പാമ്പുകടിയേറ്റ ഭാഗത്ത് മുറുക്കിക്കെട്ടാമോ? ഫസ്റ്റ്എയ്ഡില്‍ ഇക്കാര്യങ്ങൾ ശ്രദ്ധിക്കണം

പാമ്പുകടിയേറ്റുള്ള മരണങ്ങളുടെ പ്രധാനകാരണം ഫസ്റ്റ്എയ്ഡിനെക്കുറിച്ചുള്ള അറിവില്ലായ്മയാണ്.

കടിയേറ്റാല്‍ പല ലക്ഷണങ്ങളും ശരീരത്തില്‍ പ്രകടമാവും.

മുറിവിലൂടെ രക്തസ്രാവം ഉണ്ടാകും. വിഷം പേശികളെ ബാധിച്ചുതുടങ്ങിയാല്‍ കണ്ണ് തുറക്കാന്‍ കഴിയാതെ വരികയും മുന്നിലുള്ള വസ്തുക്കളെ പലതായി കാണാന്‍ തുടങ്ങുകയും ചെയ്യും.

പാമ്പുകടിയേറ്റാൽ ഫസ്റ്റ്എയ്ഡില്‍ നമ്മൾ ശ്രദ്ധിക്കേണ്ടത് ഇക്കാര്യങ്ങളാണ്.

ഇറുകിയ വസ്ത്രങ്ങളും മറ്റും മാറ്റണം. ഒരിക്കലും കടിയേറ്റഭാഗം മുറുക്കിക്കെട്ടരുത്‌.

മുറിവില്‍ നിന്ന് വിഷം വായകൊണ്ട് വലിച്ചെടുക്കുകയും വേണ്ട.

മുറിവേറ്റ ഭാഗത്ത് ഐസ്പാക്ക്‌ വയ്ക്കുന്നതും ആ ഭാഗത്തെ ചര്‍മം മുറിച്ചുമാറ്റുന്നതും അപകടമാണ്.

കടിയേറ്റ ഭാഗം അനങ്ങാതിരിക്കാന്‍ മരക്കഷണമോ മറ്റെന്തെങ്കിലും വസ്തുക്കളോ ഉപയോഗിച്ച് സ്പ്ലിന്റ് ചെയ്യാന്‍ കഴിയുമെങ്കില്‍ നല്ലതാണ്.

കടിയേറ്റ ഭാഗം ഉയര്‍ത്തിവയ്ക്കരുത്. ഹൃദയനിരപ്പില്‍നിന്ന് താഴ്ത്തി വയ്ക്കാം.

കടിയേറ്റ ഭാഗത്ത് പല്ലിന്റെ അടയാളമോ വീക്കമോ കണ്ടാല്‍ സമയം വൈകാതെ ആശുപത്രിയിലെത്തണം.

ആശുപത്രിയില്‍ എത്തുന്നതുവരെ കാപ്പി, ചായ എന്നീ പാനീയങ്ങള്‍ ഒഴിവാക്കുന്നതാണ് നല്ലത്.

ആശുപത്രിയിലെത്തിച്ചാല്‍ ഡോക്ടറോട് പാമ്പിന്റെ രൂപം, സ്വഭാവം എന്നിവ ഓര്‍മയുണ്ടെങ്കില്‍ പറയാവുന്നതാണ്.