ഈ ക്രിസ്മസിന് ഈസി ബീറ്റ്റൂട്ട് വൈൻ ഉണ്ടാക്കാം, വെറും മൂന്ന് ദിവസം കൊണ്ട്

ക്രിസ്മസ് ദാ ഇങ്ങ് വന്നെത്തിയിരിക്കുകയാണ്.

ഈ തിരക്കിട്ട ജീവിതത്തിനിടയിൽ ക്രിസ്മസിന് വൈനിനു വേണ്ടിയുള്ള തയ്യാറെടുപ്പുകൾ നടത്താൻ പലർക്കും സാധിച്ചിട്ടുണ്ടാവില്ല.

ആ വിഷമത്തിൽ ഇരിക്കുന്നവർക്ക് മൂന്നുദിവസം കൊണ്ട് നല്ല സ്ട്രോങ്ങ് ബീറ്റ്റൂട്ട് വൈൻ ഉണ്ടാക്കാം, അതും കുക്കറിൽ.

വീട്ടിൽ വളരെ കുറഞ്ഞ ചെലവിൽ ഉണ്ടാക്കാവുന്ന അടിപൊളി ബീറ്റ്റൂട്ട് വൈൻ പരിചയപ്പെട്ടാലോ?‌

ചേരുവകൾ

ഗ്രേറ്റ് ചെയ്ത ‌ബീറ്റ്റൂട്ട് ​- അരക്കിലോ

വെള്ളം - ഒരു ലിറ്റർ

പട്ട - ഒരു ചെറിയ കഷണം

ഗ്രാമ്പൂ - മൂന്ന്

ഇഞ്ചി - ഒരു ചെറിയ കഷണം

പഞ്ചസാര -ഒന്നേമുക്കാൽ കപ്പ്

യീസ്റ്റ് - മുക്കാൽ ടീ സ്പൂൺ

തയ്യാറാക്കുന്ന വിധം

ഗ്രേറ്റ് ചെയ്തെടുത്ത ബീറ്റ്റൂട്ട്, വെള്ളം, പട്ട, ഗ്രാമ്പൂ, ഇഞ്ചി ചതച്ചത് എന്നിവ കുക്കറില്‍ ഹൈ ഫ്ലേമിൽ നന്നായി വേവിച്ചെടുക്കുക.

കുക്കർ നന്നായി തണുത്ത് കഴിയുമ്പോൾ തുറന്ന് വെന്ത ബീറ്റ് റൂട്ട് അരിച്ച് പാത്രത്തിലേക്ക് ഒഴിക്കുക.

അരിച്ചു വെച്ചതിലേക്ക് ഒന്നേമുക്കാൽ കപ്പ് പഞ്ചസാര ചേർക്കുക. മധുരം കുറവ് വേണ്ടവരും കൂടുതൽ വേണ്ടവരും അതിന് അനുസരിച്ച് ചേർക്കുക.

പഞ്ചസാര അലിഞ്ഞ് കഴിയുമ്പോൾ ഒരു മുക്കാൽ ടീ സ്പൂൺ യീസ്റ്റ് ചേർത്ത് കൊടുക്കുക. ആവശ്യമുള്ളവർക്ക് ഗോതമ്പ് ചേർക്കാവുന്നതാണ്.

കുറച്ച് സമയം ഇളക്കുമ്പോൾ യീസ്റ്റ് ഇതിലേക്ക് ലയിക്കും. അതിനു ശേഷം കുപ്പിയിലേക്കോ പാത്രത്തിലേക്കോ പകർന്നു വെക്കുക.

കുപ്പിയിൽ ആയാലും പാത്രത്തിൽ ആയാലും ഒരു മുക്കാൽ ഭാഗം മാത്രം നിറയ്ക്കുക.

എപ്പോഴാണോ കുപ്പിയിൽ നിറച്ച് വെച്ചത് പിറ്റേന്ന് അതേസമയം തന്നെ ഇത് എടുത്ത്, തുറന്ന് നന്നായി ഇളക്കി കൊടുക്കുക.

ഇളക്കുന്ന സ്പൂണിൽ വെള്ളത്തിന്റെ അംശം ഉണ്ടാകരുത്. ഒന്ന് ഇളക്കിയതിനു ശേഷം വീണ്ടും അടച്ചു വെക്കുക.

രണ്ടാമത്തെ ദിവസവും ഇതേപോലെ ഇളക്കി വെയ്ക്കുക.

മൂന്നാമത്തെ ദിവസം വൈൻ എടുത്ത് ഒരു ഫണൽ വച്ച് അതിനുമുകളിൽ ഒരു വെള്ളത്തുണി വെച്ച് അരിച്ചൊഴിക്കുക.

അതിനു ശേഷം കുപ്പികളിൽ വൈൻ സൂക്ഷിച്ചു വെക്കാവുന്നതാണ്.

വൈൻ ഉണ്ടാക്കുന്നതിന് ഉപയോ​ഗിക്കുന്ന പാത്രങ്ങളും സ്പൂണുകളും തുണിയുമെല്ലാം നല്ല വൃത്തിയുള്ളതും ഈർപ്പം ഒട്ടും ഇല്ലാത്തതും ആയിരിക്കണം.