കറപിടിച്ച പ്ലാസ്റ്റിക് ബക്കറ്റാണോ? പുതിയത് പോലെ തിളങ്ങാൻ ഈ വിദ്യകൾ പരീക്ഷിക്കാം

ദിവസവും ഉപയോഗിക്കുന്ന പ്ലാസ്റ്റിക് ബക്കറ്റുകൾ കുറച്ചുനാൾ കഴിയുമ്പോൾ നിറം മങ്ങിയും മഞ്ഞക്കറയും വെള്ളക്കറയും പിടിച്ചും വൃത്തികേടായി തോന്നുന്നത് സാധാരണമാണ്. സോപ്പിന്റെ അവശിഷ്ടങ്ങൾ, അഴുക്ക്, കട്ടിയുള്ള വെള്ളത്തിലെ ധാതുക്കൾ എന്നിവയാണ് പലപ്പോഴും ബക്കറ്റിന്റെ പ്രതലത്തിൽ ഇത്തരം പാടുകൾ ഉണ്ടാക്കുന്നത്.

എന്നാൽ കറ പിടിച്ചു തുടങ്ങിയെന്ന് കരുതി ബക്കറ്റ് ഉടൻ മാറ്റേണ്ടതില്ല. വീട്ടിൽ സാധാരണയായി ലഭിക്കുന്ന ചില സാധനങ്ങൾ ഉപയോഗിച്ച് തന്നെ ബക്കറ്റിലെ പലതരം കറകളും വൃത്തിയാക്കാം.

ഹാർഡ് വാട്ടർ മൂലമുണ്ടാകുന്ന വെള്ളക്കറ നീക്കാൻ വിനാഗിരിയും ബേക്കിങ് സോഡയും ഉപയോഗിക്കാം. കറയുള്ള ഭാഗത്ത് അൽപം വിനാഗിരി പുരട്ടി കുറച്ച് സമയം വയ്ക്കുക. പിന്നീട് ചെറിയ അളവിൽ ബേക്കിങ് സോഡ ചേർത്ത് മൃദുവായ സ്പോഞ്ച് ഉപയോഗിച്ച് പതുക്കെ ഉരയ്ക്കാം. ശേഷം വെള്ളത്തിൽ കഴുകിയെടുക്കുക.

ബക്കറ്റിലെ മഞ്ഞ നിറത്തിലുള്ള കറകൾ നീക്കാൻ നാരങ്ങയും ഉപ്പും സഹായിക്കും. നാരങ്ങ പകുതിയായി മുറിച്ച് അതിന്റെ മുറിച്ച ഭാഗത്ത് അൽപം ഉപ്പ് വിതറുക. ഇത് കറയുള്ള ഭാഗത്ത് പതുക്കെ ഉരയ്ക്കാം. കുറച്ചുസമയം കഴിഞ്ഞ് വെള്ളത്തിൽ കഴുകുക. കറ കൂടുതൽ ശക്തമാണെങ്കിൽ സ്പോഞ്ച് ഉപയോഗിച്ച് വീണ്ടും വൃത്തിയാക്കാം.

ചില പ്രത്യേക ഭാഗങ്ങളിൽ മാത്രം കറ പിടിച്ചിട്ടുണ്ടെങ്കിൽ വെളുത്ത ടൂത്ത് പേസ്റ്റ് ഉപയോഗിക്കാം. കറയുള്ള ഭാഗത്ത് ചെറിയ അളവിൽ ടൂത്ത് പേസ്റ്റ് പുരട്ടി മൃദുവായ തുണിയോ സ്പോഞ്ചോ ഉപയോഗിച്ച് പതുക്കെ ഉരയ്ക്കുക. ശക്തമായി ഉരയ്ക്കുന്നത് പ്ലാസ്റ്റിക്കിൽ പോറലുകൾ ഉണ്ടാക്കാൻ സാധ്യതയുള്ളതിനാൽ ശ്രദ്ധിക്കണം.

എല്ലാ കറകളും കഠിനമായതായിരിക്കണമെന്നില്ല. പലപ്പോഴും സോപ്പിന്റെ അവശിഷ്ടങ്ങളും സാധാരണ അഴുക്കുമാണ് ബക്കറ്റിനെ വൃത്തികെട്ടതായി തോന്നിപ്പിക്കുന്നത്. ഇത്തരം സാഹചര്യത്തിൽ വെള്ളത്തിൽ അൽപം ഡിഷ് വാഷിങ് ലിക്വിഡ് ചേർത്ത് മൃദുവായ സ്പോഞ്ച് ഉപയോഗിച്ച് ബക്കറ്റിന്റെ അകവും പുറവും വൃത്തിയാക്കിയാൽ മതിയാകും.

വൃത്തിയാക്കാൻ ബുദ്ധിമുട്ടുള്ള അഴുക്കിൽ പഞ്ചസാരയും ഐസും ഉപയോഗിക്കുന്ന രീതിയും വിദഗ്ദ്ധർ നിർദേശിക്കുന്നു. കറയുള്ള ഭാഗത്ത് ചെറിയ അളവിൽ പഞ്ചസാര വിതറി കുറച്ച് ഡിഷ് വാഷിങ് ലിക്വിഡ് ചേർക്കുക. തുടർന്ന് ഐസ് ക്യൂബ് ഉപയോഗിച്ച് ഏതാനും മിനിറ്റ് പതുക്കെ ഉരയ്ക്കാം. ശേഷം വെള്ളത്തിൽ കഴുകി നന്നായി ഉണക്കണം.

ബക്കറ്റ് ഓരോ തവണ ഉപയോഗിച്ചശേഷവും വെള്ളത്തിൽ ഒന്ന് കഴുകുന്നത് സോപ്പിന്റെയും അഴുക്കിന്റെയും അവശിഷ്ടങ്ങൾ അടിഞ്ഞുകൂടുന്നത് കുറയ്ക്കും. കഴുകിയ ശേഷം തലകീഴായി വച്ച് വെള്ളം പൂർണമായി ഒഴുകിപ്പോകാനും ഉണങ്ങാനും അനുവദിക്കുന്നതും നല്ലതാണ്.

പ്ലാസ്റ്റിക് ബക്കറ്റ് വൃത്തിയാക്കുമ്പോൾ കട്ടിയുള്ള സ്ക്രബറുകൾ ഒഴിവാക്കി മൃദുവായ സ്പോഞ്ചോ തുണിയോ ഉപയോഗിക്കുന്നതാണ് നല്ലത്. അമിതമായി ഉരയ്ക്കുന്നത് പ്ലാസ്റ്റിക്കിൽ പോറലുകൾ ഉണ്ടാക്കുകയും പിന്നീട് അഴുക്ക് അടിഞ്ഞുകൂടാൻ ഇടയാക്കുകയും ചെയ്യാം.