സ്റ്റെയിൻലെസ്സ് സ്റ്റീൽ പാത്രങ്ങളിലെ കറകൾ മാറ്റി തിളക്കം വീണ്ടെടുക്കാം

ഈടുനിൽപ്പിന്‍റെ കാര്യത്തിൽ സ്റ്റെയിൻലെസ്സ് സ്റ്റീൽ പാത്രങ്ങളെ തോൽപ്പിക്കാൻ വേറൊന്നിനുമാവില്ല.

കുറച്ചുകാലം ഈ പാത്രങ്ങൾ ഉപയോഗിച്ച് കഴിയുമ്പോൾ പാത്രങ്ങളുടെ പിടികൾ ചേരുന്ന ഭാഗങ്ങളിലും മറ്റ് ഇടുക്കുകളിലും കറുത്ത കട്ടിയുള്ള അഴുക്ക് അടിഞ്ഞുകൂടുന്നതും നിറം മങ്ങുന്നതും ഒരു സ്ഥിരം പ്രശ്നമാണ്.

ഭക്ഷണാവശിഷ്ടങ്ങൾ, എണ്ണ, ഡിറ്റർജൻ്റ് എന്നിവയുടെ അംശങ്ങൾ ചേർന്ന് രൂപപ്പെടുന്ന ഈ കടുംകറകൾ വൃത്തിയാക്കാൻ പ്രയാസമാണ്.

എങ്കിലും വീട്ടിൽ എളുപ്പത്തിൽ ലഭ്യമായ ചില വസ്തുക്കൾ ഉപയോഗിച്ച് ഇവയെ നീക്കം ചെയ്യാനും പാത്രങ്ങളുടെ തിളക്കം വീണ്ടെടുക്കാനും സാധിക്കും.

ബേക്കിങ് സോഡയും വിനാഗിരിയും

ബേക്കിംഗ് സോഡയിൽ വിനാഗിരി ചേർത്ത് കട്ടിയുള്ള പേസ്റ്റ് തയ്യാറാക്കി കറുത്ത അഴുക്കിൽ തേച്ചുപിടിപ്പിക്കുക. 20–30 മിനിറ്റ് കഴിഞ്ഞ് പഴയ ടൂത്ത് ബ്രഷ് കൊണ്ട് ഉരച്ച് ശുദ്ധജലത്തിൽ കഴുകി ഉണക്കാം.

നാരങ്ങാനീരും ഉപ്പും

ഒരു ടേബിൾസ്പൂൺ നാരങ്ങാനീരിൽ ഒരു ടീസ്പൂൺ ഉപ്പ് ചേർത്ത് ഈ മിശ്രിതം തയ്യാറാക്കി ടൂത്ത് ബ്രഷ് ഉപയോഗിച്ച് കറകളിൽ തേച്ചുരച്ച് കഴുകുക

ചൂടുവെള്ളവും ഡിഷ്‌വാഷും

പാത്രം ഒരു ബേസിനിൽ വെച്ച് തിളച്ച വെള്ളം ഒഴിച്ച് അതിലേക്ക് അൽപ്പം പാത്രം കഴുകുന്ന ഡിറ്റർജൻ്റ് ചേർക്കുക. പാത്രം ഒരു മണിക്കൂറെങ്കിലും ഈ വെള്ളത്തിൽ കുതിർക്കാൻ വെച്ച ശേഷം ടൂത്ത് ബ്രഷ് ഉപയോഗിച്ച് വൃത്തിയാക്കിയാൽ അഴുക്ക് എളുപ്പത്തിൽ നീക്കം ചെയ്യാൻ സാധിക്കും.

തിളപ്പിച്ച വെള്ളവും ബേക്കിംഗ് സോഡയും

വൃത്തിയാക്കാനുള്ള പാത്രത്തിൽ കുറച്ച് വെള്ളം എടുത്തതിന് ശേഷം അതിലേക്ക് ബേക്കിംഗ് സോഡയിട്ട് നന്നായി തിളപ്പിക്കണം. തണുപ്പ് ആറിക്കഴിഞ്ഞാൽ സ്പോഞ്ച് ഉപയോഗിച്ച് നന്നായി ഉരച്ച് കഴുകിയാൽ മതി.

സ്റ്റീൽ സ്‌ക്രബ്ബറുകൾ വേണ്ട

ഇവ വൃത്തിയാക്കുമ്പോള്‍ പാത്രങ്ങളുടെ ഉപരിതലത്തിൽ പോറലുകൾ വീഴാതിരിക്കാൻ പരുപരുത്ത സ്റ്റീൽ സ്‌ക്രബ്ബറുകൾ ഉപയോഗിക്കുന്നത് ഒഴിവാക്കണം