അടുക്കളയിൽ കത്തി ഇങ്ങനെ സൂക്ഷിച്ചില്ലെങ്കിൽ 'പണി' കിട്ടും

അടുക്കളയുടെ നായകൻ എന്നും കത്തി തന്നെയാണ്. കത്തിയില്ലാതെ അടുക്കളയിൽ ഒരു ദിവസം പോലും കടന്നു പോകില്ല. എന്നാൽ കൃത്യമായി പരിപാലിച്ചില്ലെങ്കിൽ നായകൻ വില്ലനാകാന്‍ അധികം സമയം വേണ്ട.

ഉപയോ​ഗിച്ച ശേഷം വൃത്തിയാക്കാതെ കത്തി അതുപോലെ വെക്കരുത്. ഇത് കത്തിയിൽ ഈർപ്പം തങ്ങി നിൽക്കാനും അണുബാധയ്ക്കും കാരണമാകും. ഇത് രോഗങ്ങളെ ക്ഷണിച്ചു വരുത്തലാകും.

ഉപയോഗിച്ച ശേഷം സോപ്പും സ്ക്രബറും ഉപയോഗിച്ച് നന്നായി കഴുകി തുടച്ചു സൂക്ഷിക്കുക.

കഴുകിയ ശേഷം കത്തി നനവോടെ വെക്കരുത്. ഇത് കത്തി പെട്ടെന്ന് തുരുമ്പിക്കാന്‍ കാരണമാകും.

വൃത്തിയാക്കി ഉണങ്ങിയ ശേഷം കത്തികൾ നൈഫ് ബ്ലോക്കിലോ മാഗ്നറ്റിക് സ്ട്രിപ്പിലോ സൂക്ഷിക്കുക.

ചെറുതായിട്ടാണെങ്കിലും തുരുമ്പെടുത്ത കത്തി വൃത്തിയാക്കാതെ ഉപയോ​ഗിക്കരുത്. ഇത് ആരോ​ഗ്യത്തിന് ദോഷം ചെയ്യും.

നാരങ്ങ, ആസിഡ് എന്നിവ കത്തി വൃത്തിയാക്കാന്‍ ഉപയോഗിക്കരുത് ഇത് കത്തി തുരുമ്പിക്കാന്‍ കാരണമാകും.

ബേക്കിങ് സോഡയും വെള്ളവും ചേർത്ത് പേസ്റ്റ് രൂപത്തിലാക്കി ഒരു മണിക്കൂര്‍ നേരം കത്തിയില്‍ പുരട്ടിവെക്കുന്നത് തുരുമ്പ് നീക്കാന്‍ സഹായിക്കും.