സമകാലിക മലയാളം ഡെസ്ക്
കാപ്പി കുടിക്കാൻ ഇഷ്ടപ്പെടുന്നവർക്കിടയിൽ പ്രത്യേക ആരാധകരുള്ള ഒന്നാണ് ഫിൽറ്റർ കോഫി. സാധാരണ ഇൻസ്റ്റന്റ് കോഫിയിൽനിന്ന് വ്യത്യസ്തമായി, കാപ്പിപ്പൊടിയിലൂടെ ചൂടുവെള്ളം അരിച്ചിറക്കി തയ്യാറാക്കുന്ന രീതിയാണിത്.
കാപ്പിയുടെ സ്വാഭാവികമായ രുചിയും മണവും ആസ്വദിക്കാൻ ഈ രീതി സഹായിക്കും. പ്രത്യേക ഉപകരണങ്ങൾ ഉപയോഗിച്ചാണ് സാധാരണ ഫിൽറ്റർ കോഫി തയ്യാറാക്കുന്നതെങ്കിലും, കുറച്ച് കാര്യങ്ങൾ ശ്രദ്ധിച്ചാൽ തുടക്കക്കാർക്കും വീട്ടിൽ മികച്ച കോഫി ഉണ്ടാക്കാം.
പുതിയതായി പൊടിച്ച കാപ്പിപ്പൊടി, ചൂടുവെള്ളം, ഫിൽറ്റർ ഉപകരണം, ഫിൽറ്റർ പേപ്പർ, ഒരു കപ്പ് എന്നിവയാണ് പ്രധാനമായും വേണ്ടത്. V60, കെമെക്സ് (Chemex) തുടങ്ങിയ ഉപകരണങ്ങൾ ഇതിനായി ഉപയോഗിക്കാം.
ഒരു ഗ്രാം കാപ്പിപ്പൊടിക്ക് 16 മില്ലി ലീറ്റർ വെള്ളം എന്നതാണ് തുടക്കക്കാർക്ക് പരീക്ഷിക്കാവുന്ന അനുപാതം. അതായത് 20 ഗ്രാം കാപ്പിപ്പൊടിക്ക് 320 മില്ലി ലീറ്റർ വെള്ളം ഉപയോഗിക്കാം. കാപ്പിയുടെ കടുപ്പം അനുസരിച്ച് അളവിൽ മാറ്റം വരുത്താം.
വളരെ നേർത്തതോ വളരെ കട്ടിയുള്ളതോ ആയ പൊടിയേക്കാൾ പഞ്ചസാരത്തരികൾക്ക് സമാനമായ കണികകളുള്ള കാപ്പിപ്പൊടിയാണ് ഫിൽറ്റർ കോഫിക്ക് അനുയോജ്യം. കാപ്പിക്കുരു ഉപയോഗിക്കുന്നുണ്ടെങ്കിൽ ആവശ്യത്തിന് മാത്രം പൊടിച്ചെടുക്കുന്നതും നല്ലതാണ്.
വെള്ളം തിളപ്പിച്ച ശേഷം ഏകദേശം 30 സെക്കൻഡ് മാറ്റിവെക്കാം. അമിതമായി തിളച്ച വെള്ളം നേരിട്ട് കാപ്പിപ്പൊടിയിലേക്ക് ഒഴിക്കുന്നത് ഒഴിവാക്കണം. ഇത് കാപ്പിയുടെ രുചിയെ ബാധിക്കാം.
ഫിൽറ്റർ ഉപകരണത്തിൽ പേപ്പർ സ്ഥാപിച്ചശേഷം അതിലൂടെ അൽപം ചൂടുവെള്ളം ഒഴിക്കുക. ഇതിലൂടെ പേപ്പറിന്റെ ഗന്ധവും രുചിയും ഒഴിവാക്കാൻ സാധിക്കും. ഇതിനുശേഷം ഒഴുകിയെത്തുന്ന വെള്ളം കളയണം.
ഫിൽറ്ററിൽ കാപ്പിപ്പൊടി ഇട്ടശേഷം ഏകദേശം 50 മില്ലി ലീറ്റർ ചൂടുവെള്ളം ഒഴിച്ച് പൊടി മുഴുവനായി നനയ്ക്കാം. തുടർന്ന് 30 സെക്കൻഡ് കാത്തിരിക്കണം. ഈ പ്രക്രിയയെ 'ബ്ലൂമിങ്' (Blooming) എന്നാണ് വിളിക്കുന്നത്. കാപ്പിപ്പൊടിയിൽനിന്ന് കാർബൺ ഡൈ ഓക്സൈഡ് പുറത്തുവരാൻ ഈ സമയം സഹായിക്കും.
ബ്ലൂമിങ്ങിന് ശേഷം ബാക്കിയുള്ള വെള്ളം രണ്ടര മിനിറ്റോളം സമയമെടുത്ത് പതുക്കെ ഒഴിക്കാം. കാപ്പിപ്പൊടിയുടെ മധ്യഭാഗത്തുനിന്ന് പുറത്തേക്ക് വൃത്താകൃതിയിൽ വെള്ളം ഒഴിക്കുന്നത് പൊടി മുഴുവനായി നനയാൻ സഹായിക്കും.
സാധാരണയായി മൂന്ന് മുതൽ മൂന്നര മിനിറ്റിനുള്ളിൽ കാപ്പി അരിച്ചിറങ്ങും. ഉപയോഗിക്കുന്ന ഉപകരണത്തിനനുസരിച്ച് സമയത്തിൽ വ്യത്യാസമുണ്ടാകാം.