സമകാലിക മലയാളം ഡെസ്ക്
രാജ്യത്തെ മുന്‍നിര വിദ്യാഭ്യാസ സ്ഥാപനങ്ങളിലെ പഠനത്തിനായി ഈടും ആള്‍ജാമ്യവുമില്ലാതെ ബാങ്കുകള്‍ വായ്പ നല്‍കുന്ന പിഎം വിദ്യാലക്ഷ്മി പദ്ധതിക്ക് കേന്ദ്രമന്ത്രിസഭാ യോഗത്തിന്റെ അംഗീകാരം.
പുതിയ പദ്ധതി പ്രകാരം വര്‍ഷം ഒരു ലക്ഷം വിദ്യാര്‍ഥികള്‍ക്ക് ഇതിന്റെ പ്രയോജനം ലഭിക്കും. ഏഴു വര്‍ഷത്തേയ്ക്ക് 3600 കോടി രൂപയാണ് കേന്ദ്രസര്‍ക്കാര്‍ ഇതിനായി നീക്കിവെച്ചിരിക്കുന്നത്.
7.5 ലക്ഷം രൂപയ്ക്ക് വരെ 75 ശതമാനം ക്രെഡിറ്റ് ഗാരന്റി സര്‍ക്കാരായിരിക്കും നല്‍കുക.
എട്ടു ലക്ഷം രൂപയ്ക്ക് താഴെയാണ് കുടുംബത്തിന്റെ വാര്‍ഷിക വരുമാനമെങ്കില്‍ 10 ലക്ഷം രൂപയ്ക്ക് വരെ പലിശയില്‍ മൂന്ന് ശതമാനം ഇളവ് നല്‍കും.
നിലവില്‍ 4.5 ലക്ഷം രൂപ വാര്‍ഷിക വരുമാനമുള്ളവര്‍ക്കുള്ള പൂര്‍ണമായ പലിശയിളവിന് പുറമേയാണിത്.
തുടക്കത്തില്‍ ദേശീയ വിദ്യാഭ്യാസ റാങ്കിങ്ങില്‍ ഉള്‍പ്പെടുന്ന 860 ഉന്നത വിദ്യാഭ്യാസ സ്ഥാപനങ്ങളിലെ പ്രവേശനത്തിനാണ് വിദ്യാര്‍ഥികള്‍ക്ക് സര്‍ക്കാര്‍ ആനുകൂല്യം ലഭിക്കുക.
ഉന്നത വിദ്യാഭ്യാസ വകുപ്പ് 'പിഎം-വിദ്യാലക്ഷ്മി' എന്ന പേരില്‍ സംയോജിത പോര്‍ട്ടല്‍ ആരംഭിക്കും. സര്‍ക്കാര്‍ ആനുകൂല്യം ലഭിക്കാന്‍ ഈ പോര്‍ട്ടല്‍ വഴിയാണ് വിദ്യാര്‍ഥികള്‍ ബാങ്കിലേക്ക് വിദ്യാഭ്യാസ വായ്പയ്ക്ക് അപേക്ഷിക്കേണ്ടത്. പലിശ ഒഴിവാക്കുന്നതിനുള്ള അപേക്ഷയും ഈ പോര്‍ട്ടലില്‍ നടത്താം.
പലിശയിളവ് ഇ-വൗച്ചര്‍, സെന്‍ട്രല്‍ ബാങ്ക് ഡിജിറ്റല്‍ കറന്‍സി (സിബിഡിസി) വാലറ്റ് എന്നിവ വഴി വിദ്യാര്‍ഥിക്ക് നല്‍കും. അപേക്ഷിക്കുന്നതിന്, വിദ്യാര്‍ഥിയുടെ ആധാര്‍ കാര്‍ഡും ഫോട്ടോയും മുന്‍ വിദ്യാഭ്യാസത്തിന്റെ എല്ലാ രേഖകളും ബന്ധപ്പെട്ട സ്ഥാപനത്തിന്റെ പ്രവേശന കത്തും ഐഡി കാര്‍ഡും ഉണ്ടായിരിക്കണം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates