തിരഞ്ഞെടുപ്പുകൾ വിരലടയാളം പോലെയാണ്; അതാണെന്നെ അതുല്യമാക്കുന്നത്: ദീപിക പദുകോൺ

ഓരോരുത്തരുടെയും വിരലടയാളം വ്യത്യസ്തമായതുപോലെ, ജീവിതത്തിൽ നമ്മൾ എടുക്കുന്ന തീരുമാനങ്ങളും നമ്മളെ മറ്റുള്ളവരിൽ നിന്ന് വേറിട്ടുനിർത്തുന്നു.

എല്ലാവരും ഒരേ രീതിയിൽ ജീവിക്കണമെന്നില്ല. പഠനം, ജോലി, വിവാഹം, സൗഹൃദം, ജീവിതശൈലി തുടങ്ങി ഓരോ കാര്യത്തിലും സ്വന്തം സാഹചര്യങ്ങൾക്കനുസരിച്ച് തീരുമാനമെടുക്കാം.

ഒരാൾക്ക് മികച്ചതായി തോന്നുന്ന തീരുമാനം മറ്റൊരാൾക്ക് അനുയോജ്യമാകണമെന്നില്ല. അതുകൊണ്ട് സമൂഹത്തിന്റെ പ്രതീക്ഷകൾ മാത്രം നോക്കി തീരുമാനമെടുക്കുന്നതിന് പകരം, സ്വന്തം ആവശ്യങ്ങളും മൂല്യങ്ങളും പരിഗണിക്കണം.

സുഹൃത്തുക്കളെല്ലാം ഉയർന്ന ശമ്പളമുള്ള ജോലികൾ തിരഞ്ഞെടുക്കുമ്പോൾ ഒരാൾക്ക് തനിക്ക് ഇഷ്ടപ്പെട്ട ക്രിയേറ്റീവ് മേഖലയിൽ തുടരണമെന്നുണ്ടാകാം. എല്ലാവരും ഒരേ വഴി തിരഞ്ഞെടുത്തില്ലെങ്കിലും, സ്വന്തം കഴിവിനും താൽപര്യത്തിനും അനുയോജ്യമായ വഴി തിരഞ്ഞെടുക്കുന്നത് ആ വ്യക്തിയുടെ പ്രത്യേകതയാണ്.

നമ്മൾ എന്ത് വായിക്കുന്നു, എന്ത് ജോലി ചെയ്യുന്നു, ആരുമായി സൗഹൃദം പുലർത്തുന്നു, എന്തിനാണ് ‘അതെ’ എന്നും ‘ഇല്ല’ എന്നും പറയുന്നത് തുടങ്ങിയവയെല്ലാം ചേർന്നാണ് നമ്മുടെ വ്യക്തിത്വം രൂപപ്പെടുന്നത്.

എല്ലാവരെയും സന്തോഷിപ്പിക്കേണ്ട ബാധ്യത ആർക്കുമില്ല. സ്വന്തം പരിധികൾ സംരക്ഷിക്കാൻ ചില അവസരങ്ങളോടും ആവശ്യങ്ങളോടും ‘ഇല്ല’ എന്ന് പറയേണ്ടിവരും. അതും വ്യക്തിപരമായ തിരഞ്ഞെടുപ്പിന്റെ ഭാഗമാണ്.

ദീപിക പദുകോൺ ഇന്ത്യൻ സിനിമയിലെ പ്രമുഖ നടിയും നിർമാതാവുമാണ്. അഭിനയത്തിന് പുറമെ മാനസികാരോഗ്യത്തെക്കുറിച്ചുള്ള അവബോധ പ്രവർത്തനങ്ങളിലും അവർ സജീവമാണ്.

ഇന്ത്യൻ സിനിമയിൽ ഏറ്റവുമധികം പ്രതിഫലം വാങ്ങുന്ന നായികയാണ് ദീപിക പദുകോൺ. ഓം ശാന്തി ഓം, പികു, പദ്മാവത്, ചെന്നൈ എക്സ്പ്രസ് തുടങ്ങിയ ചിത്രങ്ങളിലെ പ്രകടനങ്ങളിലൂടെ ശ്രദ്ധേയയായി.

2015ൽ ലിവ്‌ലൗലാഫ് ഫൗണ്ടേഷൻ സ്ഥാപിച്ചു; മാനസികാരോഗ്യത്തെക്കുറിച്ചുള്ള അവബോധം വർധിപ്പിക്കുകയും തെറ്റിധാരണകൾ കുറയ്ക്കുകയും ചെയ്യുകയാണ് സംഘടനയുടെ പ്രധാന ലക്ഷ്യങ്ങൾ.

നമ്മുടെ മുഖമോ പേരോ മാത്രമല്ല നമ്മളെ മറ്റുള്ളവരിൽ നിന്ന് വ്യത്യസ്തരാക്കുന്നത്; നമ്മൾ എടുക്കുന്ന തീരുമാനങ്ങളാണ് നമ്മുടെ വ്യക്തിത്വത്തിന്റെ ഏറ്റവും വ്യക്തമായ അടയാളം