‘സങ്കടമൊന്നുമില്ല, പക്ഷേ ഒന്നിനും തോന്നുന്നില്ല’; വിഷാദത്തിന്റെ ഈ സൂചനകൾ ശ്രദ്ധിക്കണം

തുടർച്ചയായ തലവേദന, വയറുവേദന, ശരീരവേദന എന്നിവയെല്ലാം ശാരീരിക കാരണങ്ങളാൽ മാത്രമാകണമെന്നില്ല. വിഷാദവും വേദനയും ചില പൊതുവായ ജൈവപ്രക്രിയകളുമായും ന്യൂറോട്രാൻസ്മിറ്ററുകളുമായും ബന്ധപ്പെട്ടിരിക്കാമെന്ന് വിദഗ്ധർ ചൂണ്ടിക്കാട്ടുന്നു. വിഷാദമോ ഉത്കണ്ഠയോ ഉള്ളവരിൽ ദീർഘകാല വേദന കൂടുതലായി കാണപ്പെടുന്നതായും ​ഗവേഷണങ്ങൾ സൂചിപ്പിക്കുന്നു.

ചെറിയ കാര്യങ്ങൾക്കുപോലും അമിതമായി ദേഷ്യം വരിക, എപ്പോഴും അസ്വസ്ഥനായി തോന്നുക, ക്ഷമ കുറഞ്ഞുപോകുക എന്നിവയും ചിലരിൽ വിഷാദത്തോടൊപ്പം കാണപ്പെടാം. വിഷാദം എന്നാൽ എപ്പോഴും കരച്ചിലും സങ്കടവും മാത്രമല്ല.

ഇഷ്ടപ്പെട്ട കാര്യങ്ങളോട് പോലും താൽപര്യം നഷ്ടപ്പെടുന്നുണ്ടോ? മുമ്പ് സന്തോഷം നൽകിയിരുന്ന കാര്യങ്ങൾ ഇപ്പോൾ വലിയ പ്രതികരണമൊന്നും ഉണ്ടാക്കുന്നില്ലേ? രാവിലെ കിടക്കയിൽനിന്ന് എഴുന്നേൽക്കാനും ജോലി ചെയ്യാനും സുഹൃത്തുക്കളെ കാണാനും ഇഷ്ടപ്പെട്ട കാര്യങ്ങൾ ചെയ്യാനുമുള്ള ആന്തരിക പ്രചോദനം കുറയുന്നത് ശ്രദ്ധിക്കേണ്ട ലക്ഷണമാണ്.

മനസ്സിലെ അസ്വസ്ഥതയിൽനിന്ന് താൽക്കാലികമായി രക്ഷപ്പെടാൻ ചിലർ മദ്യത്തെയോ മറ്റ് ലഹരി വസ്തുക്കളെയോ ആശ്രയിക്കാറുണ്ട്. എന്നാൽ ഇത് പിന്നീട് നെഗറ്റീവ് വികാരങ്ങൾ, ഉത്കണ്ഠ, ദേഷ്യം തുടങ്ങിയവ കൂടുതൽ ശക്തമാക്കാൻ ഇടയാക്കും.

ഫോൺ കയ്യിൽനിന്ന് താഴെ വയ്ക്കാൻ കഴിയുന്നില്ലേ? വിഷാദവും അമിതമായ ഇന്റർനെറ്റ് ഉപയോഗവും തമ്മിൽ ബന്ധമുണ്ടാകാമെന്നാണ് ചില ഗവേഷണങ്ങൾ സൂചിപ്പിക്കുന്നത്. യഥാർഥ ജീവിതത്തിലെ ബന്ധങ്ങളിൽനിന്നോ സ്വന്തം ചിന്തകളിൽനിന്നോ രക്ഷപ്പെടാനുള്ള ഒരു മാർഗമായി ഓൺലൈൻ ലോകത്തെ ചിലർ ഉപയോഗിച്ചേക്കും.

‘ഇന്ന് എന്ത് കഴിക്കും?’, ‘എപ്പോൾ എഴുന്നേൽക്കും?’, ‘എന്ത് ധരിക്കും?’ തുടങ്ങിയ സാധാരണ തീരുമാനങ്ങൾ പോലും എടുക്കാൻ ബുദ്ധിമുട്ട് തോന്നുന്നുണ്ടോ? സാധാരണ എളുപ്പത്തിൽ തീരുമാനിക്കാവുന്ന കാര്യങ്ങൾ പോലും വലിയ തീരുമാനങ്ങളായി തോന്നുന്ന അവസ്ഥ ഉണ്ടാകാം.

കുളിക്കുക, പല്ലുതേക്കുക, മുടി ചീകുക, വസ്ത്രം മാറുക തുടങ്ങിയ പതിവ് കാര്യങ്ങളോട് പോലും താൽപര്യം കുറയുന്നുണ്ടെങ്കിൽ ശ്രദ്ധിക്കണം.

വിഷാദമുള്ള എല്ലാവരും കുറച്ച് മാത്രമേ ഉറങ്ങൂ എന്നില്ല. ചിലർക്ക് ഉറങ്ങാൻ കഴിയാതെ വരാം. രാത്രി പലതവണ ഉണരാം. മറ്റുചിലർക്ക് അമിതമായി ഉറങ്ങാനുള്ള പ്രവണത ഉണ്ടാകാം. രാത്രി മുഴുവൻ ഉറങ്ങിയിട്ടും പകൽ വലിയൊരു ഭാഗം വീണ്ടും ഉറങ്ങാനും സാധ്യതയുണ്ട്. എത്ര ഉറങ്ങിയിട്ടും തൃപ്തിയാകാതെയും വരാം. ഉറക്കത്തിലെ ഇത്തരം മാറ്റങ്ങൾ ശ്രദ്ധിക്കേണ്ടതാണ്.

വിഷാദവും ശരീരഭാരത്തിലെ മാറ്റങ്ങളും തമ്മിൽ ബന്ധമുണ്ടാകാം. ചിലരിൽ ഭക്ഷണത്തോടുള്ള താൽപര്യം കൂടുകയും ഭാരം വർധിക്കുകയും ചെയ്യാം. മറ്റുചിലരിൽ വിശപ്പ് കുറയുകയും ഭാരം കുറയുകയും ചെയ്യാം. അതുകൊണ്ട് വ്യക്തമായ കാരണമില്ലാതെ ഭക്ഷണശീലത്തിലും ശരീരഭാരത്തിലും വലിയ മാറ്റം സംഭവിക്കുന്നുണ്ടെങ്കിൽ അത് ശ്രദ്ധിക്കാം

വിഷാദരോഗം എല്ലാവരിലും ഒരേ രീതിയിൽ പ്രകടമാകണമെന്നില്ല. ചിലർ പുറത്തുനിന്ന് നോക്കുമ്പോൾ സാധാരണപോലെ ജോലി ചെയ്യുകയും സംസാരിക്കുകയും ചിരിക്കുകയും ചെയ്യുന്നുണ്ടാകാം. ഉള്ളിൽ താൽപര്യക്കുറവ്, ശൂന്യത, ക്ഷീണം, ഉറക്കത്തിലെ മാറ്റം, അമിതമായ ദേഷ്യം തുടങ്ങിയ പ്രശ്നങ്ങൾ അനുഭവിക്കുന്നുണ്ടാകാം.

അതുകൊണ്ടുതന്നെ ഒരു ലക്ഷണം മാത്രം കണ്ടിട്ട് വിഷാദരോഗമെന്ന് സ്വയം തീരുമാനിക്കരുത്. ഈ ലക്ഷണങ്ങൾ സ്ഥിരമായി തുടരുകയോ ദൈനംദിന ജീവിതത്തെയും ബന്ധങ്ങളെയും ജോലിയെയും ബാധിക്കുകയോ ചെയ്യുന്നുണ്ടെങ്കിൽ ആരോഗ്യവിദഗ്ധനോട് സംസാരിക്കുന്നതാണ് ഉചിതം.