വ്യാജ പനീർ എങ്ങനെ തിരിച്ചറിയാം

ഇന്ത്യന്‍ അടുക്കളകളില്‍ സുലഭമായി ഉപയോഗിക്കുന്ന ഭക്ഷ്യോത്പന്നമാണ് പനീര്‍.

പ്രോട്ടീന്‍ അടങ്ങിയ ഭക്ഷണപദാര്‍ഥമായതിനാല്‍ സമീപകാലത്തായി പനീറിന് ആവശ്യക്കാരേറെയാണ്.

എന്നാല്‍ പാക്കറ്റുകളിലാക്കി വില്‍ക്കുന്ന പനീറില്‍ നല്ലതേത്, വ്യാജനേത് എന്ന് തിരിച്ചറിയാനാവാത്ത അവസ്ഥയാണിപ്പോള്‍.

പനീർ വാങ്ങുമ്പോഴോ ഉപയോഗിക്കുമ്പോഴോ അതിൽ മായം ചേർത്തിട്ടുണ്ടോ എന്ന് വീട്ടിൽവെച്ച് തന്നെ തിരിച്ചറിയാൻ ചില എളുപ്പവഴികളുണ്ട്.

ശുദ്ധമായ പനീറിന് നേരിയ പാൽമണം, മൃദുവായ സ്പോഞ്ച് ഘടന, അമർത്തുമ്പോൾ എളുപ്പത്തിൽ പൊടിയുക എന്നിവയാണ് പ്രധാന സ്വഭാവം. പുളിച്ച മണം, രാസമണം, അസാധാരണ ഗന്ധം, റബ്ബർ പോലുള്ള കടുത്ത ഘടന തുടങ്ങിയവയാണെങ്കിൽ അത് വ്യാജ പനീറാണ്.

അയഡിൻ ടെസ്റ്റിലൂടെ പനീറിൽ അന്നജം ചേർത്തിട്ടുണ്ടോ എന്ന് കണ്ടെത്താനാകും. ഇതിനായി, ഒരു ചെറിയ കഷ്ണം പനീർ എടുക്കുക. അതിൽ ഒരു തുള്ളി അയഡിൻ ലായനി ഒഴിക്കുക. പനീറിൻ്റെ നിറം നീലയോ കറുപ്പോ ആയി മാറുകയാണെങ്കിൽ, അതിൽ അന്നജം ചേർത്തിട്ടുണ്ട് എന്ന് മനസ്സിലാക്കാം. ശുദ്ധമായ പനീർ നിറം മാറുകയില്ല.

ഒരു ചെറിയ കഷ്ണം പനീർ എണ്ണ ചേർക്കാതെ ചൂടുള്ള പാനിലിട്ട് ചൂടാക്കുക. ശുദ്ധമായ പനീർ ആണെങ്കില്‍ ചൂടാക്കുമ്പോൾ മൃദുവായി വരികയും, തവിട്ടുനിറം വരികയും ചെയ്യും. അധികമായി വെള്ളം പുറത്തുവിടുകയോ, റബ്ബർ പോലെ ചുരുങ്ങുകയോ, ഒട്ടിപ്പിടിക്കുകയോ ചെയ്താൽ അത് മായം ചേർത്തതാവാം.