നിങ്ങൾക്ക് ഡിജിറ്റൽ അഡിക്‌ഷൻ ഉണ്ടോ? സ്വയം അറിയാം

ഇന്റർനെറ്റിന്റെ അമിത ഉപയോഗം ഇന്ന് എല്ലാ പ്രായക്കാരുടെയും ജീവിതത്തെ ബാധിക്കുന്ന ഒന്നാണ്.

പഠനം, ജോലി, വിനോദം എന്നിങ്ങനെ എല്ലാം ഓൺലൈൻ ആയി മാറിയതോടെ, അറിയാതെയാണ് നമ്മിൽ പലരും നെറ്റ് ഉപയോഗത്തിൽ പൂർണമായും അഡിക്റ്റഡ് ആയത്.‌

നെറ്റ് അഡിക്‌ഷൻ ഉണ്ടോയെന്നു തിരിച്ചറിയാൻ എളുപ്പമാണ്. ഈ ലക്ഷണങ്ങൾ നിങ്ങൾക്കുണ്ടോയെന്ന് പരിശോധിച്ചാൽ മതി.

മിക്കസമയവും ഇന്റർനെറ്റിനെക്കുറിച്ച് ആലോചിക്കുന്നു. എന്തു ചെയ്യുന്നതിനും അതാണ് ഉത്തേജനം എന്ന് കരുതുന്നു

നെറ്റിൽ ചെലവാക്കുന്ന സമയം നിയന്ത്രിക്കാൻ പറ്റാതെ വരുന്നു.

ഇന്റർനെറ്റ് ഉപയോഗിക്കുന്ന സമയം ക്രമേണ കൂടിവരുന്നു.

നെറ്റ് കണക്ഷൻ മുറിയുന്ന സാഹചര്യങ്ങളിൽ ഉറക്കമില്ലായ്‌മ, തല വേദന, അമിതമായ ദേഷ്യം, ശ്രദ്ധക്കുറവ്, ഉത്കണ്ഠ എന്നീ പിൻവാങ്ങൽ ലക്ഷണങ്ങൾ ഉണ്ടാകുന്നു.

ജീവിതത്തിലെ പ്രധാന കാര്യം ഇന്റർനെറ്റാണ്. അതിനായി മറ്റെല്ലാ വിനോദങ്ങളെയും ഉപേക്ഷിക്കുന്നു.

ദോഷകരമായ വിധത്തിലാണ് ഇന്റർനെറ്റ് ഉപയോഗിക്കുന്നതെന്ന് മനസ്സിലാക്കിയിട്ടും തുടരുന്നു.

ഈ കാര്യങ്ങളിൽ മൂന്നെണ്ണം ഉണ്ടെങ്കിൽ ഇന്റർനെറ്റ് അഡിക്ഷൻ ഉണ്ട് എന്നു മനസ്സിലാക്കി ചികിത്സാസഹായം തേടാം.

ഉറക്കക്കുറവ്, കണം കൈയിലും വിരലുകളിലും വേദന, കണ്ണുകൾക്ക് വരൾച്ച, കഴുത്ത്, പുറംവേദന, അമിതവണ്ണം തുടങ്ങിയ ശാരീരിക ലക്ഷണങ്ങളും ഈ അഡിക്‌ഷന്റേതായി പ്രകടമാകാറുണ്ട്.