വിയർപ്പിന്റെ മഞ്ഞക്കറയോട് ബൈ ബൈ പറയൂ

വെള്ളയും ഇളം നിറങ്ങളിലുമുള്ള വസ്ത്രങ്ങളിൽ, കക്ഷത്തിനടിയിലും കോളറുകളിലും കാണുന്ന മഞ്ഞനിറത്തിലുള്ള ഈ കറകൾ പലപ്പോഴും എത്ര അലക്കിയാലും പൂർണ്ണമായി പോകാറില്ല.

വിയർപ്പും ഡിയോഡറന്റുകളിലെ ഘടകങ്ങളും ചേരുമ്പോളാണ് ഈ കടുപ്പമേറിയ പാടുകൾ ഉണ്ടാകുന്നത്.

വസ്ത്രങ്ങളുടെ നിറം മങ്ങുകയോ തുണി കേടാകുകയോ ചെയ്യാതെ എളുപ്പത്തിൽ ഈ കറകൾ നീക്കം ചെയ്യാൻ സഹായിക്കുന്ന ചില ലളിതവും ഫലപ്രദവുമായ വിദ്യകൾ നോക്കാം.

വിനാഗിരിയും വെള്ളവും

തുല്യ അളവിൽ വെള്ളവും വെളുത്ത വിനാഗിരിയും എടുത്ത് നന്നായി യോജിപ്പിക്കുക. ഈ മിശ്രിതം കറയുള്ള ഭാഗങ്ങളിൽ നേരിട്ട് തേച്ചുപിടിപ്പിച്ച് ഏകദേശം 30 മിനിറ്റ് വെച്ച ശേഷം, തണുത്ത വെള്ളത്തിൽ സാധാരണ രീതിയൽ കഴുകിയെടുക്കാം.

ബേക്കിംഗ് സോഡ പേസ്റ്റ്

മൂന്ന് ടേബിൾ സ്പൂൺ ബേക്കിംഗ് സോഡ എടുത്ത് അല്പം വെള്ളം ചേർത്ത് കട്ടിയുള്ള പേസ്റ്റ് രൂപത്തിലാക്കുക. കറയുള്ള ഭാഗങ്ങളിൽ ഈ മിശ്രിതം പുരട്ടുക. അര മണിക്കൂറിനു ശേഷം ഒരു ബ്രഷ്ഉ പയോഗിച്ച് പതുക്കെ ഉരസിയതിനു ശേഷം തണുത്ത വെള്ളത്തിൽ കഴുകി കളയാം.

നാരങ്ങാനീരും ഉപ്പും

നാരങ്ങാനീരും ഉപ്പും തുല്യ അളവിൽ എടുത്ത് കറയുള്ള ഭാ​ഗത്ത് തേച്ചുപിടിപ്പിക്കുക. ഈ ഭാഗം സൂര്യപ്രകാശത്തിൽ ഉണങ്ങാൻ വയ്ക്കുക. സൂര്യരശ്മി ഒരു പ്രകൃതിദത്ത ബ്ലീച്ചിംഗ് ഏജൻ്റായി പ്രവർത്തിച്ച് കറ മാറ്റാൻ സഹായിക്കും. ശേഷം തണുത്ത വെള്ളത്തിൽ കഴുകി കളയാം.

ഹൈഡ്രജൻ പെറോക്സൈഡും വെള്ളവും

ഹൈഡ്രജൻ പെറോക്സൈഡും വെള്ളവും ശരിയായ അനുപാതത്തിൽ എടുത്ത് കറയുള്ള ഭാഗത്ത് പുരട്ടുക. 10 മുതൽ 15 മിനിറ്റിനു ശേഷം കഴുകി കളയാം.

ഡിറ്റർജന്റ്

കറയുള്ള വസ്ത്രങ്ങൾ അലക്കുന്നതിന് മുൻപ് അര മണിക്കൂർ നേരം ചൂടുവെള്ളത്തിൽ ഡിറ്റർജന്റ് ചേർത്ത് കുതിർക്കുന്നത് കറ ഇളക്കി മാറ്റാൻ നല്ലതാണ്.