സ്വപ്നം ഓർത്തു വെയ്ക്കുന്നത് മോശം ഉറക്കത്തിന്റെ ലക്ഷണമോ? അറിയാം പിന്നിലെ ശാസ്ത്രം

ഉറങ്ങുമ്പോൾ സ്വപ്നം കാണുന്നത് എല്ലാവർക്കും സ്വാഭാവികമായ അനുഭവമാണ്. എന്നാൽ സ്വപ്നങ്ങൾ നമ്മുടെ ഉറക്കത്തിന്റെ ഗുണനിലവാരത്തെ ബാധിക്കുമോ? പ്രത്യേകിച്ച് പേടിപ്പെടുത്തുന്ന സ്വപ്നങ്ങൾ ഉറക്കത്തെ മോശമാക്കുമോ?

പതിവായി പേടിപ്പെടുത്തുന്ന സ്വപ്നങ്ങൾ കാണുന്നവരിൽ ഉറക്കത്തിന്റെ ഗുണനിലവാരം മോശമാകാനുള്ള സാധ്യത കൂടുതലാണെന്ന് ഗവേഷണങ്ങൾ സൂചിപ്പിക്കുന്നു. ദുസ്വപ്നം കാണുമ്പോൾ ഭയവും ഉത്കണ്ഠയും വർധിക്കാം. ഇതോടെ വീണ്ടും ഉറങ്ങാൻ ബുദ്ധിമുട്ടുണ്ടാകാനും സാധ്യതയുണ്ട്.

ഒരു പേടിസ്വപ്നത്തിനിടെ ഉണർന്നാൽ ഉറക്കത്തിന്റെ തുടർച്ച നഷ്ടപ്പെടും. പ്രത്യേകിച്ച് രാത്രി പലതവണ ഇത്തരം സ്വപ്നങ്ങൾ കണ്ട് ഉണരുന്നത് അടുത്ത ദിവസത്തെ ക്ഷീണത്തിനും ഉറക്കമില്ലായ്മക്കും കാരണമാകാം. ഉറക്കത്തിലേക്ക് തിരിച്ചുപോകാനും ചിലപ്പോൾ സമയം വേണ്ടിവരും.

മോശം സ്വപ്നങ്ങൾ ഉറക്കത്തെ ബാധിക്കാം. അതുപോലെ തന്നെ മോശമായ ഉറക്കം സ്വപ്നങ്ങളെ കൂടുതൽ ഓർത്തുവയ്ക്കാനും കാരണമാകും.

പലപ്പോഴും നമ്മൾ സ്വപ്നം കണ്ടുവെന്ന് പോലും അറിയാതെ രാവിലെ എഴുന്നേൽക്കും. എന്നാൽ സ്വപ്നത്തിനിടയിൽ ഉണർന്നാൽ അതിന്റെ ചില ഭാഗങ്ങൾ ഓർമയിൽ തുടരാനുള്ള സാധ്യത കൂടുതലാണ്.

അതിനാൽ “ഇന്നലെ രാത്രി ഒരുപാട് സ്വപ്നങ്ങൾ കണ്ടു” എന്ന് തോന്നുന്നത് യഥാർഥത്തിൽ കൂടുതൽ സ്വപ്നങ്ങൾ കണ്ടതുകൊണ്ടാകണമെന്നില്ല. രാത്രിയിൽ പലതവണ ഉണർന്നതുകൊണ്ട് കൂടുതൽ സ്വപ്നങ്ങൾ ഓർമയിൽ നിൽക്കുന്നതുകൊണ്ടാകാം.

ഒരാൾ രാത്രിയിൽ പലതവണ ഉണരുകയാണെങ്കിൽ ഉറക്കത്തിന്റെ തുടർച്ച നഷ്ടപ്പെടും. ഓരോ ഉണർച്ചയിലും അതിന് തൊട്ടുമുമ്പ് കണ്ട സ്വപ്നത്തിന്റെ ഓർമ തലച്ചോറിൽ നിലനിൽക്കാനുള്ള സാധ്യതയുണ്ട്. സ്വപ്നങ്ങൾ കൂടുതലായി ഓർമിക്കുന്നത് എല്ലായ്പ്പോഴും നല്ല ഉറക്കത്തിന്റെ ലക്ഷണമല്ല.