‌വാട്ടർ ടാപ്പിൽ പറ്റിപ്പിടിച്ച തുരുമ്പ് ഇല്ലാതാക്കാം

വെള്ളം, സോപ്പ് എന്നിവയുമായി എപ്പോഴും സമ്പർക്കം ഉണ്ടാകുന്നതുകൊണ്ട് വീട്ടിലെ ടാപ്പുകൾ പെട്ടന്ന് തുരുമ്പെടുക്കുന്നു.

എന്നാൽ ശരിയായ രീതിയിൽ വൃത്തിയാക്കുന്നതിലൂടെ ടാപ്പുകളിലുള്ള തുരുമ്പിനേയും പാടുകളേയും ഇല്ലാതാക്കാൻ സാധിക്കും.

നാരങ്ങ

പകുതി മുറിച്ചെടുത്ത നാരങ്ങ തുരുമ്പെടുത്ത ഭാഗത്ത് നന്നായി തേച്ചുരച്ച് കുറച്ച് നേരം വെച്ചതിന് ശേഷം ചൂട് വെള്ളത്തിൽ കഴുകിയെടുക്കുക. നാരങ്ങയിലുള്ള സിട്രിക് ആസിഡ് തുരുമ്പിനെ ഇല്ലാതാക്കി തിളക്കമുള്ളതാക്കുന്നു.

വിനാഗിരി

ഒരു തുണി വിനാഗിരിയിൽ മുക്കിയെടുത്തതിന് ശേഷം ഇത് ടാപ്പിൽ പൊതിഞ്ഞ് 10 മിനിറ്റ് വെയ്ക്കുക. ശേഷം ബ്രഷ് ഉപയോഗിച്ച് ഉരച്ച് കഴുകാവുന്നതാണ്. ഇത് തുരുമ്പിനേയും പാടുകളെയും എളുപ്പം നീക്കം ചെയ്യുന്നു.

ബേക്കിംഗ് സോഡ

ബേക്കിംഗ് സോഡ വെള്ളത്തിൽ ചേർത്ത് പേസ്റ്റ് പോലെയാക്കി തുരുമ്പുള്ള ഭാഗങ്ങളിൽ തേച്ചുപിടിപ്പിക്കാം. കുറച്ച് നേരം അങ്ങനെ തന്നെ വെച്ചതിന് ശേഷം ബ്രഷ് ഉപയോഗിച്ച് ഉരച്ച് കഴുകാം. ഇത് തുരുമ്പിനെ എളുപ്പം ഇല്ലാതാക്കാൻ സഹായിക്കുന്നു.

ശ്രദ്ധിക്കേണ്ട കാര്യങ്ങൾ

കഴിയുന്നതും ഉപയോഗം കഴിഞ്ഞാൽ ടാപ്പ് തുടയ്ക്കാൻ ശ്രദ്ധിക്കണം. ചൂട് വെള്ളവും സോപ്പും ഉപയോഗിച്ച് ആഴ്ച്ചയിൽ വൃത്തിയാക്കുന്നതും തുരുമ്പ് ഉണ്ടാകുന്നതിന് തടയുന്നു. പോറൽ ഉണ്ടാവാൻ സാധ്യതയുള്ള വസ്തുക്കൾ ഉപയോഗിച്ച് ടാപ്പ് വൃത്തിയാക്കരുത്.