പെരുന്നാളിന് നല്ല നാടൻ മലബാർ സ്റ്റൈൽ ബീഫ് വരട്ടിയത് ഉണ്ടാക്കാം

ബീഫ് എന്നു കേള്‍ക്കുമ്പോഴേ വായില്‍ വെള്ളമൂറുന്നവരാണ് നമ്മൾ മലയാളികൾ.

ഇത്തവണത്തെ പെരുന്നാളിന് മലബാറിലെ പരമ്പരാഗത വിഭവങ്ങളിലൊന്നായ ബീഫ് വരട്ടിയത് പരീക്ഷിച്ചാലോ.

ചേരുവകൾ

ബീഫ് – അരക്കിലോ

ഉലുവ – അര സ്പൂൺ

ചെറിയ ഉള്ളി – 6

കുരുമുളകുപൊടി – 2 സ്പൂൺ

കറിവേപ്പില – 12 തണ്ട്

മല്ലിയില

തക്കാളി – 2

വെളുത്തുള്ളി – 6

ഇഞ്ചി – 1 ചെറിയ കഷ്ണം

പച്ചമുളക് – 2

സവാള – 2

മല്ലിപ്പൊടി – 2 സ്പൂൺ

മുളകുപൊടി – 1 സ്പൂൺ

മഞ്ഞൾപ്പൊടി – അര സ്പൂൺ

ഗരം മസാല – അര സ്പൂൺ

പെരുംജീരകം – അര സ്പൂൺ

വെളിച്ചെണ്ണ – ഒരു കപ്പ്

തേങ്ങാക്കൊത്ത്- അലങ്കാരത്തിന്

തയാറാക്കുന്ന വിധം

മഞ്ഞൾപ്പൊടിയും ഉപ്പും മല്ലിപ്പൊടിയും ചേർത്ത് ബീഫ് കുക്കറിൽ വേവിക്കുക.

ഗ്യാസ് സ്റ്റൗവിൽ മൺചട്ടി ചൂടാക്കി വെളിച്ചെണ്ണ ഒഴിക്കുക. ചൂടായിവരുമ്പോൾ അതിലേക്കു ഉലുവയും ചെറിയ ഉള്ളിയും ചേര്‍ത്ത് വഴറ്റുക. ഇതിലേക്കു സവാള അരിഞ്ഞുവെച്ചത് ഇടുക.

സവാള നന്നായി വാടിയതിനുശേഷം മല്ലിപ്പൊടി 2 സ്പൂൺ, മുളകുപൊടി 1 സ്പൂൺ, മഞ്ഞൾപ്പൊടി 1/ 2 സ്പൂൺ, കുരുമുളക്പൊടി 1/ 2 സ്പൂൺ എന്നിവ ഇടുക അതിനു ശേഷം 1/2 ഗ്ലാസ് വെള്ളം ഒഴിച്ച് നന്നായി വറ്റിക്കുക.

ഇതിലേക്ക് തക്കാളി ചേർക്കാം. അടച്ചു വച്ച് നന്നായി വേവിക്കുക.

വെളുത്തുള്ളിയും ഇഞ്ചിയും ചതച്ചത് ഇതിലേക്ക് ചേർക്കാം. നന്നായി വാടിയ ശേഷം അതിലേക്കു ബീഫ് ഇടുക അതിന്റെ കൂടെ തന്നെ കുറച്ചു തിളപ്പിച്ച് വെള്ളം ചേർക്കാം.

ഇതിലേക്ക് മല്ലിയില ഇട്ട് വെള്ളം വറ്റുന്നതു വരെ മൂടി വയ്ക്കുക.വെള്ളം വറ്റിയതിനു ശേഷം ഗ്യാസ് ഓഫ് ചെയ്ത് തേങ്ങാക്കൊത്ത്, മല്ലിയില, കറിവേപ്പിലയും ചേർത്താൽ ബീഫ് വരട്ടിയത് റെഡി.