മുടി ചീകുന്ന ബ്രഷ് വൃത്തിയാക്കേണ്ടതെങ്ങനെ? ചീർപ്പിൽ അടിഞ്ഞുകൂടുന്നത് ഇതൊക്കെ

മുടി വൃത്തിയായി സൂക്ഷിക്കാൻ ദിവസവും മുടിയിൽ ഉപയോഗിക്കുന്ന ഹെയർ ബ്രഷും കൃത്യമായി വൃത്തിയാക്കേണ്ടതുണ്ട്. മുടിയിൽ നിന്നുള്ള എണ്ണ, പൊടി, ചത്ത ചർമകോശങ്ങൾ, മുടിയിൽ ഉപയോഗിക്കുന്ന ഹെയർ പ്രോഡക്ടുകളുടെ അവശിഷ്ടങ്ങൾ എന്നിവയെല്ലാം ബ്രഷിന്റെ ബ്രിസിലുകൾക്കിടയിൽ അടിഞ്ഞുകൂടാം. വൃത്തിയാക്കാതെ വീണ്ടും ഉപയോഗിക്കുമ്പോൾ ഇവ മുടിയിലേക്കു തിരിച്ചെത്താം.

ട്രൈക്കോളജിസ്റ്റും ഹെയർ സ്റ്റൈലിസ്റ്റുകളും പറയുന്നതനുസരിച്ച്, വൃത്തിയില്ലാത്ത ബ്രഷ് ഉപയോഗിക്കുന്നത് തലയോട്ടിയിലെ അസ്വസ്ഥത, ഇറിറ്റേഷൻ, താരൻ തുടങ്ങിയ പ്രശ്നങ്ങൾക്ക് കാരണമാകാം. അതേസമയം ബ്രഷ് വൃത്തിയായി സൂക്ഷിക്കുന്നത് അതിന്റെ പ്രവർത്തനക്ഷമതയും മെച്ചപ്പെടുത്തും.

ഹെയർ ബ്രഷിന്റെ ബ്രിസിലുകൾക്ക് ചുറ്റും ചാരനിറത്തിൽ ഒരു പഞ്ഞിപോലെയുള്ള പാളി ശ്രദ്ധിച്ചിട്ടുണ്ടോ? അത് വെറും പൊടിയല്ല. ലിന്റ്, പൊടി, അഴുക്ക്, തലയിൽ നിന്നുള്ള എണ്ണ, ചത്ത ചർമകോശങ്ങൾ, ഹെയർ പ്രോഡക്ടുകളുടെ അവശിഷ്ടങ്ങൾ എന്നിവ കൂടിച്ചേർന്നുണ്ടാകുന്നതാണ് ഈ ബിൽഡപ്പ്.

ബ്രഷിൽ കുടുങ്ങിയ മുടി ഓരോ ഉപയോഗത്തിനുശേഷവും നീക്കം ചെയ്യുന്നതാണ് ആദ്യം ചെയ്യേണ്ടത്. എന്നാൽ ബ്രഷ് പൂർണമായി കഴുകേണ്ട ഇടവേള മുടിയുടെ തരത്തെയും ബ്രഷിന്റെ ഉപയോഗത്തെയും ആശ്രയിച്ചിരിക്കും. ഹെയർ സ്പ്രേ, ജെൽ, മറ്റ് സ്റ്റൈലിങ് പ്രോഡക്ടുകൾ എന്നിവ സ്ഥിരമായി ഉപയോഗിക്കുന്നവർ ബ്രഷ് കൂടുതൽ ഇടയ്ക്കിടെ വൃത്തിയാക്കുന്നതാണ് നല്ലത്.

ബ്രഷിൽ കുടുങ്ങിയ മുടി നീക്കം ചെയ്ത ശേഷം ചെറുചൂടുവെള്ളത്തിൽ അൽപം ഷാംപൂ അല്ലെങ്കിൽ ലിക്വിഡ് സോപ്പ് ചേർത്ത് ബ്രഷ് ഏകദേശം 10 മുതൽ 15 മിനിറ്റ് വരെ മുക്കിവയ്ക്കാം. തുടർന്ന് നന്നായി കഴുകി ഉണക്കിയെ‌ടുക്കണം.

എല്ലാ ബ്രഷുകളും ഒരേ രീതിയിൽ വൃത്തിയാക്കാൻ പാടില്ല. വെള്ളത്തിൽ മുക്കിവെക്കാൻ പാടില്ലാത്ത ബ്രഷുകളിൽ ഷാംപൂവും വെള്ളവും കലർത്തിയ മിശ്രിതം സ്പ്രേ ചെയ്ത് ബ്രിസിലുകൾ പതുക്കെ വൃത്തിയാക്കാം. പഴയതോ വൃത്തിയുള്ളതോ ആയ ടൂത്ത് ബ്രഷ് ഉപയോഗിച്ച് ബ്രിസിലുകൾക്കിടയിലെ അഴുക്ക് നീക്കം ചെയ്യാനും കഴിയും.

ഹെയർ സ്പ്രേ, ജെൽ തുടങ്ങിയ സ്റ്റൈലിങ് പ്രോഡക്ടുകളുടെ അവശിഷ്ടങ്ങളും എണ്ണയും കൂടുതലായി അടിഞ്ഞിട്ടുണ്ടെങ്കിൽ വൈറ്റ് വിനാഗിരിയും ഉപയോഗിക്കാം. വൈറ്റ് വിനാഗിരിയും ചെറുചൂടുവെള്ളവും തുല്യ അളവിൽ ചേർത്ത് ബ്രഷ് ഏകദേശം 15 മുതൽ 30 മിനിറ്റ് വരെ മുക്കിവയ്ക്കാം. തുടർന്ന് നന്നായി കഴുകി പൂർണമായി ഉണക്കിയശേഷം മാത്രം ഉപയോഗിക്കുക

ബ്രഷ് എത്ര നന്നായി വൃത്തിയാക്കിയാലും അതിന്റെ പ്രവർത്തനം മോശമായാൽ മാറ്റേണ്ട സമയമായി. മുടി ചീകുമ്പോൾ ബ്രഷ് മുടിയിൽ വലിച്ചുപിടിക്കുകയോ മുടി വലിഞ്ഞുപോകുകയോ ചെയ്യുന്നത് ശ്രദ്ധയിൽപ്പെട്ടാൽ പുതിയ ബ്രഷ് പരിഗണിക്കാം. ബ്രിസിലുകളുടെ നീളം ഒരുപോലെയല്ലാതാകുന്നതും ബ്രഷ് മാറ്റേണ്ടതിന്റെ സൂചനയാകാം.