അഞ്ജു
നമ്മുടെ ആരോഗ്യം നിലനിര്‍ത്തുന്നതില്‍ കരള്‍ ഒരു പ്രധാന പങ്ക് വഹിക്കുന്നു. ശരീരത്തിൽ നിന്ന് വിഷാംശം നീക്കി പോഷകങ്ങളുടെ സംസ്കരണ വരെ നിർവഹിക്കുന്നത് കരളാണ്. എന്നാൽ കരൾ സമ്മർദത്തിലാക്കുന്നത് ആരോഗ്യത്തെ സാരമായി ബാധിക്കാം.
വിട്ടുമാറാത്ത ക്ഷീണം
കരള്‍ തകരാറിലാകുന്നതിന്‍റെ പ്രാരംഭ ലക്ഷണങ്ങളില്‍ ഒന്നാണ് ക്ഷീണം. ഇത് ദൈനംദിന പ്രവര്‍ത്തനങ്ങളെ വരെ ബാധിക്കാം. കരള്‍ തകരാറിലാകുമ്പോള്‍ ശരീരത്തില്‍ നിന്ന് വിഷാംശം അരിച്ചു നീക്കാന്‍ പ്രയാസപ്പെടുന്നു. ഇത് ശരീരത്തില്‍ വിഷാംശം അടിഞ്ഞു കൂടാനും ഗുരുതര ആരോഗ്യ പ്രശ്നങ്ങള്‍ക്കും കാരണമാകുന്നു.
ദഹനക്കേട്
ഭക്ഷണത്തിന് ശേഷം, പ്രത്യേകിച്ച് കൊഴുപ്പുള്ള ഭക്ഷണങ്ങൾ കഴിച്ചതിന് ശേഷം പതിവായി വയറിളക്കം, ഓക്കാനം, അല്ലെങ്കിൽ അസ്വസ്ഥത അനുഭവപ്പെടുന്നത് കരൾ സമ്മർദത്തിലാകുന്നതിന്‍റെ ലക്ഷണമാകാം. കരൾ ആവശ്യത്തിന് ദഹന എൻസൈമുകൾ ഉൽപ്പാദിപ്പിക്കുന്നില്ലെന്നാണ് ഇത് സൂചിപ്പിക്കുന്നത്.
അടിവയറിന് ചുറ്റും കൊഴുപ്പ്
കരള്‍ തകരാറിലാകുന്നതിന്‍റെ മറ്റൊരു ലക്ഷണമാണ് അടിവയറിലുണ്ടാകുന്ന വീര്‍ക്കല്‍. അടിവയറ്റിന് ചുറ്റും കൊഴുപ്പ് കൂടുന്നതു കൊണ്ടാണ് ഇത് സംഭവിക്കുന്നത്. ഇത് ഫാറ്റി ലിവറിന്റെ ലക്ഷണങ്ങളാകാം. മദ്യപാനം, അനാരോഗ്യകരമായ ഭക്ഷണശീലം മാനസിക സമ്മർദം തുടങ്ങിയവയാണ് ഫാറ്റി ലിവറിന്റെ പ്രധാന കാരണങ്ങൾ.
ചർമത്തിലെ മാറ്റങ്ങൾ
ചർമത്തിൽ ചൊറിച്ചിൽ, മുഖക്കുരു, മഞ്ഞനിറം തുടങ്ങിയവ കരളിന്റെ മോശം ആരോഗ്യത്തെ സൂചിപ്പിക്കുന്നു. കരൾ തകരാറിലാകുമ്പോൾ രക്തത്തിൽ നിന്ന് വിഷാംശം അരിച്ചു നീക്കാൻ പ്രവർത്തനം മന്ദഗതിയിലാകുന്നു.
വിശപ്പും ആസക്തിയും
പഞ്ചസാര, കാർബോഹൈഡ്രേറ്റ് എന്നിവയോട് തീവ്രമായ ആസക്തി തോന്നുന്നതും കരളിന്റെ മോശം ആരോഗ്യത്തെ സൂചിപ്പിക്കുന്നു. ഗ്ലൂക്കോസ് മെറ്റബോളിസത്തെ നിയന്ത്രിക്കാൻ കരളിന് കഴിയാതെ വരുന്നു. ഇത് പെട്ടെന്ന് ഊർജ്ജം നൽകുന്ന പഞ്ചസാരയോട് ആസക്തിയും വിശപ്പും ഉണ്ടാക്കാം.
ഇരുണ്ടതോ നേരിയതോ ആയ മലം
മലത്തിന്റെ നിറവ്യത്യാസങ്ങൾ പിത്തരസ ഉൽപ്പാദനത്തെയോ പിത്തരസ സ്രവത്തെയോ പ്രതിഫലിപ്പിച്ചേക്കാം. സാധാരണയായി ഇത് കരൾ തകരാറിന്റെ ലക്ഷണമാണ്.