ഹാര്‍ട്ട് അറ്റാക്ക് മൂലമുള്ള നെഞ്ചുവേദന എങ്ങനെ തിരിച്ചറിയാം?

ഹൃദയാഘാതത്തിന്‍റെ ഏറ്റവും പ്രധാനപ്പെട്ട ലക്ഷണമാണ് നെഞ്ചുവേദന.

എന്നാല്‍ ഗ്യാസ്ട്രബിള്‍ അടക്കം പല അവസ്ഥകളിലും നെഞ്ചുവേദന അനുഭവപ്പെടാം എന്നതിനാല്‍ ഹൃദയാഘാതത്തിന്‍റെ നെഞ്ചുവേദന തിരിച്ചറിയാതെ പോകാനുള്ള സാധ്യതകളേറെയാണ്.

എങ്ങനെ ഹാര്‍ട്ട് അറ്റാക്ക് മൂലമുള്ള നെഞ്ചുവേദന തിരിച്ചറിയാം എന്ന് നോക്കാം.

ഹൃദയാഘാതത്തിന്‍റെ നെഞ്ചുവേദന സാധാരണഗതിയില്‍ നെഞ്ചിന്‍റെ നടുഭാഗത്ത് നിന്ന് തുടങ്ങി ഇടതുഭാഗത്തേക്ക് വ്യാപിക്കുന്നതായിരിക്കും.

നെഞ്ചില്‍ നല്ലരീതിയില്‍ സമ്മര്‍ദ്ദം, ഭാരം, ശ്വാസം കിട്ടാത്തത് പോലുള്ള അവസ്ഥ, ഇറുക്കം എന്നിവ അനുഭവപ്പെടാം. ചിലര്‍ക്ക് നെഞ്ചില്‍ തന്നെ കാര്യമായ രീതിയില്‍ എരിച്ചിലും ഇതിനൊപ്പം അനുഭവപ്പെടാം.

ഹൃദയാഘാതത്തില്‍ ചിലരില്‍ നെഞ്ചിലെ വേദന കൈകളിലേക്കും കഴുത്ത്, തോള്‍ഭാഗം, മുതുക് എന്നീ ഭാഗങ്ങളിലേക്കും കീഴ്ത്താടിയിലുമെല്ലാം വേദന പടര്‍ന്നെത്താം.

ചിലർക്ക് അനുഭവപ്പെടുന്ന ഹൃദയാഘാതത്തിലെ വേദന ഏതാനും നിമിഷത്തേക്ക് നീണ്ടുനിന്ന് പിന്നെ വന്ന് പോയി വരുന്ന രീതിയായിരിക്കാം.

നെഞ്ചുവേദനയ്ക്കൊപ്പം തന്നെ നേരത്തെ സൂചിപ്പിച്ചത് പോലെ ശ്വാസതടസം, അമിതമായ വിയര്‍പ്പ്, ഓക്കാനം/ ഛര്‍ദ്ദി എന്നിങ്ങനെയുള്ള ലക്ഷണങ്ങളും ഹൃദയാഘാതത്തില്‍ കാണാം. അതിനാല്‍ ഇവയും ശ്രദ്ധിക്കേണ്ടതാണ്.

അതേസമയം ഇനി നെഞ്ചിലോ പുറത്തോ കഴുത്തിലോ കൈകളിലോ വേദന അനുഭവപ്പെട്ടാല്‍ ഉടൻ തന്നെ അത് ഹൃദയാഘാതം ആയിരിക്കുമെന്ന സ്വയം നിര്‍ണയവും വേണ്ട.