തുണികളിലെ കടുത്ത എണ്ണകറകൾ കളയാം

ഇഷ്ടപ്പെട്ട വസ്ത്രങ്ങളില്‍ എന്തെങ്കിലും കറ പറ്റുന്നത് ആര്‍ക്കും സഹിക്കാന്‍ പറ്റില്ല.

സാധാരണയായി ബ്ലീച്ചിംഗ് ഏജന്റ് അല്ലെങ്കില്‍ സോപ്പ് പൊടി ഒക്കെ ഉപയോഗിച്ചാണ് കറകള്‍ കളയുന്നത്.

വെള്ള വസ്ത്രങ്ങളിലെ കറകള്‍ കളയാന്‍ വീട്ടില്‍ തന്നെ എളുപ്പത്തില്‍ ചെയ്യാന്‍ കഴിയുന്ന ചില പൊടികൈകള്‍ നോക്കാം.

എണ്ണ പുരണ്ട ഭാഗത്ത് പൗഡർ പുരട്ടിയ ശേഷം വിരലുകള്‍ കൊണ്ട് അമര്‍ത്തുക. തുടര്‍ന്ന് അവിടെ അല്‍പ്പം വെള്ളം ഒഴിച്ച് 30 മിനിറ്റ് വയ്ക്കുക. ഇതിന് ശേഷം സാധാരണ പോലെ സോപ്പ് പൊടി ഉപയോഗിച്ച് കഴുകുക.

എണ്ണ കറ കളയാന്‍ വിനാഗിരി നല്ല മികച്ചൊരു മാര്‍ഗമാണ്. ഇതിനായി വിനാഗിരിയും ചൂടുവെള്ളവും തുല്യ അളവിലെടുത്ത് അതിൽ തുണിയുടെ എണ്ണ പുരണ്ട ഭാഗം കുറച്ച് നേരം മുക്കിവയ്ക്കണം. ഇതിന് ശേഷം കറയില്‍ അല്‍പ്പം വിനാഗിരി ഒഴിച്ച് സ്ക്രബ് ചെയ്യുക. ശേഷം കഴുകി വെയിലത്തിട്ട് ഉണക്കിയെടുക്കാം.

കറകള്‍ക്കുള്ള പ്രകൃതിദത്ത ബ്ലീച്ചിംഗ് ഏജന്റാണ് നാരങ്ങ. ഇതിനായി കുറച്ച് നാരങ്ങ മുറിച്ച് അതില്‍ നിന്ന് നീര് എടുത്ത് എണ്ണ പുരണ്ട തുണിയുടെ ഭാഗത്ത് പുരട്ടുക. കുറച്ചു നേരം അങ്ങനെ വെച്ച ശേഷം സാധാരണ വസ്ത്രങ്ങള്‍ കഴുകുന്നത് പോലെ കഴുകുക.

ചൂട് വെള്ളം വസ്ത്രങ്ങളില്‍ നിന്ന് എണ്ണ കറ നീക്കാന്‍ സഹായിക്കും. ഇതിനായി തിളച്ച വെള്ളം നേരിട്ട് തുണിയിലെ കറയിലേക്ക് ഒഴിക്കുക ഇതിന് ശേഷം ഒരു പഴയ ടൂത്ത് ബ്രഷ് ഉപയോഗിച്ച് നന്നായിട്ട് സ്‌ക്രബ് ചെയ്യുക. വീര്യം കുറഞ്ഞ സോപ്പ് പൊടി ഉപയോഗിച്ച് വസ്ത്രം കഴുകി എടുക്കാം