ചമ്മന്തിപ്പൊടി കേടാവാതെ സൂക്ഷിക്കാം

മിക്ക വീടുകളിലും എപ്പോഴുമുണ്ടാവുന്നതാണ് ചമ്മന്തിപ്പൊടി.

ചോറിനൊപ്പവും ഇഡ്ഡലി, ദോശ തുടങ്ങിയ പലഹാരങ്ങൾക്കൊപ്പവും കഴിക്കാമെന്ന് കരുതി നമ്മൾ ഒത്തിരി അളവിൽ ഇവ വാങ്ങിക്കുകയോ അല്ലെങ്കിൽ വീട്ടിൽ ഉണ്ടാക്കുകയോ ചെയ്യും.

എന്നാൽ ശരിയായ രീതിയിൽ ഇവ ഉപയോ​ഗിച്ചില്ലെങ്കിൽ പെട്ടന്ന് കേടുവന്ന് പോകുകയും ചെയ്യും.

ചില കാര്യങ്ങൾ ശ്രദ്ധിച്ചാൽ ചമ്മന്തിപ്പൊടി നമുക്ക് കുറേ കാലം കേടുവരാതെ സൂക്ഷിക്കാം.

ചമ്മന്തിപ്പൊടി എപ്പോഴും വായു കടക്കാത്ത പാത്രത്തിൽ സൂക്ഷിക്കണം. എത്ര കാലം വേണമെങ്കിലും കേടാവാതിരിക്കും.

കുപ്പിയിൽനിന്ന് ചമ്മന്തിപ്പൊടി എടുക്കുമ്പോൾ, സ്പൂണിൽ അല്പം പോലും ഈർപ്പമില്ലെന്ന് ഉറപ്പുവരുത്തണം.

മുളകുപൊടിയും മല്ലിപ്പൊടിയും വറുത്തെടുക്കുമ്പോൾ, കരിയാതെ സൂക്ഷിക്കണം. കരിഞ്ഞുപോയാൽ അതിന്റെ രുചി നഷ്ടപ്പെടും.

തേങ്ങ നന്നായി വറുത്തെടുക്കാൻ ശ്രദ്ധിക്കണം. എങ്കിലേ രുചികരമായ പൊടി ലഭിക്കൂ. തേങ്ങയിലെ എല്ലാ ഈർപ്പവും പോവാനും ഇങ്ങനെ വറുത്തെടുക്കുന്നത് സഹായിക്കും.

പൊടി മുഴുവൻ ഒരു ജാറിൽ സൂക്ഷിക്കുന്നതിനുപകരം, രണ്ടോ മൂന്നോ ജാറുകളിലാക്കി ഫ്രിഡ്ജിൽ വെക്കാം.