ഒരു കപ്പ് പർഫെക്റ്റ് ചായ ഉണ്ടാക്കാം

നമ്മളിൽ ചിലർക്കെങ്കിലും ചായ ഒരു മൂഡ് ചേഞ്ചറാണ്.

എന്നാൽ ചില സമയങ്ങളിൽ കിട്ടുന്ന ചായ രുചിയുടെ കാര്യത്തിൽ വളരെ മോശമാകുകയും, അത് നമ്മളു‌ടെ മൂഡ് കളയാനുള്ള സാഹചര്യം വരെ ഉണ്ടാക്കുകയും ചെയ്യാറുണ്ട്.

കൃത്യ സമയത്ത് ചേരുവകൾ ചേർക്കുന്നത് ചായയുടെ രുചിയും ആരോഗ്യ ഗുണങ്ങളും വർധിപ്പിക്കും.

വെള്ളം

ചായ ഉണ്ടാക്കാനുപയോഗിക്കുന്ന വെള്ളത്തിന്റെ അളവ് തെറ്റിയാൽ അത് ചായയുടെ രുചിയെ സാരമായി ബാധിക്കും. രണ്ട് കപ്പ് ചായക്ക് രണ്ട് കപ്പ് വെള്ളം മാത്രമേ ഉപയോഗിക്കേണ്ടതുള്ളൂ.

വെള്ളം നന്നായി തിളപ്പിക്കാൻ ശ്രദ്ധിക്കണം. ഇത് വെള്ളത്തിന്റെ പച്ചകലർന്ന രുചി നീക്കം ചെയ്യുകയും ചായയുടെ രുചി മെച്ചപ്പെടുത്തുവാനും സഹായിക്കും.

സുഗന്ധവ്യഞ്ജനം ചേർക്കുന്നത്

ഇഞ്ചിയോ മറ്റ് സുഗന്ധവ്യഞ്ജനങ്ങളോ ചേർക്കുകയാണെങ്കിൽ അവ ചേർക്കേണ്ടത് വെള്ളം തിളയ്ക്കുമ്പോഴാണ്. തിളച്ച വെള്ളത്തിൽ ഇഞ്ചിയോ സുഗന്ധവ്യഞ്ജനങ്ങളോ ചേർക്കുന്നത് ഇവ നന്നായി വെള്ളത്തിൽ ചേരാന്‍ സഹായിക്കും.

ചായപ്പൊടി

വെള്ളം തിളച്ചുവരുമ്പോഴാണ് ചായപ്പൊടി അല്ലെങ്കില്‍ ഇലകള്‍ ചേർക്കേണ്ടത്. ഈ 5 മിനിറ്റെങ്കിലും വെള്ളത്തിൽ കിടന്ന് തിളക്കാൻ സമയം നല്കുക. ഇത് ചായയുടെ നിറവും രുചിയും വർധിക്കാൻ സഹായിക്കും.

പാൽ ചേർക്കേണ്ട സമയം

വെള്ളം തിളയ്ക്കുന്ന പോയിന്റ് പകുതിയാകുമ്പോളാണ് ഒരു കപ്പ് പാൽ ചേർക്കേണ്ടത്. തണുത്ത പാൽ ചേർക്കുന്നത് ചായയുടെ താപനില പെട്ടെന്ന് കുറയാൻ കാരണമാകും, ഇത് രുചിയെ ബാധിക്കും. പാൽ ചേർത്തതിനുശേഷം, തീ കുറയ്ക്കുകയും ചായ നന്നായി തിളക്കാൻ അനുവദിക്കുകയും ചെയ്യുക.

പഞ്ചസാര

ചായപ്പൊടി തിളച്ചതിനുശേഷം മാത്രം പഞ്ചസാര ചേർക്കുക. അതുപോലെ പാൽ ഉപയോഗിക്കുന്നുണ്ടെങ്കിൽ പാൽ ചേർത്തതിനുശേഷമാണ് പഞ്ചസാര ചേർക്കേണ്ടത്.

ചായ തയ്യാറായാലുള്ള സൂചന

ചായ തയ്യാറായി എന്നതിന്റെ ഏറ്റവും നല്ല സൂചന അതിന്റെ കുമിളകളാണ്. വലിയ കുമിളകൾ ഉയരാൻ തുടങ്ങുകയും നിറം കൂടുകയും ചെയ്യുമ്പോൾ, നിങ്ങൾ ചായ കൃത്യമായി ഉണ്ടാക്കിയിരിക്കുന്നു എന്ന് മനസിലാക്കുക.