അസിഡിറ്റിയും ദഹനക്കേടും പമ്പ കടക്കും; ബനാന ടീ കുടിക്കൂ

നമ്മുടെ നാട്ടിൽ സുലഭമായി കിട്ടുന്ന പഴവർഗങ്ങളിലൊന്നാണ് വാഴപ്പഴം.

നാരുകൾ, പൊട്ടാസ്യം, വിറ്റാമിൻ ബി6, വിറ്റാമിൻ സി, വിവിധ ആന്റിഓക്സിഡന്റുകൾ, ഫൈറ്റോ ന്യൂട്രിയന്റുകൾ എന്നിവയുടെ വലിയകലവറ തന്നെയാണ് വാഴപ്പഴം.

എന്നാൽ വാഴപ്പഴം കഴിക്കുമ്പോൾ ശരീരഭാരം കൂട്ടുമോ എന്ന പേടി പലർക്കുമുണ്ട്. എന്നാൽ ടെൻഷൻ അടിക്കാതെ വാഴപ്പഴത്തിന്റെ പോഷകങ്ങൾ ആസ്വദിക്കാനുള്ള ഒരു മികച്ച മാർ​ഗമാണ് ബനാനാ ടീ.

ഇതിൽ പൊട്ടാസ്യം, മാംഗനീസ്, വൈറ്റമിൻ ബി, കോപ്പർ, ഇലക്രോലൈറ്റുകൾ എന്നിവ അടങ്ങിയിട്ടുണ്ട്. ഇത് ശരീരത്തിലെ ദ്രാവക സന്തുലിതാവസ്ഥയെ നിയന്ത്രിക്കുകയും മെച്ചപ്പെട്ട ദഹനവും മെറ്റബോളിസവും പ്രോത്സാഹിപ്പിക്കുകയും ചെയ്യും.

കുടലിന്റെ ആരോഗ്യം മെച്ചപ്പെടുത്താനും ശരീരവണ്ണം, ദഹനക്കേട് അടക്കമുള്ള ബുദ്ധിമുട്ടുകളെ തടയാനും ഇത് സഹായിക്കും.

ബനാനാ ടീ എങ്ങനെ ഉണ്ടാക്കാം

ചേരുവകൾ

പഴം-പഴുത്തത് അല്ലെങ്കിൽ പച്ചപ്പഴം

വെള്ളം-ആവശ്യത്തിന്

കറുവപ്പട്ട പൊടിച്ചത്- കാൽ ടീസ്പൂൺ

ഉണ്ടാക്കുന്ന വിധം

പഴവും വെള്ളവും മിക്‌സ് ചെയ്ത് തയ്യാറാക്കുന്ന ഒന്നാണ് ബനാന ടീ. ചിലർ ഇതിനായി പഴുത്ത പഴം തെരഞ്ഞടുക്കും, ചിലരാകട്ടെ പച്ചപ്പഴം കൊണ്ടാണ് ഈ ചായ തയ്യാറാക്കുന്നത്.

വാഴപ്പഴം നന്നായി കഴുകി വൃത്തിയാക്കിയ ശേഷം തൊലിയോടു കൂടി ചെറിയ കഷ്ണങ്ങളാക്കി മുറിച്ചെടുക്കണം.

ഒരു പാനിൽ വെള്ളം തിളപ്പിച്ച് അതിലേക്ക് പഴം ഇട്ട് വേവിക്കണം.

തൊലി വേർപെട്ട് വരുന്നതു വരെ ചൂടാക്കുക. ഈ സമയം വെള്ളത്തിന്റെ നിറത്തിലും വ്യത്യാസമുണ്ടാകും.

അതിനു ശേഷം അൽപം കറുവപ്പട്ട പൊടിച്ചത് ഇതിലേക്ക് ചേർക്കാം.

ഇനി അരിച്ച് ഒരു കപ്പിലേക്ക് പകർത്താം. ബനാന ടീ റെഡി.