രുചിയിൽ മാങ്ങയെ തോൽപ്പിക്കും, കോവയ്ക്ക ഉപ്പിലിട്ടാലോ

വിറ്റാമിനുകളും ധാതുക്കളും അടങ്ങിയ പോഷകസമൃദ്ധമായ പച്ചക്കറിയാണ് കോവയ്ക്ക. തോരൻ വച്ചും മെഴുക്കുപുരട്ടി ആക്കിയുമൊക്കെ ഉച്ചയ്ക്കത്തെ ചോറുംപാത്രത്തിൽ കോവയ്ക്ക വിഭവങ്ങൾ സ്ഥിരമായിരിക്കും.

നാട്ടിൻപുറങ്ങളിലെ മിക്ക വീടുകളിലും കോവയ്ക്ക വള്ളികൾ പടർന്നിട്ടുണ്ടാവും. പോഷകങ്ങളുടെ കലവറ കൂടിയാണ് കോവയ്ക്ക.

കോവയ്ക്കയുടെ മറ്റു വിഭവങ്ങളെക്കാൾ രുചിയാണ് കോവയ്ക്ക ഉപ്പിലിട്ടത്. അധികം ചേരുവകൾ ഇല്ലാതെ കോവയ്ക്ക് ഉപ്പിലിട്ടാലോ?

കോവയ്ക്ക, വിനാ​ഗിരി, ഉപ്പ്, പച്ചമുളക്, ചൂടുവെള്ളം എന്നിവയാണ് ആവശ്യമായ ചേരുവകൾ.

കോവയ്ക്ക ഉപ്പിലിടാൻ അവ കഷ്ണമാക്കേണ്ടതില്ല. മുഴുവനായി തന്നെ ഉപയോ​ഗിക്കാവുന്നതാണ്. കോവയ്ക്കയിൽ ഇടയ്ക്ക് ചെറിയ കീറലുകൾ ഇട്ടുകൊടുക്കാവുന്നതാണ്. ഇത് പെട്ടെന്ന് ഉപ്പ് പിടിക്കാൻ സഹായിക്കും.

നന്നായി കഴുകി വൃത്തിയാക്കിയ ​ഗ്ലാസ് ജാർ തുടച്ചെടുക്കാം. അതിലേക്ക് കഴുകി ഈർപ്പം കളഞ്ഞ കോവയ്ക്ക നിറയ്ക്കാം. പിന്നാലെ ഉപ്പും പച്ചമുളകും ചേർക്കാം. അതിനൊപ്പം വിനാ​ഗിരിയും ഒഴിച്ചു കൊടുക്കാം.

പിന്നാലെ കോവയ്ക്ക് മുങ്ങി കിടക്കുന്ന അളവിൽ തിളപ്പിച്ചാറിയ വെള്ളം ഒഴിച്ചു കൊടുക്കാം. കോവയ്ക്ക കട്ടിയുള്ളതായതിനാൽ ഇവ പെട്ടെന്ന് ഉപ്പ് പിടിക്കാൻ താമസമുണ്ട്. അതുകൊണ്ട് നാല്-അഞ്ച് ദിവസത്തിന് ശേഷം ഉപയോ​ഗിക്കുന്നതാണ് നല്ലത്.