മമ്മൂട്ടിക്കും മഞ്ജു വാര്യർക്കും മാത്രമല്ല, നിങ്ങൾക്കും പ്രായം കുറക്കാം; 40 കഴിഞ്ഞവർക്കുള്ള സ്കിൻകെയർ രീതികൾ

മുഖത്ത് നേർത്ത വരകൾ, ചുളിവുകൾ, നിറവ്യത്യാസം, വരൾച്ച, തിളക്കം കുറയുക തുടങ്ങിയ പ്രശ്നങ്ങൾ 40 വയസ്സിന് ശേഷം പലരിലും കണ്ടുവരാറുണ്ട്. പ്രായമാകുന്നത് സ്വാഭാവികമായ പ്രക്രിയയാണെങ്കിലും ചർമസംരക്ഷണത്തിലൂടെ ചർമത്തിന്റെ ആരോഗ്യം നിലനിർത്താനാകും.

ചർമത്തിന്റെ സ്വാഭാവിക ഈർപ്പം നിലനിർത്തുക, സൂര്യപ്രകാശത്തിൽനിന്ന് സംരക്ഷിക്കുക, ചർമത്തിന് അനുയോജ്യമായ ഉൽപന്നങ്ങൾ തിരഞ്ഞെടുക്കുക എന്നിവയാണ് ഈ പ്രായത്തിൽ പ്രധാനമായും ശ്രദ്ധിക്കേണ്ടത്.

ചർമത്തിൽ അടിഞ്ഞുകൂടുന്ന പൊടി, എണ്ണമയം, മേക്കപ്പ്, മറ്റ് മാലിന്യങ്ങൾ എന്നിവ നീക്കം ചെയ്യാൻ മുഖം വൃത്തിയാക്കേണ്ടത് പ്രധാനമാണ്. എന്നാൽ ചർമത്തിലെ സ്വാഭാവിക എണ്ണമയം അമിതമായി നീക്കം ചെയ്യുന്ന ഫേസ് വാഷുകൾ വരൾച്ചയ്ക്കും അസ്വസ്ഥതയ്ക്കും കാരണമാകാം.

ഗ്ലിസറിൻ, ഹൈലുറോണിക് ആസിഡ്, സെറാമൈഡുകൾ തുടങ്ങിയ ചേരുവകളുള്ള മൃദുവായ ക്ലെൻസറുകൾ തിരഞ്ഞെടുക്കാം. രാവിലെയും രാത്രിയും മുഖം വൃത്തിയാക്കുന്നത് ശീലമാക്കാം. ഇളംചൂടുള്ള വെള്ളം ഉപയോഗിക്കുന്നതാണ് നല്ലത്.

ചർമത്തിൽ മൃതകോശങ്ങൾ അടിഞ്ഞുകൂടുന്നത് മുഖത്തിന്റെ തിളക്കം കുറയാനും ചർമത്തിന്റെ ഘടനയിൽ മാറ്റങ്ങളുണ്ടാകാനും കാരണമാകാം. ഇവ നീക്കം ചെയ്യാൻ എക്സ്ഫോളിയേഷൻ സഹായിക്കും. ഗ്ലൈക്കോളിക് ആസിഡ് പോലുള്ള എഎച്ച്എകളും സാലിസിലിക് ആസിഡ് പോലുള്ള ബിഎച്ച്എകളും അടങ്ങിയ ഉൽപന്നങ്ങൾ ഇതിനായി ഉപയോഗിക്കാറുണ്ട്.

മുഖത്തെ നിറവ്യത്യാസവും മങ്ങലും കുറയ്ക്കാൻ സഹായിക്കുന്ന ചേരുവകളിലൊന്നാണ് വിറ്റാമിൻ സി. രാവിലെ മുഖം വൃത്തിയാക്കിയശേഷം ചർമത്തിന് അനുയോജ്യമായ വിറ്റാമിൻ സി സെറം ഉപയോഗിക്കാം.

പ്രായം കൂടുന്നതിനനുസരിച്ച് ചർമത്തിന് ഈർപ്പം നിലനിർത്താനുള്ള കഴിവിൽ മാറ്റമുണ്ടാകാം. ഇതുമൂലം വരൾച്ചയും നേർത്ത വരകളും കൂടുതൽ പ്രകടമായേക്കാം. ചർമത്തിന്റെ സ്വഭാവത്തിന് അനുയോജ്യമായ മോയ്സ്ചറൈസർ രാവിലെയും രാത്രിയും ഉപയോഗിക്കാം.

ചർമത്തിൽ ചുളിവുകൾ, കറുത്ത പാടുകൾ, നിറവ്യത്യാസം തുടങ്ങിയവ നേരത്തേ പ്രകടമാകുന്നതിന് അൾട്രാവയലറ്റ് രശ്മികൾ കാരണമാകാം. അതിനാൽ 40 വയസ്സ് കഴിഞ്ഞവരുടെ സ്കിൻകെയർ ദിനചര്യയിൽ സൺസ്ക്രീന് പ്രത്യേക സ്ഥാനമുണ്ട്. മുഖത്തിനൊപ്പം കഴുത്ത്, ചെവി തുടങ്ങിയ ഭാഗങ്ങളിലും പുരട്ടണം.

പുറത്തു കൂടുതൽ സമയം ചെലവഴിക്കുമ്പോൾ ഏകദേശം രണ്ടു മണിക്കൂർ ഇടവിട്ട് വീണ്ടും പുരട്ടുന്നതും വിയർക്കുകയോ നീന്തുകയോ ചെയ്താൽ നിർദേശപ്രകാരം വീണ്ടും ഉപയോഗിക്കുന്നതും പ്രധാനമാണ്. മേഘാവൃതമായ ദിവസങ്ങളിലും സൺസ്ക്രീൻ ഒഴിവാക്കരുത്.

കണ്ണുകൾക്ക് ചുറ്റുമുള്ള ചർമം താരതമ്യേന നേർത്തതാണ്. ഹൈലുറോണിക് ആസിഡ്, പെപ്റ്റൈഡുകൾ തുടങ്ങിയ ചേരുവകളുള്ള ഐ ക്രീമുകൾ ഈർപ്പം നിലനിർത്താൻ സഹായിച്ചേക്കാം. ക്രീം പുരട്ടുമ്പോൾ കണ്ണുകൾക്ക് ചുറ്റും വിരലുകൾ ഉപയോഗിച്ച് മൃദുവായി തട്ടിപ്പുരട്ടണം.

കണ്ണുകൾക്ക് താഴെയുള്ള കറുപ്പ് ഉറക്കക്കുറവ് മാത്രമല്ല, ജനിതക ഘടകങ്ങൾ, അലർജി, പിഗ്മെന്റേഷൻ തുടങ്ങിയ കാരണങ്ങളാലും ഉണ്ടാകാം. അതിനാൽ ഐ ക്രീം ഉപയോഗിച്ചതുകൊണ്ട് എല്ലാ പ്രശ്നങ്ങളും മാറുമെന്ന് പ്രതീക്ഷിക്കരുത്.