഫ്ലവർ നന്നായി വൃത്തിയാക്കാൻ സഹായിക്കും.

പാചകം ചെയ്യുന്നതിനു മുമ്പ് കോളിഫ്ലവർ ഉണക്കിയെടുക്കുന്നത് പാചകം എളുപ്പമാക്കും. ഒരു കോട്ടൺ തുണിയിൽ കോളിഫ്ലവർ ഉണക്കിയെടുക്കുക.