വെറുതെ കൊറിക്കാം; കപ്പലണ്ടിയുടെ ആരോ​ഗ്യ ​ഗുണങ്ങൾ

കടലയെന്നും കപ്പലണ്ടിയെന്നും വിളിക്കുന്ന നിലകടല ഇഷ്ടപ്പെടാത്തവർ ചുരുക്കമായിരിക്കും. എന്നാൽ പലരും കൊളസ്ട്രോൾ പേടിച്ച് കടല കഴിക്കാൻ മടിക്കാറുണ്ട്. എന്നാൽ നിരവധി ആരോ​ഗ്യ​ഗുണങ്ങൾ അടങ്ങിയതാണ് കടല.

പ്രോട്ടീൻ, ആരോഗ്യകരമായ കൊഴുപ്പുകൾ, നാരുകൾ, ബി വിറ്റാമിനുകൾ, വിറ്റാമിൻ ഇ, മ​ഗ്നീഷ്യം, ഫോസ്ഫറസ്, പൊട്ടാസ്യം തുടങ്ങിയ അവശ്യ പോഷകങ്ങൾ നിലക്കടലയിൽ അടങ്ങിയിരിക്കുന്നു.

ആരോഗ്യകരമായ കൊഴുപ്പുകളാൽ സമ്പന്നമായ നിലക്കടല ഹൃദയാരോഗ്യം കാത്തുസൂക്ഷിക്കും. നിലക്കടലിൽ അടങ്ങിയിരിക്കുന്ന മോണോസാച്ചുറേറ്റഡ്, പോളിഅൺസാച്ചുറേറ്റഡ് എന്നീ നല്ല കൊഴുപ്പുകൾ എൽഡിഎൽ കൊളസ്‌ട്രോളിൻ്റെ അളവ് കുറയ്ക്കാനും സഹായിക്കും.

നിലക്കടലയിൽ അടങ്ങിയ മഗ്നീഷ്യം, പൊട്ടാസ്യം എന്നിവ നാഡികളുടെ പ്രവർത്തനം, പേശികളുടെ ആരോഗ്യം, രക്തസമ്മർദ്ദം എന്നിവയെയും നിയന്ത്രിക്കാൻ സഹായിക്കും.

ശരീരഭാരം നിയന്ത്രിക്കുന്നതിലും നിലക്കടല ഒരു പ്രധാന പങ്കുവഹിക്കുന്നുണ്ട്. ഇതിലെ ഉയർന്ന പ്രോട്ടീനും നാരുകളും വിശപ്പ് നിയന്ത്രിച്ച് അമിതമായി ഭക്ഷണം കഴിക്കുന്നത് തടയാനും അമിതവണ്ണം കുറയ്ക്കാനും സഹായിക്കും.

കോശങ്ങളെ സംരക്ഷിക്കാൻ സഹായിക്കുന്ന റെസ്‌വെറാട്രോൾ, പി-കൗമാരിക് ആസിഡ് തുടങ്ങിയ ആൻ്റിഓക്‌സിഡൻ്റുകൾ നിലക്കടലയിൽ ധാരാളം അടങ്ങിയിരിക്കുന്നതിനാൽ ഇത് കാൻസർ, അൽഷിമേഴ്‌സ് തുടങ്ങിയ രോഗങ്ങളുടെ സാധ്യത കുറയ്ക്കും.