ഇഞ്ചിക്കറിയില്ലാത്ത ഓണസദ്യയില്ല, ഉണ്ടാക്കാന്‍ ചില ടിപ്സ് ഇതാ

മധുരവും പുളിയും ചേർന്ന കേരളീയ വിഭവമാണ് ഇഞ്ചി കറി

ഓണ സദ്യയ്ക്ക് എളുപ്പം ഒരുക്കാം സ്വാദിഷ്ടമായൊരു ഇഞ്ചിക്കറി.

ചേരുവകൾ

• ഇഞ്ചി,പുളി , മഞ്ഞൾ പൊടി , മുളകുപൊടി, പച്ചമുളക് , കടുക് ,വറ്റൽ മുളക് , വെള്ളം , ശർക്കര, ഉപ്പ്, വെളിച്ചെണ്ണ,കറിവേപ്പില

തയ്യാറാക്കുന്ന വിധം

പുളി, വെള്ളത്തിൽ ഇട്ടു നന്നായി പിഴിഞ്ഞ് അരിച്ചെടുത്തു വയ്ക്കണം.

ഇഞ്ചി രണ്ടു ടേബിൾസ്പൂൺ ചെറുതായി മുറിച്ചെടുക്കണം.

ബാക്കി ഇഞ്ചി കനം കുറച്ചു വറുക്കാൻ കഷണങ്ങളാക്കി എടുക്കണം.

ഒരു ഫ്രൈയിങ് പാനിൽ വെളിച്ചെണ്ണ ഒഴിച്ച് ചൂടായി വരുമ്പോൾ വറുക്കാനുള്ള ഇഞ്ചി ചേർത്തു നല്ല ക്രിസ്‍പി ആകുന്നതു വരെ വറത്തു വെളിച്ചെണ്ണയിൽ നിന്നും കോരി മാറ്റണം.

ഈ ഇഞ്ചി തണുക്കുമ്പോൾ പൊടിച്ചു വയ്ക്കണം.

വറുത്ത വെളിച്ചെണ്ണയിലേക്ക് ചെറുതാക്കി മുറിച്ച ഇഞ്ചി, പച്ചമുളക്, കറിവേപ്പില എന്നിവ ചേർത്ത് നന്നായി മൊരിഞ്ഞു വരുമ്പോൾ ഇതിലേക്കു പുളി വെള്ളം ചേർത്തു കൊടുക്കുക.

പുളി വെള്ളത്തിലേക്കു മഞ്ഞൾ പൊടി, മുളകുപൊടി, ഉപ്പ്, ശർക്കര എന്നിവ ചേർത്തു യോജിപ്പിക്കുക.

പുളി വെള്ളം തിളച്ചു കുറുകി വരുമ്പോൾ വറത്തു പൊടിച്ച ഇഞ്ചി കൂടി ചേർത്തു യോജിപ്പിക്കുക. ഇനി ഇഞ്ചിക്കറി സ്റ്റൗവിൽ നിന്നും മാറ്റാം.

ഒരു ചെറിയ ഫ്രൈയിങ് പാനിൽ വെളിച്ചെണ്ണ ഒഴിച്ച് ചൂടാക്കി കടുകും വറ്റൽ മുളകും കറിവേപ്പിലയും ചേർത്തു മൂപ്പിച്ച ശേഷം ഇഞ്ചി കറിയിലേക്കു ചേർത്തു കൊടുക്കാം.