തുണിയിൽ ചായക്കറയായാൽ ടെൻഷൻ അടിക്കണ്ട, പരിഹാരമുണ്ട്

ചായയും കാപ്പിയും ഇഷ്ടമാണെങ്കിലും അവ ഇട്ടിരിക്കുന്ന വസ്ത്രത്തിൽ വീണാൽ എന്തുചെയ്യും?

ചായയുടെയോ കാപ്പിയുടെയോ കഠിനമായ കറകൾ കഴുകിക്കളയാനും ബുദ്ധിമുട്ടാണ്.

വസ്ത്രങ്ങളിൽ നിന്നുള്ള ചായക്കറ എളുപ്പത്തിൽ നീക്കം ചെയ്യാൻ സഹായിക്കുന്ന ചില പൊടിക്കൈകൾ നോക്കാം.

കറ വീണയുടൻ തണുത്ത വെള്ളത്തിൽ ഇട്ട് ഒന്നോ രണ്ടോ മിനിറ്റ് പതുക്കെ ഉരയ്ക്കുക. തണുത്ത വെള്ളത്തിൽ ഈ വിധം കഴുകുന്നതിലൂടെതന്നെ മിക്കവാറും കറ പോകാൻ സാധ്യതയുണ്ട്.

കറ പിടിച്ച തുണി 20 മുതൽ 30 മിനിറ്റ് വരെ തണുത്ത വെള്ളത്തിൽ മുക്കിവെക്കണം. ശേഷം കറയുള്ള ഭാഗത്ത് ലിക്വിഡ് ഡിറ്റർജന്റ് പുരട്ടി കറ പോകുന്നതുവരെ വൃത്താകൃതിയിൽ ഉരയ്ക്കുക. അതിനുശേഷം, വീണ്ടും വെള്ളത്തിൽ കഴുകുക. വസ്ത്രം പെട്ടെന്ന് വൃത്തിയായി കിട്ടും.

കറയുള്ള ഭാ​ഗം നനച്ച ശേഷം അതിനു മുകളിൽ ബേക്കിങ് സോഡ വിതറി ഒരു രാത്രി മുഴുവൻ വെക്കുക .പിറ്റേദിവസം ഉരച്ച് കഴുകിക്കളയുക. അല്ലെങ്കിൽ ഇത് ചെയ്യുന്നതിന് മുൻപ് വസ്ത്രം വെള്ളത്തിൽ മുക്കിവെച്ച ശേഷം ബേക്കിങ് സോഡ പേസ്റ്റ് രൂപത്തിലാക്കി കറയ്ക്ക് മുകളിൽ പുരട്ടുക.

ഒരു ബക്കറ്റ് തണുത്ത വെള്ളത്തിൽ ഒന്നോ രണ്ടോ ടീസ്പൂൺ വിനാഗിരി ചേർത്ത് കുറച്ച് മിനിറ്റ് വെക്കുക. ശേഷം കറം നീക്കാനായി വസ്ത്രം തണുത്ത വെള്ളത്തിൽ കഴുകുക. തുണിയ്ക്ക് ഒരു വ്യത്യാസവും വരാതെ തന്നെ കറ മാറിക്കിട്ടും.

ഒരു നാരങ്ങ മുഴുവനായും ബക്കറ്റിലേക്ക് പിഴിഞ്ഞൊഴിച്ച് അല്പനേരം തുണി അതിൽ മുക്കിവയ്ക്കുക. ശേഷം വെള്ളത്തിൽ കഴുകിയെടുക്കാം കറ അപ്രത്യക്ഷമാകും.