ഈ പ്രശ്നങ്ങൾ ഉള്ളവർ ചിയ സീഡ്സ് കഴിക്കരുത്

ചിയാ സീഡ്‌സ് ഇന്ന് ആരോഗ്യപ്രേമികൾക്കിടയിൽ വലിയ തരംഗമാണ്.

ഫൈബർ, ആരോഗ്യകരമായ കൊഴുപ്പുകൾ, അവശ്യ ധാതുക്കൾ എന്നിവയാൽ സമ്പന്നമായതിനാൽ ഇതിനെ ഒരു സൂപ്പർഫുഡ് ആയാണ് കണക്കാക്കുന്നത്.

എന്നാൽ ചില ആരോഗ്യപ്രശ്നങ്ങളുള്ളവർക്ക് ചിയ സീഡ്സ് ഗുണത്തേക്കാളേറെ ദോഷം ചെയ്തേക്കാം.

ലോ ബ്ലഡ് പ്രഷർ

ഇതിലടങ്ങിയിരിക്കുന്ന പൊട്ടാസ്യം രക്തസമ്മർദ്ദം കുറയ്ക്കാൻ സഹായിക്കുന്ന ഒന്നാണ്. രക്തസമ്മർദ്ദം നേരത്തെ തന്നെ കുറവുള്ളവർ ഇവ അമിതമായി കഴിക്കുന്നത് രക്തസമ്മർദ്ദം ഇനിയും താഴാൻ കാരണമാകും. ഇത് തലകറക്കം, തളർച്ച, അമിതമായ ക്ഷീണം എന്നിവയിലേക്ക് നയിക്കാം.

ദഹനസംബന്ധമായ പ്രശ്നങ്ങൾ

വയറ്റിലെ അൾസർ, അസിഡിറ്റി, ഗ്യാസ് സംബന്ധമായ ബുദ്ധിമുട്ടുകൾ എന്നിവയുള്ളവർ ചിയ സീഡ്‌സ് ഒഴിവാക്കുന്നതാണ് നല്ലത്. ഇവയിൽ ധാരാളമായി നാരുകൾ അടങ്ങിയിട്ടുണ്ട്. ആമാശയത്തിലോ കുടലിലോ വീക്കമോ മറ്റ് അസ്വസ്ഥതകളോ ഉള്ളവർക്ക് ഈ നാരുകൾ വിപരീതഫലമാണ് നൽകുക.

രക്തം കട്ടപിടിക്കാതിരിക്കാനുള്ള മരുന്നുകൾ കഴിക്കുന്നവർ

രക്തം കട്ടപിടിക്കാതിരിക്കാൻ ആസ്പിരിൻ പോലുള്ള മരുന്നുകൾ കഴിക്കുന്നവർ ചിയ സീഡ്‌സ് ഉപയോഗിക്കുന്നത് ഡോക്ടറുടെ നിർദ്ദേശപ്രകാരം മാത്രമായിരിക്കണം. ചിയ സീഡ്‌സിലെ ഒമേഗ 3 ഫാറ്റി ആസിഡുകൾ സ്വാഭാവികമായും രക്തം നേർത്തതാക്കാൻ സഹായിക്കുന്നവയാണ്.

വൃക്കരോഗങ്ങൾ ഉള്ളവർ

ഇതിൽ പൊട്ടാസ്യവും ഫോസ്ഫറസും ഉയർന്ന അളവിൽ അടങ്ങിയിട്ടുണ്ട്. ആരോഗ്യമുള്ള വൃക്കകൾക്ക് ഇവയെ നിയന്ത്രിക്കാൻ എളുപ്പമാണെങ്കിലും, പ്രവർത്തനക്ഷമത കുറഞ്ഞ വൃക്കകൾക്ക് ഈ ധാതുക്കൾ അധിക ജോലിഭാരമുണ്ടാക്കും. ഇത് വൃക്കകളുടെ ആരോഗ്യത്തെ വഷളാക്കിയേക്കാം.