അടുക്കളയിലെ മീൻ മണവും ദുർഗന്ധവും അകറ്റാം: എളുപ്പവഴികൾ

വീട്ടിൽ മീൻ വറുക്കലും വൃത്തിയാക്കാലും ഏറെ ചെയ്യുന്നവരാണ് നമ്മൾ മലയാളികൾ

ദിവസം മുഴുവൻ അടുക്കളയിലും വീടിനുള്ളിലും മീനിന്റെ ഗന്ധം തങ്ങിനിന്നെന്നു വരാം.

മീൻ വിഭവങ്ങൾ ആസ്വദിച്ചു കഴിക്കുന്നവർക്ക് പോലും ഈ ഗന്ധം അത്ര ഇഷ്ടപ്പെട്ടെന്നുവരില്ല.

അടുക്കളയിൽ മീനിന്റെ ദുർഗന്ധം തങ്ങിനിൽക്കാതിരിക്കാൻ ചില പൊടിക്കൈകളുണ്ട്.

മീൻ വാങ്ങി ഫ്രിഡ്ജിലും മറ്റും വയ്ക്കുന്ന സമയത്ത് വാഴയിലയിൽ പൊതിഞ്ഞു വച്ചാൽ അധിക ഗന്ധം പടരാതെ തടയാനാകും.

ഒരു പാത്രത്തിൽ വെള്ളം എടുത്ത് കറുവാപ്പട്ട, ഗ്രാമ്പു തുടങ്ങിയ ഏതെങ്കിലും ഇട്ട് ചെറുതീയിൽ സ്റ്റൗവിൽ വച്ച് തിളപ്പിച്ചെടുക്കാം ചുരുങ്ങിയത് 10 മിനിറ്റെങ്കിലും എടുത്ത് തിളയ്ക്കാൻ അനുവദിക്കുക. ഇതോടെ മീനിന്റെ രൂക്ഷഗന്ധം അകന്ന് വീടിനുള്ളിൽ സുഗന്ധം നിറയും

മീൻ കഴുകിയതിന് ശേഷം ഒരു പാത്രത്തിൽ ഒരേ അളവിൽ വിനാഗിരിയും ചെറുചൂടുവെള്ളവും എടുക്കുക. ആദ്യം അല്പം ബേക്കിങ് സോഡ ഡ്രെയിനിലേക്ക് ഇട്ടുകൊടുക്കാം. അതിനുശേഷം വിനാഗിരി മിശ്രിതം ഒഴിക്കുക. മീൻ കഴുകിയ സ്ഥലത്തെ ദുർഗന്ധം അകന്നു കിട്ടും.

അല്പം ബേക്കിങ് സോഡയെടുത്ത് ദുർഗന്ധം അധികമായി തങ്ങിനിൽക്കുന്ന സ്ഥലങ്ങളിൽ വിതറാം. വളരെ വേഗത്തിൽ ഇത് ദുർഗന്ധത്തെ ആഗിരണം ചെയ്യും. മണം മാറിയശേഷം തുടച്ചു കളഞ്ഞാൽ മതിയാകും.

മീൻ വൃത്തിയാക്കിയ ശേഷം ഒരു മുറി നാരങ്ങ എടുത്ത് അത് സിങ്കിൽ ഉരച്ചു കൊടുക്കാം. പച്ച മീനിന്റെ രൂക്ഷഗന്ധം അകറ്റാൻ ഇത് സഹായിക്കും.

രാത്രി സമയത്താണ് മീനിന്റെ ഗന്ധം തങ്ങിനിൽക്കുന്നതെങ്കിൽ അല്പം കാപ്പിപ്പൊടിയോ ബേക്കിങ് സോഡയോ ഒരു ബൗളിൽ എടുത്ത് അടുക്കളയ്ക്കുള്ളിൽ തുറന്ന നിലയിൽ വയ്ക്കാം. നേരം വെളുക്കുമ്പോഴേക്കും ദുർഗന്ധം മാറിയിരിക്കും.

മീൻ വൃത്തിയാക്കുമ്പോഴും പാചകം ചെയ്യുമ്പോഴും ജനാലകൾ തുറന്നിടാൻ പ്രത്യേകം ശ്രദ്ധിക്കുക. രൂക്ഷമായ ഗന്ധം വീടിനുള്ളിലേക്ക് വ്യാപിക്കാതിരിക്കാൻ ഇത് പ്രധാനമാണ്.