അൽപം ശ്രദ്ധിച്ചാൽ വെളിച്ചെണ്ണയിലെ മായം കണ്ടെത്താം

അത്ര പെട്ടെന്നൊന്നും ആർക്കും കണ്ടുപിടിക്കാനാവാത്ത വിധമാണ് ഭക്ഷ്യ എണ്ണകളിലെ മായം ചേർക്കൽ.

എന്നാൽ അൽപ്പം ഒന്ന് ശ്രദ്ധിച്ചാൽ സാധാരണക്കാർക്കും ഈ തട്ടിപ്പ് കണ്ടെത്താനാകും.

വീട്ടില്‍ വെച്ച് തന്നെ വെളിച്ചെണ്ണയിലെ മായം എങ്ങനെ കണ്ടെത്താം എന്ന് നോക്കാം.

ഫ്രിഡ്ജ് ടെസ്റ്റ്

ഒരു ചില്ലു പാത്രത്തില്‍ അര മണിക്കൂർ അൽപം വെളിച്ചെണ്ണ ഫ്രിഡ്ജില്‍ സൂക്ഷിക്കുക. ശുദ്ധമായ വെളിച്ചെണ്ണയാണെങ്കില്‍ അത് പൂര്‍ണ്ണമായും വെളുത്ത നിറത്തിൽ ഉറച്ചിട്ടുണ്ടാകും. മായം കലര്‍ന്നതാണെങ്കില്‍, മായം കലര്‍ത്തിയ ഭാഗം വെളിച്ചെണ്ണയ്ക്ക് മുകളിലോ താഴെയോ വേറിട്ടൊരു പാളിയായി കാണാം.

ചൂടാക്കി നോക്കാം

ശുദ്ധമായ വെളിച്ചെണ്ണ ചെറുതായി ചൂടാക്കുമ്പോള്‍ നല്ല മണം ഉണ്ടാകും. മായം ചേര്‍ത്തതാണെങ്കില്‍, ചൂടാക്കുമ്പോള്‍ അസ്വാഭാവികമായ മണമുണ്ടാകാം.

വെള്ളത്തില്‍ ലയിപ്പിക്കുക

ഒരു ഗ്ലാസ്സില്‍ വെള്ളമെടുത്ത് അതിലേക്ക് ഒരു സ്പൂണ്‍ വെളിച്ചെണ്ണ ഒഴിക്കുക. ശുദ്ധമായ വെളിച്ചെണ്ണ വെള്ളത്തില്‍ ലയിക്കില്ല, അത് മുകളില്‍ പാളിയായി നില്‍ക്കും. മായം ചേര്‍ത്ത എണ്ണയാണെങ്കില്‍, അത് വെള്ളത്തില്‍ ലയിക്കുന്നതായി കാണാം.

ചർമത്തിൽ പുരട്ടി നോക്കാം

ശുദ്ധമായ വെളിച്ചെണ്ണ കയ്യിൽ പുരട്ടുമ്പോഴേ പെട്ടെന്ന് ആ​ഗിരണം ചെയ്യപ്പെടുകയും ചര്‍മ്മം മൃദുവായി അനുഭവപ്പെടുകയും ചെയ്യും. മായം ചേര്‍ത്തതാണെങ്കില്‍, എണ്ണ ചര്‍മത്തില്‍ വേഗത്തില്‍ ആ​ഗിരണം ചെയ്യപ്പെടാതേയും ഒട്ടിപ്പിടിക്കുന്നതായും അനുഭവപ്പെടും.