സോഫയിലെ കറയും പൊടിയും ഇനി പേടിക്കേണ്ട; വീട്ടിൽ തന്നെ വൃത്തിയാക്കാം, ഈ വഴികളിലൂടെ

വീട്ടിലെ ലിവിങ് റൂമിന്റെ പ്രധാന ആകർഷണങ്ങളിലൊന്നാണ് സോഫ. എന്നാൽ സ്ഥിരമായി ഉപയോഗിക്കുന്നതിനാൽ പൊടി, ഭക്ഷണാവശിഷ്ടങ്ങൾ, മുടി, കറകൾ എന്നിവ അടിഞ്ഞുകൂടാനും സോഫയുടെ നിറവും ഭംഗിയും നഷ്ടപ്പെടാനും സാധ്യതയുണ്ട്. ഇടയ്ക്കിടെ ശരിയായ രീതിയിൽ വൃത്തിയാക്കുന്നത് സോഫ വൃത്തിയായി സൂക്ഷിക്കുന്നതിനൊപ്പം അതിന്റെ ആയുസും വർധിപ്പിക്കും.

സോഫ വൃത്തിയാക്കുന്നതിന് മുമ്പ് അതിന്റെ മെറ്റീരിയൽ തിരിച്ചറിയുകയാണ് പ്രധാന ഘട്ടം. ഫാബ്രിക്, ലെതർ, വെൽവെറ്റ് തുടങ്ങിയവയ്ക്ക് വ്യത്യസ്തമായ പരിചരണ രീതികളാണ് ആവശ്യം. അതിനാൽ സോഫയിലെ കെയർ ലേബൽ പരിശോധിച്ച ശേഷം മാത്രം ക്ലീനിങ് ആരംഭിക്കുന്നതാണ് സുരക്ഷിതം.

ഫാബ്രിക് സോഫ സ്ഥിരമായി വാക്വം ചെയ്യുകയും ഇടയ്ക്കിടെ ഡീപ് ക്ലീനിങ് നടത്തുകയും വേണം.

ലെതർ സോഫ അമിതമായ ഈർപ്പം ഒഴിവാക്കി പ്രത്യേകം ശ്രദ്ധയോടെ വൃത്തിയാക്കണം. അല്ലാത്തപക്ഷം ലെതർ പൊട്ടിപ്പോകുകയോ നിറം മങ്ങുകയോ ചെയ്യാം.

വെൽവെറ്റ് സോഫ വൃത്തിയാക്കുമ്പോൾ തുണിയുടെ ടെക്സ്ചർ കേടാകാതിരിക്കാൻ വളരെ മൃദുവായി കൈകാര്യം ചെയ്യണം.

സോഫ വൃത്തിയാക്കുമ്പോൾ ആദ്യം വാക്വം ക്ലീനർ ഉപയോഗിച്ച് ഉപരിതലത്തിലെ പൊടിയും അഴുക്കും നീക്കം ചെയ്യാം. സോഫയുടെ കോണുകൾ, തുന്നലുകൾ, കുഷ്യനുകൾക്കിടയിലെ വിടവുകൾ, കുഷ്യനുകളുടെ അടിഭാഗം, സോഫയുടെ പുറകുവശം എന്നിവ പ്രത്യേകം ശ്രദ്ധിക്കണം. ബ്രഷ് അറ്റാച്ച്മെന്റ് ഉപയോഗിക്കുന്നത് തുണിക്ക് കേടുപാടുകൾ സംഭവിക്കുന്നത് ഒഴിവാക്കും.

സോഫയുടെ ഫാബ്രിക്കിന് അനുയോജ്യമാണെങ്കിൽ സ്റ്റീം ക്ലീനറും ഉപയോഗിക്കാം. എന്നാൽ വൃത്തിയാക്കിയ ശേഷം സോഫ പൂർണമായും ഉണങ്ങാൻ അനുവദിക്കണം. അമിതമായ ഈർപ്പം സോഫയിൽ ദുർഗന്ധത്തിനും മറ്റ് പ്രശ്നങ്ങൾക്കും കാരണമാകാം.

കവർ നീക്കം ചെയ്ത് കഴുകാൻ കഴിയുന്ന തരത്തിലുള്ളതാണെങ്കിൽ മൈൽഡ് ഡിറ്റർജന്റ് ഉപയോഗിച്ച് ജെന്റിൽ മോഡിൽ കഴുകി പൂർണമായും ഉണക്കിയ ശേഷം മാത്രം തിരിച്ചിടുന്നതാണ് നല്ലത്.

ലെതർ സോഫയിൽ ആദ്യം മൈക്രോഫൈബർ തുണി ഉപയോഗിച്ച് പൊടി തുടച്ചുനീക്കുക. തുടർന്ന് വെള്ളവും വൈറ്റ് വിനിഗറും തുല്യ അളവിൽ ചേർത്തോ ലെതറിനായി പ്രത്യേകം തയ്യാറാക്കിയ ക്ലീനറോ ഉപയോഗിച്ച് ഉപരിതലം വൃത്തിയാക്കാം. ക്ലീനിങ്ങിന് ശേഷം ലെതർ കണ്ടീഷണർ ഉപയോഗിക്കുന്നത് ലെതർ മൃദുവായി നിലനിർത്താനും പൊട്ടലുകൾ ഒഴിവാക്കാനും സഹായിക്കും.

വെൽവെറ്റ് സോഫ വൃത്തിയാക്കുമ്പോൾ ആദ്യം ബ്രഷ് അറ്റാച്ച്മെന്റുള്ള വാക്വം ക്ലീനർ ഉപയോഗിച്ച് പൊടി നീക്കം ചെയ്യാം. കറയുള്ള ഭാഗത്ത് ചെറുചൂടുവെള്ളവും മൈൽഡ് സോപ്പും ഉപയോഗിച്ച് നനച്ച തുണികൊണ്ട് മൃദുവായി തട്ടിത്തുടയ്ക്കാം.

വെൽവെറ്റ് ഒരിക്കലും വെള്ളത്തിൽ കുതിർക്കരുത്. അമിതമായ വെള്ളം തുണിയുടെ ടെക്സ്ചർ നശിപ്പിക്കാൻ സാധ്യതയുണ്ട്. ഉണങ്ങിയ ശേഷം മൃദുവായ ബ്രഷ് ഉപയോഗിച്ച് തുണിയുടെ ഫൈബറിന്റെ ദിശയിൽ പതുക്കെ ബ്രഷ് ചെയ്യുന്നത് പഴയ ടെക്സ്ചർ വീണ്ടെടുക്കാൻ സഹായിക്കും.

സോഫയിൽ നിന്ന് മോശം മണം വരുന്നുണ്ടെങ്കിൽ സോഫയുടെ ഉപരിതലത്തിൽ ചെറിയ അളവിൽ ബേക്കിങ് സോഡ വിതറി ഏകദേശം 20 മിനിറ്റിന് ശേഷം വാക്വം ചെയ്ത് നീക്കം ചെയ്യാം. ഫാബ്രിക് സോഫയ്ക്ക് അനുയോജ്യമായ ഓഡർ-റിമൂവിങ് ഫാബ്രിക് സ്പ്രേകളും ഉപയോഗിക്കാം. മുറിയിൽ ആക്റ്റിവേറ്റഡ് ചാർക്കോൾ വയ്ക്കുന്നതും ദുർഗന്ധം കുറയ്ക്കും.