വിജയ്‌യുടെ ഇഷ്ട വിഭവം സക്കരൈ പൊങ്കൽ തയ്യാറാക്കാം

സിനിമയിലും രാഷ്ട്രീയത്തിലും വിജയക്കൊടി പാറിപ്പിച്ച വ്യക്തിയാണ് തമിഴ് നടൻ വിജയ്

അദ്ദേഹത്തിന്റെ അമ്മ ഉണ്ടാക്കുന്ന സക്കരൈ പൊങ്കലാണ് താരത്തിന്റെ ഇഷ്ട വിഭവങ്ങളിൽ ഒന്ന്.

മധുരവും നെയ്യിന്റെ മണവും നിറഞ്ഞ ഈ പരമ്പരാഗത ദക്ഷിണേന്ത്യൻ വിഭവം ഉത്സവകാലങ്ങളിലും പ്രത്യേക ദിവസങ്ങളിലും പ്രധാനിയാണ്.

വളരെ കുറച്ച് ചേരുവകൾ കൊണ്ട് വീട്ടിൽ തന്നെ എളുപ്പത്തിൽ തയ്യാറാക്കാനാകുന്ന സക്കരൈ പൊങ്കൽ നിങ്ങൾക്കും പരീക്ഷിക്കാം.

ആവശ്യമായ സാധനങ്ങൾ:

• പച്ചരി – 1/2 കപ്പ്

• ചെറുപയർ പരിപ്പ് – 1/4 കപ്പ്

• ശർക്കര – 1 മുതൽ 1.5 കപ്പ് വരെ (മധുരത്തിനനുസരിച്ച്)

• വെള്ളം – 3 കപ്പ്

• പാൽ – 1/4 കപ്പ്

• നെയ്യ് – 4-5 ടേബിൾസ്പൂൺ

• അണ്ടിപ്പരിപ്പ് – 8-10 എണ്ണം

• ഉണക്കമുന്തിരി – 1 ടേബിൾസ്പൂൺ

• ഏലയ്ക്കാപ്പൊടി – 1/2 ടീസ്പൂൺ

തയാറാക്കുന്ന വിധം

ആദ്യം ചെറുപയർ പരിപ്പ് ചുവന്ന നിറമാകുന്നതുവരെ ചെറുതീയിൽ വറുത്തെടുക്കുക.

വറുത്ത പരിപ്പും പച്ചരിയും നന്നായി കഴുകി, 3 കപ്പ് വെള്ളവും 1/4 കപ്പ് പാലും ചേർത്ത് പ്രഷർ കുക്കറിൽ വേവിക്കുക. 4-5 വിസിൽ വരുന്നത് വരെ കാത്തിരിക്കുക. ചോറും പരിപ്പും നന്നായി ഉടഞ്ഞു വരണം.

മറ്റൊരു പാത്രത്തിൽ ശർക്കര അൽപം വെള്ളം ചേർത്ത് ഉരുക്കിയെടുക്കുക. ഇതിലെ അഴുക്ക് കളയാൻ അരിച്ചെടുക്കുന്നത് നന്നായിരിക്കും.

വേവിച്ചു വെച്ചിരിക്കുന്ന അരി-പരിപ്പ് മിശ്രിതത്തിലേക്ക് ശർക്കര പാനി ചേർക്കുക. ഇത് ചെറിയ തീയിൽ 5-7 മിനിറ്റ് നന്നായി ഇളക്കി യോജിപ്പിക്കുക.

ശർക്കരപ്പാനിയിലേക്ക് ഏലയ്ക്കാപ്പൊടി ഒരു ടേബിൾസ്പൂൺ നെയ്യ് എന്നിവ ചേർത്ത് ഇളക്കുക.

ഒരു ചെറിയ പാനിൽ നെയ്യ് ചൂടാക്കി അണ്ടിപ്പരിപ്പും മുന്തിരിയും വറുത്തെടുക്കുക. ഇത് പൊങ്കലിന് മുകളിലേക്ക് ഒഴിച്ച് നന്നായി ഇളക്കുക.