ജലദോഷമുള്ളപ്പോള്‍ തൈര് കഴിക്കുന്നത് പ്രശ്‌നമാണോ?

ജലദോഷമുള്ളപ്പോള്‍ തൈര് കഴിക്കുന്നത് അപകടമാണെന്ന് മുതിര്‍ന്നവര്‍ പറയുന്നത് കേട്ടിട്ടില്ലേ?

ചൂടുവെള്ളവും, ചുക്കുകാപ്പിയുമെല്ലാം കഴിച്ച് തൊണ്ടവേദനയും ജലദോഷവും അകറ്റാന്‍ ശ്രമിക്കുന്നതിനിടെ അല്‍പം തൈര് കഴിച്ചാല്‍ ആകെ പണി കിട്ടുമെന്നാണ് മിക്കവരും പറയുന്നത്.

ശരിക്കും ജലദോഷമുള്ളപ്പോള്‍ തൈര് കഴിക്കുന്നത് യഥാര്‍ത്ഥത്തില്‍ പ്രശ്‌നമാണോ? നോക്കാം.

നിരവധി ഗവേഷണങ്ങള്‍ ഈ വിഷയത്തില്‍ നടന്നിട്ടുണ്ട്. നടന്ന ഗവേഷണങ്ങളുടെയെല്ലാം ഫലം പരിശോധിക്കുകയാണെങ്കില്‍ ജലദോഷമുള്ളപ്പോള്‍ തൈര് കഴിക്കുന്നത് നല്ലതാണെന്നാണ് ഒരു വിഭാഗം പറയുന്നത്.

തൈരിലടങ്ങിയിരിക്കുന്ന 'പ്രോബയോട്ടിക്‌സ്' ശരീരത്തിന്റെ പ്രതിരോധനില ശക്തിപ്പെടുത്തുമെന്നാണ് പഠനങ്ങൾ പറയുന്നത്.

തൈരിലുള്ള സിങ്ക്, കാര്‍ബോഹൈഡ്രേറ്റ്‌സ്- എന്നിവ യഥാക്രമം പ്രതിരോധശേഷി കൂട്ടാനും എനര്‍ജി നല്‍കാനും സഹായിക്കുന്നു. ശരീരം ഊര്‍ജ്ജസ്വലമാകുന്നതോടെ അണുക്കളെ തുരത്താന്‍ അതിന് കുറെക്കൂടി സാധ്യമാകുമെന്നും ഗവേഷകര്‍ അഭിപ്രായപ്പെടുന്നു.

തൈര് ഇഷ്ടമാണെങ്കിൽ തണുപ്പിച്ച് കഴിക്കാതിരിക്കുക. റഫ്രിജറേറ്ററിൽ നിന്നും എടുത്ത തൈര് പൂർണ്ണമായും തണുപ്പ് പോയതിന് ശേഷം മാത്രം കഴിക്കുക.

തൈര് കഴിക്കുമ്പോൾ അതിൽ കുരമുളകോ ഒരു നുള്ള് മഞ്ഞളോ ചേർക്കുന്നത് തണുപ്പിൽ നിന്നുണ്ടാകുന്ന പ്രശ്നങ്ങളെ അകറ്റി നിർത്തുകയും ദഹനം എളുപ്പമാക്കുകയും ചെയ്യുന്നു.

ജലദോഷം ഉള്ളപ്പോൾ തൈര് കഴിക്കാമെങ്കിലും അമിതമായി കഴിക്കരുത്. തൈര് കഴിക്കുന്നതിലൂടെ ജലദോഷത്തിന്റെ ലക്ഷണങ്ങൾ വഷളാക്കുന്നുണ്ടെങ്കിൽ അത് ഒഴിവാക്കുന്നതാണ് ഏറ്റവും ഉചിതം.