മുഖസൗന്ദര്യം വർധിപ്പിക്കാൻ പ്രകൃതിദത്ത തൈര് ഫേസ് പാക്കുകൾ

തൈര് മുഖസൗന്ദര്യം വർധിപ്പിക്കാൻ ഏറ്റവും മികച്ച പ്രകൃതിദത്ത ഘടകമാണ്.

തൈരിൽ അടങ്ങിയിട്ടുള്ള ലാക്റ്റിക് ആസിഡ് ചർമ്മത്തിലെ മൃതകോശങ്ങളെ നീക്കം ചെയ്യാനും നിറം വർധിപ്പിക്കാനും സഹായിക്കുന്നു. ഒപ്പം, ഇതിലെ കൊഴുപ്പുകളും പ്രോട്ടീനുകളും ചർമ്മത്തിന് ജലാംശം നൽകി മൃദുലമാക്കുന്നു.

തിളക്കമുള്ളതും സുന്ദരവുമായ മുഖത്തിനായി തൈര് ഉപയോഗിച്ച് വീട്ടിൽ തന്നെ തയ്യാറാക്കാവുന്ന ഫേസ് പാക്കുകൾ ഇതാ.

തൈര്-തേൻ പാക്ക്

മുഖക്കുരു ഉള്ളവർക്ക് മികച്ച പ്രതിവിധിയാണ് ഈ പാക്ക്. 2 ടേബിൾസ്പൂൺ തൈരും 1 ടേബിൾസ്പൂൺ തേനും നന്നായി യോജിപ്പിക്കുക. ഈ മിശ്രിതം മുഖത്തും കഴുത്തിലുമായി പുരട്ടുക. നന്നായി ഉണങ്ങിയ ശേഷം കഴുകി കളയുക.

തൈര്-മഞ്ഞൾ പാക്ക്

ചർമ്മത്തിന് തിളക്കം നൽകാനും അണുബാധ തടയാനും മഞ്ഞൾ സഹായിക്കും. 2 ടേബിൾസ്പൂൺ തൈരും 1 ടീസ്പൂൺ മഞ്ഞൾപ്പൊടിയുമായി യോജിപ്പിക്കുക.ഇത് മുഖത്തും കഴുത്തിലും 10-15 മിനിറ്റ് പുരട്ടിയ ശേഷം കഴുകിക്കളയുക. മികച്ച ഫലത്തിനായി ഇത് ആഴ്ചയിൽ രണ്ടോ മൂന്നോ തവണ ഉപയോഗിക്കാം.

തൈര്-കടലമാവ് പാക്ക്

സൂര്യരശ്മി ഏറ്റ് ചർമ്മത്തിനുണ്ടാകുന്ന കരുവാളിപ്പ് മാറ്റാൻ ഈ പാക്ക് ഉത്തമമാണ്. 2 ടേബിൾസ്പൂൺ തൈര്, 1 ടേബിൾസ്പൂൺ കടലമാവ്, ഒരു നുള്ള് മഞ്ഞൾ എന്നിവ യോജിപ്പിക്കുക. ഈ മിശ്രിതം 15 മുതൽ 20 മിനിറ്റ് നേരം മുഖത്ത് പുരട്ടുക. ഉണങ്ങിയ ശേഷം തണുത്ത വെള്ളത്തിൽ കഴുകി കളയുക.

തൈര്-നാരങ്ങാനീര് പാക്ക്

അധിക എണ്ണമയം നിയന്ത്രിക്കാനും കറുത്ത പാടുകൾ കുറയ്ക്കാനും ഈ പാക്ക് സഹായിക്കും. 2 ടേബിൾസ്പൂൺ തൈരും 1 ടീസ്പൂൺ നാരങ്ങാനീരുമായി യോജിപ്പിക്കുക. ഈ മിശ്രിതം 15 മിനിറ്റ് നേരം മുഖത്ത് പുരട്ടിയ ശേഷം കഴുകി കളയുക.