നിങ്ങളുടെ വാട്ടർ ഫിൽറ്റർ ശരിയായ രീതിയിൽ പ്രവർത്തിക്കുന്നുണ്ടോ?

വെള്ളം ശുദ്ധിയായി ലഭിക്കും എന്ന ധാരണയിലാണ് വീടുകളിലും ഇപ്പോൾ വ്യാപകമായി വാട്ടർ ഫിൽറ്ററുകൾ അല്ലെങ്കിൽ പ്യൂരിഫയറുകൾ ഉപയോ​ഗിക്കുന്നത്. എന്നാൽ ഈ വാട്ടർ ഫിൽറ്റർ ശരിയായ രീതിയിൽ പ്രവർത്തിക്കുന്നുണ്ടോ എന്ന് എങ്ങനെ തിരിച്ചറിയാം?

രുചിയിലോ മണത്തിലോ മാറ്റമുണ്ടോ?

തെളിഞ്ഞ വെള്ളത്തിന് പകരം നിറവ്യത്യാസമോ, ക്ലോറിൻ രുചിയോ അനുഭവപ്പെടുന്നുണ്ടെങ്കിൽ ഫിൽറ്ററിന്റെ പ്രവർത്തനം മന്ദഗതിയിലായി എന്ന് മനസിലാക്കാം. എത്രയും പെട്ടെന്ന് ഫിൽറ്റർ പ്രവർത്തനക്ഷമമാക്കാൻ സർവീസ് ചെയ്യുകയോ മാറ്റിയെടുക്കുകയോ ചെയ്യേണ്ടതാണ്.

ടിഡിഎസ് പരിശോധന

ഫിൽറ്ററുകൾ വെള്ളത്തിലെ ധാതുക്കളുടെ അളവ് നിയന്ത്രിക്കാൻ സഹായിക്കും. ഇവ കാര്യക്ഷമമായാണോ പ്രവർത്തിക്കുന്നത് എന്നറിയാൻ TDS പരിശോധന നടത്തുന്നത് സഹായകമാകും. ആരോഗ്യകരമായ TDS നിലവാരം 50 - 150 ppm ആണ്. എന്നാൽ ഇത് 300 ppm വരെയും ആകാം.

വെള്ളത്തിന്റെ ഒഴുക്ക്

ഫിൽറ്ററിൽ നിന്ന് വരുന്ന വെള്ളത്തിന്റെ അളവ് ശ്രദ്ധിക്കുക വഴിയും ഫിൽറ്ററിന്റെ പ്രവർത്തനക്ഷമത മനസ്സിലാക്കാവുന്നതാണ്. വെള്ളത്തിന്റെ അളവ് കുറഞ്ഞാൽ ഫിൽറ്ററിൽ എന്തെങ്കിലും അടഞ്ഞിരിക്കാനുള്ള സാധ്യതയാണ് സൂചിപ്പിക്കുന്നത്.

ഇൻഡിക്കേറ്റർ ലൈറ്റുകൾ ശ്രദ്ധിക്കുക

ഇപ്പോഴത്തെ മിക്ക ഫിൽറ്ററുകളിലും ഇൻഡിക്കേറ്റർ ലൈറ്റുകൾ, ഡിജിറ്റൽ ഡിസ്‌പ്ലേകൾ, ആപ്പ് നോട്ടിഫിക്കേഷനുകൾ തുടങ്ങിയവ ലഭ്യമാണ്. ഇവ നൽകുന്ന അറിയിപ്പുകൾ ശ്രദ്ധിക്കുന്നത് ഫിൽറ്റർ സേവനങ്ങൾ ആരോഗ്യപ്രദമാകാൻ സഹായിക്കും.

ലീക്കുകൾ ഉണ്ടോയെന്ന് പരിശോധിക്കുക

ഫിൽറ്ററിൽ നിന്ന് വെള്ളം ലീക്ക് ആകുന്നുവെങ്കിൽ യന്ത്രം കേടാകാറായി എന്ന സൂചയാണ്‌ നല്കുന്നത്. കൃത്യമായ ഇടവേളകളിൽ അതായത് ഏകദേശം ഓരോ 2 മാസത്തിലൊരിക്കൽ ഫിൽറ്റർ സർവീസിങ് നടത്തുന്നത് യന്ത്രത്തിന്റെ ആയുസ്സ് വർധിപ്പിക്കുന്നതിനും സഹായകമാകും.

ഇത്തരം ചെറിയ കാര്യങ്ങൾ ശ്രദ്ധിച്ചാൽ മലിന ജലം സേവിക്കുന്നത് ഒഴിവാക്കാനും അതുവഴി ഉണ്ടാകാൻ സാധ്യത ഉള്ള ഗുരുതര ആരോഗ്യ പ്രശ്നങ്ങളെ തടയാനും സാധിക്കും.