പെട്ടെന്നുള്ള പൊണ്ണത്തടി; ഭക്ഷണം മാത്രമല്ല കാരണം

ഉറക്കമില്ലായ്മ

ശരീരഭാരം പെട്ടെന്ന് കൂടാനുള്ള ഒരു പ്രധാന ഘടകമാണ് ഉറക്കമില്ലായ്മ. മൊത്തത്തിലുള്ള ആരോഗ്യസംരക്ഷണത്തിന് ഉറക്കം വളരെ പ്രധാനമാണ്. 2022-ല്‍ നടത്തിയ ഒരു പഠനത്തില്‍ ഉറക്കമില്ലായ്മ അമിതമായി ഭക്ഷണം കഴിക്കുന്നതുമായി ബന്ധപ്പെട്ടു കിടക്കുന്നതായി കണ്ടെത്തി. ഇത് ഉയര്‍ന്ന അളവില്‍ കൊഴുപ്പും കാര്‍ബോഹൈഡ്രേറ്റും ശരീരത്തിലേക്ക് എത്തുന്നതിന് കാരണമാകുന്നു.

സമ്മര്‍ദം

വിട്ടുമാറാത്ത മാനസിക സമ്മര്‍ദം ശരീരഭാരം കൂടുന്നതിലേക്ക് നയിക്കാന്‍ കാരണമായേക്കും. മാനസിക സമ്മര്‍ദത്തെ തുടര്‍ന്ന് ശരീരത്തില്‍ ഉല്‍പാദിപ്പിക്കുന്ന സ്‌ട്രെസ് ഹോര്‍മോണ്‍ ആയ കോര്‍ട്ടിസോള്‍ വിശപ്പ് വര്‍ധിപ്പിക്കുകയും ഇത് അമിതമായി ഭക്ഷണം കഴിക്കുന്നതിലേക്കും നയിക്കുന്നു.

അധിക കലോറി

ഭക്ഷണത്തിലൂടെ അമിതമായ കലോറി ശരീരത്തില്‍ ഉണ്ടാകുന്നത് ശരീരഭാരം കൂടാന്‍ കാരണമാകുന്നു. ഇടയിക്കിടെയുള്ള സ്‌നാക് കഴിപ്പ്, പോഷകങ്ങള്‍ കുറവുള്ള ഡയറ്റ് എന്നിവ അമിതമായി കലോറി ഉണ്ടാവുന്നതിലേക്ക് നയിക്കാം.

ആരോഗ്യപ്രശ്നങ്ങള്‍

ചില ആരോഗ്യ പ്രശ്‌നങ്ങള്‍ പെട്ടെന്നുള്ള പൊണ്ണത്തടിക്ക് കാരണമായേക്കാം. ഹൈപ്പോതൈറോയ്ഡിസം, വിഷാദം, ഹൃദ്രോഗം, പ്രമേഹം, പിസിഒഎസ് തുടങ്ങിയ ആരോഗ്യ പ്രശ്‌നങ്ങള്‍ നേരിടുന്നവര്‍ക്ക് ശരീരഭാരം കൂടാനുള്ള സാധ്യതയുണ്ട്.

അലസമായ ജീവിത ശൈലി

ശാരീരികമായി സജീവമാകുന്നത് ആരോഗ്യകരമായ ശരീരഭാരം നിലനിര്‍ത്താന്‍ സഹായിക്കും. ഡെസ്‌ക് ജോലികള്‍, ഡ്രൈവിങ്, കംപ്യൂട്ടര്‍ അല്ലെങ്കില്‍ മൊബൈലില്‍ മണിക്കൂറുകള്‍ ചെലവഴിക്കുന്നത് ശാരീരികമായി സജീവമാകുന്നതില്‍ നിന്ന് തടയുന്നു.

പഞ്ചസാരയുടെ ഉപയോഗം

മധുരം അല്ലെങ്കില്‍ പഞ്ചസാര അടങ്ങിയ ഭക്ഷണം/ പാനീയങ്ങള്‍ പതിവായി കഴിക്കുന്നത് ശരീരഭാരം പെട്ടെന്ന് കൂടാനുള്ള മറ്റൊരു കാരണമാണ്.

സംസ്‌കരിച്ച ഭക്ഷണങ്ങള്‍

സംസ്‌കരിച്ച ഭക്ഷണങ്ങള്‍ ഡയറ്റില്‍ ചേര്‍ക്കുന്നത് ശരീരത്തില്‍ കലോറി കൂടാന്‍ കാരണമാകും. പ്രോട്ടീന്‍, ഫൈബര്‍ തുടങ്ങിയ അവശ്യ പോഷകങ്ങള്‍ ഇവയില്‍ അടങ്ങിയിട്ടില്ലാത്തതുകൊണ്ട് തന്നെ ദഹനത്തെയും ഇവ ബാധിക്കും.